NATIONAL NEWS

Itinuturing bilang diversionary tactics ng Kamara ang plano ng mga kaalyado ni Vice President Sara Duterte, na maghain ng reklamo kaugnay ng 2025 national budget.

Ayon kina Deputy Majority Leader Paolo Ortega V, ng La Union at Assistant Majority Leader Jay Khonghun Ng Zambales, isa lamang pamumulitika ang planong paghahain ng reklamo kina Speaker Martin Romualdez, Majority Leader Manuel Jose “Mannix” Dalipe, at Ako-Bicol Partylist Rep. Zaldy Co kaugnay ng alegasyon ng budget insertions sa 2025 budget.

Ayon kay Cong. Ortega, walang basehan ang alegasyon ng panibagong fantasy at fiction ng kampo ng mga Duterte na layong ilihis ang atensyon ng publiko mula sa tunay na isyu.

Sinabi naman ni Cong. Khonghun na ang mga alegasyon laban kay Speaker Romualdez, ay isa lamang pagtatangkang sirain ang malaking suporta ng kamara sa impeachment laban kay VP Duterte.

Itinuturing din ng mga kongresista bilang isang “desperate move” Ang naturang hakbang upang magulo ang proseso ng impeachment.

Dahil dito, nanawagan ang mga mambabatas sa senado na manatiling independent at huwag magpadala sa anumang panlabas na impluwensya na maaaring makaapekto sa impeachment trial tungo sa pagsiguro ng isang makatarungan at malinaw na proseso. –  mula sa ulat ni Geli Mendez (Patrol 30)

Hindi na dapat magtaka ang publiko kung bakit naunang lumagda sa impeachment complaint laban kay Vice President Sara Duterte si Presidential Son at Senior Deputy Majority Leader Sandro Marcos.

Ayon sa Mambabatas, natural lang na mauna siyang lumagda sa reklamo matapos ang mga binitiwang pahayag ni VP Sara sa social media gaya ng pagpapahukay sa labi ng kaniyang lolo na si dating Pangulong Ferdinand Edralin Marcos Sr. at itatapon sa West Philippine Sea.

Maging ang bantang pagpapapatay sa kaniyang mga magulang na sina Pangulong Ferdinand Marcos Jr. at First Lady Liza Araneta-Marcos maging kay House Speaker Martin Romualdez.

Itinanggi naman ni Congressman Marcos, na siya ang nagtulak sa 4th impeachment complaint at hindi rin niya kinumbinsi ang mga kasamahang kongresista na lumagda dahil ang kanilang pagpirma sa listahan ay batay sa sarili nilang desisyon. –  Mula sa ulat ni Geli Mendez (Patrol 30)

Gagamit na ang PAGASA ng artificial intelligence para sa weather forecast.

Ito mismo ang kinumpirma ni Science and Technology Secretary Renato Solidum dahil makikipagsabayan na ang ahensya sa ibang bansa para sa pagtaya ng panahon.

Ayon sa kalihim, sinimulan na ng isang A.I. weather company mula Amerika ang paggamit ng  A.I. para sa mas mahabang pagtaya ng panahon mula limang araw hanggang labing apat na araw.

Kabilang sa mga ginagawa ay ang pag-zoom in ng datos para sa mga lugar sa Pilipinas upang mas mapabuti pa ang pagbibigay ng impormasyon kaugnay sa panahon.

Maliban dito, maglulunsad din ang DOST ng bagong programa na tatawaging Eleva8 Philippines, na layuning palakasin ang bansa sa paggamit ng artificial intelligence sa mga imprastraktura ng kagawaran at pagtatatag ng artificial intelligence hubs.

Nagbabala ang Management Association of the philippines sa pamahalaan laban sa plano nitong pagtanggal sa Edsa Bus Carousel.

Tinawag na ‘ill-advised’ ng business group ang sinasabing pagtanggal sa bus lane, at iginiit na hindi magpapaluwag sa trapiko sa Edsa ang pagdaragdag ng isa pang linya para sa private vehicles.

Ayon sa business group, anumang pulong kaugnay dito, ay maituturing na paglabag sa  national transport policy of 2017 kung saan dapat bigyang-prayoridad ang public transportation bilang mobility solution na kailangang ipatupad at pangasiwaan kapwa ng Departments of Transportion (DOTR) at Public Works and Highways (DPWH).

Sa halip na tanggalin ang Edsa bus lane, hinikayat ng map ang pamahalaan na tanggalin na lamang ang traffic obstructions sa mabuhay lanes at illegal parking.

Kaugnay nito, hinimok din ng grupo na magkaroon ng iisang pananaw kaugnay sa usapin dahil matapos sabihin ng mmda ang planong pagtanggal sa nasabing bus lane, inihayag naman ng dotr na nanatili itong isa sa pinaka-epektibo at madaling public transport system sa Metro Manila.-  Sa panulat ni Laica Cuevas

 Inaasahang patuloy na sisirit ang presyo ng mga bulaklak sa Dangwa, Maynila ilang araw bago ang araw ng mga puso sa Biyernes.

Ayon sa ilang nagbebenta ng bulaklak, posibleng tumaas pa ang bentahan ng mga ito sakaling sumirit din ang presyo nito sa mga supplier.

Sa ngayon, wala pang paggalaw sa presyo ng ilang bulaklak dahil kakaunti pa lamang ang mga bumibili sa dangwa.

Gayunman, inaasahan na ng mga tindera ang pagdagsa ng mga mamimili habang papalapit ang Valentine’s Day. –  Sa panulat ni Alyssa Quevedo

Kinilala ang Pilipinas bilang isa sa mga pinakamasaya at ‘most optimistic’ na bansa sa mundo.

Batay sa pag-aaral ng Philippine Survey and  research Center at Gallup International Association, pang-siyam ang Pilipinas sa mga masasayang bansa na may happiness net score na 60%.

Nakuha naman ng China ang top happiest country at sinundan ito ng Indonesia; Mexico at Kazakhstan.

Samantala, nanguna naman ang Pilipinas sa lahat ng bansa sa Asia na may positibong pananaw para sa 2025.

Ito’y matapos makapagtala ang bansa ng 40% net optimism kung saan malaki ang itinaas nito mula sa global average na 17%.

Nangangahulugan ito na sa kabila ng mga kinakaharap na problema ng bansa, nanantiling positibo ang mga Pilipino.  – Sa panulat ni Kat Gonzales

Special session para sa impeachment ni VP Sara, posibleng isagawa ayon kay dating  Senior Associate Justice Carpio.

Posibleng magsagawa ng special session ang senado kaugnay sa impeachment ni Vice President Sara Duterte.

Ito ayon kay dating Senior Associate Justice Antonio Carpio, sakaling ipag-utos ni Pangulong Ferdinand Marcos Junior na magsawa ng nasabing special session at kung gugustuhin ng Kongreso.

Dagdag pa ni Carpio, sakali mang hindi matalakay ang impeachment habang naka-break ang Senado, maaaring ipagpatuloy na lamang ito sa 20th Congress.

Una nang sinabi ni Senate President Francis “Chiz” Escudero na walang ligal na basehan para magpatawag ng special session ang senado para sa impeachment trial ni VP Sara. –  Sa panulat ni John Riz Calata

Binigyan-diin ni dating Senador Leila De Lima na ipinakita lamang ng house of representatives na hindi maaaring balewalain ang inihaing impeachment complaint laban kay Vice President Sara Duterte.

Ayon sa dating Senador, ginawa ng kongreso kung ano ang nararapat para sa ikabubuti ng Pilipinas.

Hindi anya personal na laban ang impeachment at mas lalong hindi ito dapat ituring na pamumulitika.

Kasunod nito, nanawagan ang dating Senador sa mga grupong naghain ng impeachment complaints laban kay VP Sara na maging mapagmatyag at bantayan ang proseso ng impeachment. –  Sa panulat ni Kat Gonzales

Tumangging mag-komento si Senate President Francis “Chiz” Escudero kaugnay sa banat ni Vice President Sara Duterte hinggil sa impeachment complaint laban sa kaniya.

Kaugnay nito, hinikayat ni Senate President Escudero ang iba pang mga senador na iwasang magkomento kaugnay sa nasabing usapin.

Dagdag pa ni Senate President Escudero, walang magagawa ang sinuman sa naging reaksyon ni VP Sara sa reklamong inihain laban sa kanya. –  Sa panulat ni John Riz Calata