NATIONAL NEWS

Lumarga na ngayong araw ang katiting na tapyas sa presyo ng mga produktong petrolyo.

Batay sa anunsyo ng mga kumpanya ng langis, bababa ng P0.10 ang kada litro ng diesel at gasolina;

Habang P0.30 naman ang tapyas sa kada litro ng kerosene.

Una nang sinabi ng Department of Energy, na kabilang sa nakaapekto sa paggalaw ng presyo ng produktong petrolyo ang pagbaba ng produksyon ng Organization of the Petroleum Exporting Countries noong Enero dahil sa mababang output mula sa Iran at Nigeria;

Gayundin ang plano ni U.S. President Donald Trump na magpatupad ng taripa sa Canada, Mexico, at China.

Posibleng pagkatapos pa ng State of the Nation Address ni Pangulong Ferdinand Marcos Jr. masimulan ang aktwal na paglilitis o impeachment trial kay Vice President Sara Duterte.

Ito ayon kay Senate President  Francis “Chiz”  Escudero ay taliwas sa panawagan ng ilang  kongresista, sektor, at personalidad na agad simulan ng senado ang impeachment trial.

Sinabi ni Senate President Escudero na hindi nila agad masisimulan ang actual na impeachment trial  sa pagbalik nila sa sesyon sa June 2 dahil marami pa silang paghahandang gagawin.

Kailangan pa anilang magpatibay ng ipatutupad na  impeachment rules, na sa ngayon ay binabalangkas at pagdedebatihan pa pagbalik nila sa sesyon.

Bukod dito, kailangan din anilang bigyan si VP Sara ng sampung araw, na pwede pang hingan ng extension, para sumagot sa articles of impeachment.

Binigyang-diin ng Lider ng Senado na kung maisagawa ang pre-trial at magiging apat na beses kada linggo ang impeachment trial, matatapos umano ang paglilitis sa loob ng dalawa hanggang tatlong buwan. –  Sa panulat ni John Riz Calata mula sa ulat ni Cely Ortega-Bueno (Patrol 19)

 Iginiit ng isa sa mga Impeachment Prosecutor ng Kamara na mabigat na krimen at direktang pag-atake sa seguridad ng bansa ang assassination plot ni Vice President Sara Duterte.

Ayon kay House Deputy Majority Leader at Iloilo 3rd District Rep. Lorenz Defensor,  ang pagkuha o pag-hire ng isang gunman ay may malaking banta sa konstitusyon at sa mismong pundasyon ng Republika ng Pilipinas.

Sinabi rin ni Cong. Defensor na ang anumang pagtatangka, mungkahi, o sabwatan na layong saktan ang lider ng bansa ay nagdudulot ng kawalan ng katatagan, nagpapahina sa tiwala ng publiko, at nagpapalakas sa mga elementong nagnanais na pabagsakin ang pamahalaan.

Dahil dito, nagbabala ang mambabatas, na may kaakibat na parusa sa ilalim ng revise penal code, ang mga lalabag, kabilang na ang pakikipagsabwatan sa pagpaslang, pag-uudyok sa rebelyon, at matinding pagbabanta.

Binigyang-diin ng mambabatas, na walang ibang pagpipilian ang kamara kundi i-impeach si VP Duterte, dahil sa bigat ng kanyang mga ginawa, na isang pagtataksil sa tiwala ng publiko at matinding paglabag sa kanyang tungkulin bilang pangalawang pangulo ng bansa.  – panulat ni john Riz Calata mula sa ulat ni Geli Mendez (Patrol 30)

Umabot na sa kalahating porsyento ng mga Pilipino ang nakapili ng 12 kandidatong iboboto sa pagka-senador para sa 2025 midterm elections.

Batay sa survey ng Pulse Asia, 72% na ng mga taga-Mindanao ang may kumpletong listahan na ng mga ibobotong senador; habang 64% sa Visayas.

Sa Luzon naman, 33% pa lamang ang naitalang may kumpleto nang iboboto sa pagka-senador.

Isinagawa ang survey mula Enero 18 hanggang Enero 25 sa mga rehistradong botante, kabilang na ang mga hindi pa tiyak kung makaboboto sa darating na halalan. –  Panulat ni John Riz Calata

Handang resolbahin ng Impeachment Court ang parusang perpetual disqualification laban kay Vice President Sara Duterte sakaling magbitiw ito sa kasalukuyang puwesto bilang pangalawa sa pinakamataas na posisyon sa gobyerno.

Ito ang inihayag ni Manila Rep. Joel Chua kaugnay sa posibilidad na mag-resign sa pwesto si VP Sara upang makaiwas sa impeachment trial.

Ayon sa Kongresista, malinaw ang nakasaad sa saligang batas na removal from office at perpetual disqualification ang “Penalties” ng impeachment.

Matatandaang sa naging media conference sinabi ng pangalawang pangulo na hindi pa sumasagi sa kaniyang isip ang mag-resign dahil pinaghahandaan ng kanyang legal team ang impeachment trial. - Panulat ni john Riz Calata mula sa ulat ni Geli Mendez

Planong ipa-subpoena ng impeachment prosecution team, ang bank records ni Vice President Sara Duterte sakaling magsimula na ang paglilitis sa senado bilang impeachment court.

Ito’y bilang bahagi ng pagpapalakas sa kaso laban sa Bise Presidente kapag nag-convene na ang Senado.

Ayon kay Manila Rep. Joel Chua, isa sa mga miyembro ng 11-man prosecution team, inaaral na nila ang legal options upang makuha ang financial records na maaaring may kaugnayan sa mga partikular na articles of impeachment laban kay VP Duterte.

Binigyang diin ng mambabatas na handa silang magpresenta ng mga ebidensya sakaling simulan na ang impeachment trial.

Iginiit ni Cong. Chua, na hindi magiging hadlang sa trabaho ang pagkaka-adjourn ng kongreso para pagtibayin ang mga kaso laban sa pangalawang pangulo.

Samantala, plano rin ng house prosecutors na makipag-ugnayan sa Anti-Money Laundering Council at Commission on Audit upang masuri ang financial transactions na maiuugnay sa umano’y iregularidad sa pondo ng bayan.

Maaari nang simulan ng mga Senador na pag-aralan ang mga articles of impeachment laban kay Vice President Sara Duterte.

Nakapaloob sa articles of impeachment ang mga habla laban kay VP Sara kasama ang annexes o sinasabing mga ebidensya laban sa pangalawang pangulo.

Hinikayat ni Senate President Escudero ang mga kapwa Senado na pag-aralan ang mga ebidensya, gayundin ang rules of evidence at rules of procedure na ginagamit ng mga korte dahil gagamitin din nila ito sa impeachment trial.

Lalo na’t nakatutok ang taumbayan sa impeachment trial at nakasalalay dito ang paniniwala ng mga pilipino sa demokrasya at sa konstitusyon.

Samantala, makikita na sa website ng senado ang may 44 na pahinang verified complaint hinggil sa impeachment ni VP Duterte gayundin ang annexes na kinabibilangan ng  excerpts o bahagi ng news conference at live interview sa vice president na naging batayan ng pag-impeach sa kanya ng Kamara.

Ipi-post naman ito ni Escudero sa senate webiste bilang public document at upang mapag aralan din ng  taumbayan. –  mula sa ulat ni Cely Ortega-Bueno (Patrol)

Sinopla nina House Assistant Majority Leaders Pammy Zamora ng Taguig City, Zia Alonto Adiong ng Lanao Del Sur, at Jay Khonghun ng Zambales si Vice President Sara Duterte kaugnay ng sinabi nito na hindi niya pinagbantaan ang buhay nina Pangulong Ferdinand Marcos Jr.; First Lady Liza-Araneta Marcos; at House Speaker Martin Romualdez.

Ikinabahala ng Young Guns sa Kamara, ang pagtanggi ng Bise Presidente sa kanyang ginawang pagbabanta sa isang online press conference na mayroon siyang kinausap para ipapatay sina pangulong marcos, First Lady Liza Araneta-Marcos, at Speaker Romualdez sakaling may mangyaring masama sa kanya.

Ayon kay Cong. Adiong, ang mga pahayag ng Bise Presidente ay dapat tingnan bilang seryosong banta sa pambansang seguridad at nangangailangan ng agarang imbestigasyon upang masagot ang maraming katanungan gaya ng kung sino ang gunman na kaniyang kinausap; bakit may kilala na ganitong uri ng tao ang isa sa mataas na opisyal ng bansa.

Hindi ito anya ang unang pagkakataon na tinangka ni VP Duterte na iligaw ang atensyon ng publiko kabilang na rito ang makailang beses na pag-iwas sa pananagutan mula sa pagtangging ipaliwanag ang ginawang paggastos sa 125 million pesos confidential funds sa loob ng 11 araw hanggang sa pagbibigay-palusot sa iligal na paglilipat ng pondo ng DEPED at OVP.  – mula sa ulat ni Geli Mendez (Patrol 30)