NATIONAL NEWS

Mahaba pa ang tatahakin ng bansa bago nito makamit ang bente pesos sa kada kilo ng bigas na pangako ni Pangulong Ferdinand Marcos Jr.

Ito ang kinumpirma ng Department of Agriculture matapos tanungin kung malapit ng pumalo ang presyo ng bigas sa bansa sa bente pesos kada kilo.

Ayon kay Agriculture Secretary Francisco Tiu Laurel Jr., maaaring makaranas ang bansa ng mas mababang presyo ng bigas na papalo mula tatlumpung piso hanggang apatnapung piso sa kada kilo sa ilalim ng administrasyon ni Presidente Ferdinand Marcos Jr.

Maliban dito, patuloy din anya ang epekto ng downtrend ng global rice prices at mga government interventions.

Una nang ibinaba kahapon ng D.A. ang presyo ng bigas na nasa ilalim ng ‘rice-for-all’ program kung saan mula 35 pesos ay bumaba ito sa 33 pesos. –  Sa panulat ni Alyssa Quevedo

Alam n’yo ba na ang pag-inom ng alak ay nakababawas sa panganib ng gallstones o bato sa apdo.

Ayon sa University of East Anglia, nagkakaroon ng malakas na panlaban sa pagkakaroon ng bato sa apdo ang mga nakakaubos ng dalawang baso ng alak.

Nakita anila ng mga researcher na halos 33% nitong napoprotektahan ang apdo ng isang tao.

Bukod pa rito,  napatunayan na rin sa mga pag-aaral na ang red wine ay may ibinibigay na proteksiyon para maiwasang magkasakit sa puso. – Sa panulat ni Kat Gonzales

 Kumbinsido ang tatlong lider ng kamara na lalong lumakas ang impeachment case sa rekomendasyon ng National Bureau of Investigation na kasuhan si Vice President Sara Duterte.

May kaugnayan ito sa pagbabanta ng bise presidente kina Pangulong Ferdinand Marcos Jr., First Lady Liza Araneta-Marcos at Speaker Ferdinand Martin Romualdez.

Nagkaka-isang sinabi nina House Assistant Majority Leaders Jil Bongalon ng Ako Bicol Party-List, Ernix Dionisio ng Maynila at Deputy Majority Leader Paolo Ortega ng La Union, na patunay ang rekomendasyon ng nbi na may matibay na ebidensya laban kay VP Sara.

Anila, isang positibong development ang rekomendasyon ng nbi kaugnay sa inihaing impeachment complaint laban sa pangalawang pangulo at nagpapatibay sa kanilang posisyon na nakagawa ito ng paglabag tulad ng grave threats at inciting to sedition.

Dagdag pa ng tatlong House Leaders na dapat magsilbing paalala ang rekomendasyon ng NBI na walang sinuman ang mas hihigit o “Above the law” at dapat kumilos ang mga demokratikong institusyon ng walang takot o pinapaboran.

Iginiit ng mga mambabatas na sapat na ang kumalat na assassination plot video ni Vice President Sara Duterte upang siya ay mapatalsik sa kaniyang puwesto.

Ayon kay Manila Rep. Joel Chua, isa sa mga miyembro ng 11-man prosecution team ng Kamara, hindi mabubura ng pagtanggi ng bise presidente ang kanyang sinabi sa isang online press conference noong Nobyembre ng nakaraang taon.

Ipinunto ng mambabatas na ang video ang pinakamalinaw na ebidensya ng pagbabanta ni VP Sara na maaaring gamitin upang ma-convict ng Senate Impeachment Court at matanggal sa kasalukuyang posisyon.

Aniya, napanood na ng maraming Pilipino ang naturang video na nagpahiya sa Pilipinas matapos ding mapanood ng maraming bansa sa buong mundo.  – Sa panulat ni John Riz Calata

Tiniyak ni 1-Rider Partylist Rep. Rodge Gutierrez, na hindi masasayang ang ginagawang preparasyon ng 11-man prosecution team ng Kamara para sa impeachment trial laban kay Vice President Sara Duterte kahit magpalit pa ng mga miyembro sa 20th congress.

Tugon ito ni Cong. Guttierez sa pahayag ni Senate President Francis “chiz” Escudero, na posibleng simulan na ang paglilitis pagkatapos ng ika-apat na State of the Nation Address (SONA) ni Pangulong Ferdinand Marcos Jr., sa Hulyo.

Itinuturing ng mambabatas bilang constitutional duty ang pagtulak sa impeachment case kaya patuloy na magtatrabaho ang prosekusyon.

Ang mahalaga aniya ay handa na ang articles of impeachment maging ang mga ebidensya at line-up ng mga witness anuman ang kahihinatnan ng eleksyon sa darating na Mayo.

Ipunto ni Cong. Gutierrez, na sakaling hindi palarin ang mga kongresistang miyembro ng house prosecution team, kanilang ipapasa ang trabaho sa mga bagong itatalaga.  – Sa panulat ni John Riz Calata

Naniniwala ang isang Traffic Expert na matatagalan pa bago maimplementa ang pagpapataw ng “congestion fee” Sa mga motoristang daraan sa Edsa.

Ayon kay Engr. Rene Santiago, posibleng umabot pa sa dalawang dekada bago maipatupad ang congestion fee sa kahabaan ng Edsa.

Samantala, tinutulan din ni Engr. Santiago ang pagtanggal sa Edsa busway.

Nabatid na lumutang ang ideya ng metropolitan manila development authority kaugnay sa posibleng pagpapatupad ng congestion fee o toll sa mga sasakyang daraan sa nasabing pangunahing lansangan at ang pagtanggal sa Edsa busway. –  Sa panulat ni John Riz Calata

Welcome sa Kamara ang sinumang nais tumestigo at magdagdag ng ebidensya kaugnay sa inihaing impeachment case laban kay Vice President Sara Duterte.

Sa ginanap na media presscon, inihayag ni 1-Rider Partylist Rep. Rodge Gutierrez, isa sa mga miyembro ng House Prosecution Team, na mas mapapalakas ang mga ebidensyang inilatag kung may mga tetestigo sa impeachment trial.

Ikinukunsidera ng mambabatas bilang “Sui Generis” Ang mga reklamo laban kay VP Sara at hindi “impeachment criminal” o “punitive” dahil wala aniyang ipinatupad na multa at parusa rito.

Binigyang diin ni Cong. Guttierez na removal from office at perpetual disqualification ang “Penalties” ng impeachment na nakasaad sa saligang batas.

Kumpiyansa ang Kongresista, na sapat ang mga ebidensya na maglalabas ng katotohanan at magkukumbinsi sa Senator judges. – Mula sa panualt ni John Riz Calata mula sa ulat ni Geli Mendez (Patrol 30)

Dumipensa ang Kamara kasunod ng inihaing reklamo laban kina House Speaker Martin Romualdez, House Majority Leader Manuel Jose “Mannix” M. Dalipe, ng Zamboanga City at Ako Bicol Party-List Rep. Zaldy Co, ang dating Chairman ng House Appropriations Committee kaugnay ng umano’y mga blangko sa panukalang badyet.

Ayon kay Cong. Dalipe, ang pagpasa ng panukalang badyet ngayong taon ay hindi isang krimen.

Tinawag ng mambabatas na isang “politically motivated” Ang pagsasampa ng reklamo at malinaw na may tunay na layunin sa likod ng naturang alegasyon.

Pinuna rin ni Cong. Dalipe ang timing ng pagsasampa ng reklamo para linlangin ang publiko at magduda sa integridad ng gawain ng Kamara.

Binigyang-diin din ni Cong. Dalipe na ang kamara ay nananatiling tapat sa kanilang mandato, na tiyaking ang bawat piso sa pambansang badyet ay nagagamit nang wasto at para sa kapakinabangan ng bayan. – Sa panulat ni John Riz Calata mula sa ulat ni Geli Mendez (Patrol 30)