NATIONAL NEWS

Magsisilbing “global recognition” ng ating karapatan bilang tunay na may ari ng West Philippine Sea ang pagkilala, pagtukoy at pagsama ng Google Maps sa West Philippine Sea.

Ayon kay Senator Joel Villanueva, isa itong  malaking tagumpay ng bansa laban sa pambu-bully at pilit panghihimasok ng ibang bansa  sa ating teritoryo.

Giit ni villanueva na wala namang duda na atin ang West Philippine Sea.

Naipanalo anya natin ito noong July 12, 2016 at mananatili itong totoo kahit ilang dekada at administrasyon pa ang dumaan.

Ang “milestone” na ito ay magiging mahalaga anya sa pagtuturo at pagbibigay kalinawan sa bawat Pilipino, lalo na sa mga bata, tungkol sa teritoryo at soberanya ng ating bansa sa tulong ng digital technology.

Dagdag pa niya na kung palalakasin natin ang ating naratibo ukol sa  West Philippine Sea ay kailangan nating i-inspire at i-educate ang mga kabataan ukol dito.

Diskumpiyado si Senate President Pro Tempore Jinggoy Estrada  na kikilalanin ng bansang umaangkin sa West Philippine Sea ang ginawa ng Google Maps na pagsama sa WPS sa teritoryo ng Pilipinas.

Ayon sa Senador, kung ang desisyon ng International Tribunal sa The Hague Netherlands ay hindi iginalang ng bansa, mas malamang umano na pupunahin ang ginawa ng Google maps na pagsama sa record ng West Philippine Sea.

Dagdag pa ng mambabatas na subukan at tingnan na lamang ng Pilipinas kung makakatulong ito para mapalakas ang claim ng ating bansa sa West Phiippine Sea.

Samantala, para naman kay Senate Majority Leader Francis Tolentino, tagumpay ng bawat pilipino ang pagsama ng Google maps sa West Philippine Sea bilang bahagi ng ating teritoryo.

Patunay din anya ito na tama ang kasalukuyang patakaran ng gobyerno alinsunod sa international law at prinsipyo ng multilateralism.

Tuloy-tuloy anya ang paglawak ng pagkilala sa West Philippine Sea ng international community at mga respetadong institusyon.—ulat mula kay Cely Ortega-Bueno (Patrol 19)

Pinamamadali na ng Department of Health ang pagbuo ng mga ‘world-class emergency medical response team’ sa buong bansa bilang paghahanda sa mas malakas na pagyanig sa bansa.

Kabilang ito sa paghahanda sa tinatawag na ‘The Big One’ na inaasahang napakalakas na lindol sa Metro Manila dahil sa posibleng paggalaw ng West Valley Fault.

Binigyang diin ni Health Secretary Ted Herbosa ang pangangailangang bumuo pa ng mas maraming medical response team sa buong bansa.

Gayunman, may mga bagong national-level team na binubuo ngayon ang DOH sa mga pangunahing rehiyon para sa mas mabilis na deployment.

Pinaiimbestigahan ng isang mambabatas ang nakaka-alarmang pagguho ng konkretong poste sa construction site ng MRT-7 sa bahagi ng West Avenue, Quezon City.

Sa resolusyon na inihain ni House Deputy Minority Leader Bernadette Herrera, plano nitong magkasa ng malalim na pagsisiyasat upang tukuyin ang pananagutan, i-assess ang banta sa seguridad at palakasin ang government oversight sa transportation infrastructure projects.

Ayon sa Mambabatas, ang inihaing resolusyon ay hindi lamang tungkol sa palpak na konstruksyon kundi usapin din sa tiwala ng publiko lalo’t libu-libong pilipino ang nanganganib sa pagguho ng concrete column sa isang major transport project site.

Ipinunto ng Kongresista na hindi maaaring pabayaan na lamang ang insidente dahil sa kuwestyonableng kalidad ng konstruksyon at safety standards na sinusunod sa isa sa flagship infrastructure programs ng pamahalaan.

Dapat matukoy aniya kung saan nagkulang ang namamahala sa nasabing konstruksiyon kabilang na ang disenyo at materyales na ginamit hanggang sa aktwal na worksite practices, government inspections at kung sino ang nag-apruba at nabigong mag-monitor. —ulat mula kay Geli Mendez (Patrol 30)

Itinanggi ng Commission on Elections ang umuugong na balita na sinasabing nagka-aberya sa unang araw ng botohan sa ibang bansa gamit ng internet.

Kasunod ito ng reklamo ng ilang Overseas Filipino Workers sa social media na hindi makita ang pangalan ng mga kandidatong ibinoto at maraming code ang lumalabas.

Ayon kay COMELEC Chairman George Garcia, normal lamang ang naranasan ng ilang OFW dahil bahagi ito sa security features para sa proseso ng pagboto sa internet.

Gaya rin anya ito sa local set up kung saan hindi pinapayagan ang mga botante na kunan ng litrato ang mga opisyal na balota at mga resibo nito.

Mahigpit ding ipinagbabawal ang pagkuha ng mga larawan o screenshot sa online voting.

Gayunman, tiniyak ng Poll Body Chief sa publiko na maayos ang sistema ng halalan para sa 2025 polls na dumaan sa maraming source code review, na sinaksihan ng mga poll watchdog at iba pang stakeholder ng halalan.

Anunsyo para sa konsyumer ng Maynilad!

Makararanas ng water interruption ang ilang lugar sa Muntinlupa, Las Piñas, Parañaque, Bacoor, at Imus simula ngayong Miyerkules Santo hanggang Huwebes Santo.

Ito’y upang bigyang-daan ang pagkukumpuni sa Poblacion Water Treatment Plant sa Muntinlupa City para mapabuti pa ang serbisyo mga konsyumer ng Maynilad.

Batay sa anunsyo ng Maynilad, kabilang sa mga lugar na mawawalan ng tubig ang Molino 2 hanggang 7, Molino II-IV, Molino VII, Queens Row Central, Queens Row East at Queens Row West sa Bacoor, simula alas diyes ng gabi hanggang alas sais ng umaga.

Maging ang Pasong Buaya 1 at 2 sa Imus, mula alas diyes ng gabi hanggang alas sais ng umaga.

Gayundin ang Almanza Uno, Pilar, Talon Dos, Talon Singko sa Las Piñas simula alas sais ng gabi hanggang alas sais ng umaga.

BF Homes, Marcelo Green, at San Antonio sa Parañaque simula alas sais ng hapon hanggang alas sais ng umaga.

Dahil dito, pinayuhan ang mga apektadong customer na mag-imbak ng sapat na tubig bago ang nakatakdang maintenance.

Mariing kinondena ng Palasyo ang ilang insidente ng bullying at karahasan sa mga paaralan, na kinasangkutan ng ilang estudyante.

Kaugnay nito, tiniyak ng Malacañang ang mabilis na aksyon ng pamahalaan para maresolba ang mga nasabing insidente.

Sa press briefing, sinabi ni Palace Press Officer Claire Castro na agad pinuntahan ng Social Workers ng Department of Social Welfare and Development ang mga sangkot na paaralan, para imbestigahan at magbigay ng kinakailangang tulong sa mga estudyante.

Nag-iimbestiga na rin aniya ang Department of Education para malaman ang buong detalye sa naturang mga insidente.—ulat mula kay Gilbert Perdez (Patrol 13)