Kinikilala na ng Google maps ang West Philippine Sea.
Tinukoy ng Global Mapping platform ang West Philippine Sea na nasa kanlurang bahagi ng bansa.
Noong 2012, pormal itong pinangalanan sa ilalim ng administrative order no. 29 ni dating Pangulong Benigno Aquino III, at kinatigan ng Permanent Court of Arbitration ang Sovereign Rights ng Pilipinas sa Exclusive Economic Zone nito sa WPS noong 2016.
Marami namang netizens ang natuwa sa tamang label na ginamit ng Google maps.
Namayagpag ang Filipino creativity sa World Expo 2025 sa Osaka, Japan.
Ito’y matapos na umani ng positibong reaksyon mula sa international press at Japanese community ang ‘Woven’ Philippine Pavilion.
Sa ilalim ng temang “Nature, Culture, and Community: Woven together for a better future,” itinampok ang mahigit 200 woven panels na nilikha ng mga artisan mula sa Pilipinas.
Mayroon din itong film-inspired na anime façade bilang pagkilala sa Japanese culture at mayroon ding artificial intelligence-powered installation na tinatawag na “Dancing with Nature.”
Binuksan ang World Expo 2025 Osaka noong Abril 13.
Tinukoy ng Department of Social Welfare and Development ang mga posibleng dahilan kung bakit lumobo ang bilang ng mga Pilipinong nakararanas ng gutom.
Binigyang-diin ni DSWD Assistant Secretary Irene Dumlao na ang kagutuman at kahirapan sa bansa ay maaaring dulot ng inflation at pagkakaroon ng sunod-sunod na bagyo noong nakaraang taon.
Dahil dito, tiniyak ni Asec. Dumlao na inihahanda na nila ang mga komprehensibong hakbang upang matugunan ang nasabing usapin.
Kasabay nito, sinabi ng DSWD Official na mas pinaiigting na nila ang mga kasalukuyang programa ng pamahalaan tulad ng Pantawid Pamilyang Pilipino Program (4Ps) at Assistance to Individuals in Crisis Situations (AICS).
Nabatid na batay sa pinakahuling survey ng social weather stations, pumalo sa 35.6% ang bilang ng mga Pilipinong nakararanas ng gutom nitong nakaraang buwan, mas mataas ito kumpara sa 26.4% na naitala noong Pebrero.—sa panulat ni John Riz Calata
Ipinaliwanag ng Commission on Elections ang hindi paglalabas ng pangalan ng mga kandidatong ibinoto ng mga Overseas Filipino.
Ayon kay COMELEC Chairman George Erwin Garcia, bahagi ito ng pagprotekta sa mga boto ngayong 2025 midterm elections.
Sinabi ni Chairman Garcia na maaari namang ma-verify ng mga Overseas Filipino voters kung tama ang pangalan ng kandidatong kanilang ibinoto sa pamamagitan ng isasagawang random manual audit.
Aniya, lalabas ang machine-readable code matapos bumoto ng mga Pilipinong botante sa ibang bansa, at pagkatapos ng botohan sa May 12 ay magagamit na ang code upang makita ang pangalan ng kanilang binotong kandidato.
Binigyang-diin ng Poll Body Chief na iniiwasan nila na magamit sa vote buying ang resibo na naglalaman ng mga pangalan ng binotong kandidato. —sa panulat ni John Riz Calata
Target ng International Shrine of Our Lady of Peace and Good Voyage sa Antipolo na mapabilang sa Guinness World Record ang gagawing alay lakad pilgrimage ngayong taon.
Ayon kay Antipolo Bishop Ruperto Santos, plano nilang maipasok sa guinness world record ang ‘Alay Lakad’ bilang ‘largest gathering for a walking spiritual pilgrimage in 12 hours’, na magsisimula ng alas-sais ng gabi sa Huwebes Santo at magtatapos ng alas-sais ng umaga sa Biyernes Santo.
Dahil dito, hinimok ni Bishop Santos ang mga mananampalataya na makiisa sa 17-kilometer pilgrimage patungo sa nasabing dambana sa Antipolo.
Batay sa datos ng Rizal Police, noong nakaraang taon ay pumalo sa 7.4 million devotees ang nakiisa sa nasabing prusisyon.—sa panulat ni John Riz Calata
Bukod sa mismong kasal, importante rin ang gagawing wedding proposal ng isang lalaki para sa kaniyang girlfriend. Pero ang babae sa kwentong ito, naiyak lang nang mag-propose sa kaniya ang kaniyang boyfriend. Hindi dahil sa saya, kundi dahil sa takot.
Ang buong kwento, eto.
Sa isang viral video, makikita ang isang babae na nagsisisigaw at umiiyak habang humahangos papalapit sa isang lalaki na nakahandusay sa damuhan.
Tinanggal ng babae ang tela na nakatakip sa katawan ng lalaki at patuloy na nag-histerikal hanggang sa tuluyan na nga itong napaupo sa damuhan dahil sa sobrang pagpa-panic.
Ayon sa caption ng video, tila sinet up ang babae dahil sinabihan daw ito ng mga kaibigan ng lalaki na patay na ito.
Pero ang lalaking inakalang patay na, biglang bumangon habang mayroong hawak na bouquet of flowers para sana mag-propose.
Pero sa halip na kiligin sa surpresa, walang ibang ginawa ang babae kundi ang umiyak at rinig na rinig din ang takot sa kaniyang boses dahil sa pag-aakala na wala ng buhay ang kaniyang boyfriend.
Nang kumalma na ang babae, doon na lumuhod ang lalaki para alukin ito ng kasal, at sa dulo ng video, makikita ang dalawa na sinusuotan ng singsing ang isa’t isa.
Bagamat todo effort sa pag-acting ang lalaki sa kaniayng proposal, hindi naman ito ikinatuwa ng mga netizen online. Para sa ilan ay sobra-sobra ang ginawa ng lalaki at nakakatrauma raw ito para sa babae. Mayroon namang nagbiro na dahil sa naging reaksyon ng babae, at least nalaman ng lalaki na talagang mahal siya nito. Habang karamihan naman ay nag-alala sa kalusugan ng babae dahil maaari raw mauwi sa heart attack ang paghi-histeria nito.
Ikaw, gusto mo rin bang makaranas ng eksaherada o intimate na wedding proposal?
Isa ang graduation sa pinakainaabangang tagpo ng mga magulang sa buhay ng kanilang mga anak. Indikasyon kasi ito na matagumpay nilang nagabayan ang kanilang mga anak sa pag-aaral, at sine-celebrate rin ang sipag at tyaga ng mga ito na makatapos para sa sarili nilang mga pangarap. Kung kaya kinaantigan ng mga netizen ang video na ito ng isang mag-ina na pinaglayo ng rehas sa araw ng graduation.
Ang madamdaming kwento ng mag-ina, eto.
Panahon na naman ng graduation. Kani-kaniyang flex na ulit ang mga proud parents sa achievements at milestone ng kanilang mga anak.
Pero ang isang nanay na ito sa Santiago, Agusan del Norte, walang nagawa kundi tingnan na lang mula sa malayo ang limang taong gulang niyang anak na masayang bumisita sa kaniya habang nakasuot pa ng toga.
Ito ay dahil sampung buwan nang nakakulong ang nanay ng batang babae sa Bureau of Jail Management and Penology aa Cabadbaran City Jail sa Mindanao dahil sa kasong may kinalaman sa droga. Ayon sa uploader na si Relyn Egos, ang kapatid ng nanay ng bata, hindi raw ang nanay ang target ngunit nakita raw ito sa ni-raid na bahay.
Nag-viral kasi ang video ng mag-ina kung saan makikita ang nanay na tinatanaw lang ang kaniyang anak mula sa bintana na may rehas.
Ayon sa tiyahin ng bata, hiling daw ng kaniyang kapatid na makita ang anak nito na nakasuot ng toga. Kung kaya pagkatapos ng graduation ay dumeretso agad ang mag-tita sa kulungan para tuparin ang wish ng nanay ng bata.
Hindi na rin daw pumasok pa sa loob ng city jail ang mag-tita dahil wala raw silang pambili ng pagkain kung kaya madalas ay sa labas lang nila tinatanaw ang nakakulong na nanay.
Marami ang naantig sa tila magkabilang mundo na tagpo ng mag-ina sa isa sa pinaka-memorable na event at milestone sa buhay ng bata. Nagpaabot naman ng tulong ang mga netizen online para sa mga pangangailangan ng bata na ngayon ay nasa pangangalaga ng kaniyang tita.
Ikaw, isa ka rin ba sa mga pinaluha ng viral video na ito?
Bahagyang tumaas ang bilang ng mga pamilyang Pilipino na ikinukunsidera ang kanilang sarili na mahirap.
Batay sa Self-Rated Poverty survey ng Social Weather Stations na isinagawa noong Marso, nasa 52% o mahigit labing apat na milyong pamilyang Pilipino ang nagsabing sila ay mahirap.
Mas mataas ito kumpara sa 51% noong Pebrero, at 50% noong Enero.
Samantala, 12% naman ang nagsabing pasok sila sa borderline, habang 36% naman ng respondents ang nagsabing hindi sila mahirap.
Nakapagtala ng pinakamataas na self-rated poverty ang Visayas, na umabot sa 62%; sinundan ng Mindanao, 60%;
Habang nakapagtala naman ng 46% ang Balance Luzon, at 41% naman sa Metro Manila.
Isinagawa ang naturang survey sa 1,800 rehistradong botante sa buong bansa sa pamamagitan ng face-to-face interviews.
Sa gitna ng mainit na panahon, tiniyak ng Metropolitan Waterworks and Sewerage System na hindi kukulangin ang supply ng tubig sa Metro Manila at iba pang mga karatig lugar nito.
Ayon kay MWSS acting Deputy Administrator Patrick Dizon, nakapag-ipon sila ng sapat na supply ng tubig ngayong summer season.
Sa kasalukuyan aniya ay nasa 208 meters ang antas ng tubig sa Angat dam sa Bulacan, na pangunahing pinagkukunan ng tubig sa kalakhang maynila at iba pang kalapit na probinsya.
Dagdag pa ni Administrator Dizon, nabawasan na rin ang dependency ng Metro Manila at iba pang mga probinsya sa Angat dam dahil nag-operate na ang ibang pang mga dam at inaasahan na ring magbubukas ang Wawa dam.—sa panulat ni John Riz Calata
Umabot sa halos limang milyong videos ang binura ng tiktok sa kanilang platform sa huling quarter ng 2024 dahil sa paglabag sa community guidelines.
Ayon sa Tiktok, 4.85 million videos ang kanilang inalis dahil sa paglabag sa polisiya nito na may kaugnayan sa “sensitivity” at “mature themes”; gayundin dahil sa pag-regulate ng mga ibinebentang produkto at commercial activities.
Dagdag pa ng social media giant na 99.6% ng mga nasabing video ay binura “proactively” o agarang inalis.
Hindi rin anila pinahihintulutan ang pagpapakalat ng misinformation na maaaring makaapekto sa mga indibidwal o komunidad.
Binigyang-diin ng Tiktok na kanila ring binubura ang mga account na paulit-ulit na lumalabag sa kanilang mga polisiya.