NATIONAL NEWS

Tila nakahinga nang maluwag si dating Pangulong Rodrigo Duterte dahil sa posibilidad na malusutan ng kanyang anak na si Vice President Sara Duterte ang impeachment.

Ito ang kinumpirma ni dating Presidential Spokesman Harry Roque matapos makarating sa dating pangulo ang impormasyong nanalo siya sa pagka-alkalde ng Davao City nitong nakaraang midterm elections.

Bukod dito, ikinagalak din anya ng nakatatandang duterte ang pagkapanalong muli bilang vice mayor ng anak ding si Baste gayundin si Pulong Duterte sa pagka-congressman.

Ayon kay Roque, bagaman hindi lahat ng kandidato sa “Duterten” ay pinalad na manalo sa senatorial race, masaya na rin si dating Pangulong Digong.

Higit sa lahat ay nagpapasalamat din anya ang nakatatandang Duterte sa lahat ng taga-Davao na patuloy na nagtitiwala sa kanila.

Isinusulong na ng pamahalaan ang bagong Public Financial Management (PFM) Reforms Roadmap upang mapabuti ang pamamahala sa pondo ng bayan.

Ito ay matapos ang matagumpay na apat na araw na workshop na ginanap mula a-sais hanggang a-nueve ng mayo sa punong-tanggapan ng Asian Development Bank sa Mandaluyong City.

Dinaluhan ito ng mahigit sa 200 kinatawan mula sa iba’t ibang ahensya ng gobyerno at development partners.

Layunin ng naturang workshop ang pagtukoy at pagsasaayos ng mga hakbang para sa pagpapatupad ng mga reporma sa taong 2025 hanggang 2026.—sa panulat ni Jasper Barleta

Maaari nang makapasok sa first-level government positions ang mga nagtapos ng grade 10 at 12.

Kasunod ito ng inamyendahang requirement ng Civil Service Commission para sa clerical, custodial, at sub-professional roles sa pamahalaan.

Ayon kay Presidential Communications Office Undersecretary Claire Castro, sa ilalim ng CSC resolution no. 2500229, saklaw nito ang grade 10 completers at grade 12 graduates simula taong 2016, maging ang mga nakapagtapos technical-vocational-livelihood track na mayroong TESDA national certificate 2 certification.

Layon aniya ng nasabing hakbang na buksan ang public service sa mga kabataan, bilang bahagi ng ipinatutupad na reporma sa K-12 program.

Paalala naman ng pamahalaan, mangangailangan pa rin ito ng iba pang requirements, gaya ng training, experience at civil service eligibility.

Ilan sa mga rason ng pagkakaroon ng eye bags ang sobrang pagpupuyat, paninigarilyo, at sobrang pag-inom ng alak.

Dahil dito, nababawasan ang laman sa ilalim ng mata, nasisira ang mga ugat, at nangingitim ang kulay.

Para mabawasan ito, kailangang makakuha ng pito hanggang walong oras na tulog tuwing gabi.

Maaari ring magpalamig ng ilang hiwa ng pipino o tea bags at ipatong sa ibabaw ng mata sa loob ng labinlimang minuto.

Kung nagmamadali, maaari ring ipatong ng ilang minuto ang yelo o pinalamig na kutsara.

Siguraduhin din na uminom ng walo hanggang sampung basong tubig kada araw para laging hydrated ang katawan.

Umiwas din sa stress at panatilihin na laging maging masaya para gumanda at mabawasan ang eye bags. —sa panulat ni Mark Terrence Molave

Kabilang sa prestihiyosong Cannes Film Festival ngayong taon ang limang Filipino-produced films.

Kabilang sa non-competetive Cannes Premiere category ang pelikulang “Magellan” ni Lav Diaz na tatalakay sa buhay ng Portuguese Colonizer na si Ferdinand Magellan na binibidahan ni Gael Garcia Bernal.

Kasama rin sa pelikula ang Filipino actors na sina Ronnie Lazaro bilang Raja Humabon at Hazel Orencio bilang Juana.

Samantala, kalahok naman sa Palme d’Or Competitive category ang Japanese film na “Renoir” kung saan bahagi ang mag-inang aktres na sina Sylvia Sanchez at Ria Atayde Bilang Producers Ng Pelikula.

Habang bahagi rin sa festival ang short films na “Agapito” Nina Arvin Belarmino at Kyla Danelle Romero, “Ali” ni Adnan Al Rajeev, at “Bleat” na co-production ng Pilipinas, Malaysia, at France.—sa panulat ni Mark Terrence Molave

Nananawagan ang Commission on Elections sa mga mambabatas na aprubahan ang rekomendasyon nilang karagdagang budget para sa 2028 polls.

Ayon kay COMELEC Chairman George Erwin Garcia, layon nitong makakuha ng mas maraming voting machines na maaaring magamit din ng mas maraming presinto.

Kaugnay nito, hiling ng ahensya na ipagamit sa kanila ang mga private establishments upang mapawi ang hirap ng mga pilipinong nagsisiksikan sa mga elementary schools na ginagawang poll precincts.

Binigyang-diin din ng COMELEC na kailangan nito ang agarang aksyon ng mga mambabatas lalo na at tinatayang mas madaragdagan pa ang mga botante sa susunod na eleksyon.

Ikinatuwa ni former President Rodrigo Duterte ang muling pagkaluklok nito sa pwesto bilang Alkalde ng Davao City.

Ito ayon sa kanyang kapatid na si Bong Duterte matapos bisitahin ang dating pangulo na nakakulong sa The Hague, Netherlands dahil sa isinampang kasong crimes against humanity ng International Criminal Court, partikular sa mga isinagawa nitong extrajudicial killings sa kanyang administrasyon bilang presidente.

Samantala, iprinoklama na ng Davao Election Board bilang bagong alkalde ng lungsod ang dating pangulo matapos makakuha ng nasa 600,000 boto sa nagdaang midterm elections. —sa panulat ni Mark Terrence Molave