NATIONAL NEWS

Apat na uri ng lutong pancit ang nakapasok sa 50 best stir-fry dishes in the world ng website na Taste-Atlas.

Kinilala bilang highest rated Filipino stir-fry dish at nag-rank 21 sa listahan ang pansit bato na kilalang nagmula sa bayan ng Bato, Camarines Sur.

Samantala, nakuha naman ng rice noodle dish na pansit malabon o mas kilala bilang palabok ang ika-39 na pwesto.

Nasungkit din ng pancit canton ang number 46 sa listahan habang rank 48 naman ang pancit bihon.

Sa Pilipinas, hindi nawawala sa anumang handaan ang kahit anong luto ng pancit na itinuturing ng mga pinoy na pampahaba ng buhay. —sa panulat ni Mark Terrence Molave

Balik muli sa pagtugis sa maliliit na supplier at pusher ng iligal na droga ang operasyon ng pamahalaan.

Ayon kay Pangulong Ferdinand Marcos Jr., maliban sa pagpapatuloy ng pagsawata sa malalaking operasyon ng iligal na droga, muli silang bababa sa mga kalsada o kalye at iskinita laban sa iligal na droga.

Tumutok anya sila sa malalaking sindikato at drug bust operations nitong mga nagdaang taon, subalit sinasabing lumakas naman ang bentahan sa maliliit na lansangan.

Dahil dito, ipinunto ng presidente na palalakasin muli ang mga operasyon laban sa mga pusher.

Binigyan-diin pa ng Pangulo na magiging bahagi ng pagsasagawa ng pagpapatrolya ng mga pulis ang pagbabantay laban sa mga tulak ng iligal na droga sa maraming komunidad.

Aminado naman ang Pangulo na sadyang mahirap masugpo ang mga sindikato ng iligal na droga sa bansa, lalo pa’t malaking pera aniya ang pinagagalaw rito.

Maging ang mga pulis aniya, lokal na pamahalaan o LGUs at mga huwes o prosecutors ay nabibili ng mga sindikato.—sa panulat ni Kat Gonzales

Kinumpirma ng Office of Civil Defense na maaaring pumalo sa kalahating bilyong piso ang kakailanganing emergency repair fund sa San Juanico Bridge.

Ayon kay OCD Administrator Undersecretary Ariel Nepomuceno, ang estimate na ito ay isang “very rough estimate” at wala pang kumpletong detalye.

Aniya, dahil hindi pa naglalaan ng pondo ang Department of Public Works and Highways para sa nasabing proyekto, pinag-aaralan pa ng gobyerno kung maaari itong pondohan mula sa disaster risk reduction and management fund.

Ang San Juanico Bridge, na nag-uugnay sa mga isla ng Leyte at Samar, ay isang mahalagang imprastraktura sa rehiyon.

Dahil sa mga ulat ng pagkasira at ang pangangailangan para sa agarang pagsasaayos, magugunitang itinaas ito blue alert status ng upang tiyakin ang kahandaan at koordinasyon sa mga hakbang pangkaligtasan.

Namemeligrong maapektuhan ang legislative agenda ni Pangulong Bongbong Marcos sa nalalabing termino nito sa malakanyang sakaling magbago ang liderato sa Kamara.

Ito ang ibinabala ni National Unity Party President at  Camarines Sur 2nd District Rep. Lray Villafuerte sa gitna nang ugong na may inilulutong balasahan sa mababang kapulungan ng kongreso.

Ayon kay villafuerte, nananatili ang kanilang suporta kay Leyte 1st District Rep. Martin Romualdez bilang house speaker sa papasok na 20th Congress.

Si Romualdez, pangulo ng Lakas-Christian Muslim Democrats at pinsan ni Pangulong Marcos, ang speaker ng 19th Congress na nakatakda namang mag-adjourn sine die sa hunyo 13.

Ipinunto ni Villafuerte na kung walang sira ang isang bagay ay hindi naman ito dapat pang ayusin kaya’t wala anyang problema sa kamara ay hindi na dapat pang guluhin.

Ipinagmalaki naman ng bikolanong kongresista na bago mag-recess ang 19th Congress para sa midterm elections, 88 batas na may “national significance” ang naipasa sa ilalim ng liderato ni Romualdez, kabilang ang priority bills ni PBBM at ng Legislative-Executive Development Advisory Council.