Umapela ang Commission on Elections sa mga mambabatas na repasuhin na ang batas kaugnay sa partylist system sa bansa.
Binigyang diin ni COMELEC Chairman George Erwin Garcia na kailangan sa ilalim ng bagong batas ay sasalamin sa damdamin ng marginalized at underrepresented sectors.
Layon din ng poll body na maisakatuparan ang proportional representation sa Kamara, matapos lumutang ang balita na may mga partylist na hindi na kumakatawan sa mga nabanggit na sektor. —sa panulat ni Jemaimah Arguel
Muling nanindigan si Pangulong Ferdinand Marcos Jr., na hindi niya panghihimasukan ang impeachment laban kay Vice President Sara Duterte.
Sa isang podcast interview, sinabi mismo ng Pangulo na nasa senado na ang bagay na ito at dapat na hayaan na lamang na gumulong ang proseso.
Ngayong tapos na ang eleksyon, marami aniya silang natutunan dito, at sawa na ang mga tao sa pulitika kaya dapat atupagin na lamang ang pagseserbisyo.
Dagdag pa ni Pangulong Marcos, dapat na asikasuhin na ang pangangailangan ng taumbayan para maramdaman ng mga ito na hindi sila pinababayaan ng pamahalaan.
—ulat mula kay Gilbert Perdez (Patrol 13)
Aminado si Pangulong Ferdinand Marcos Jr., na mabagal ang implementasyon ng malalaking proyektong pang-imprastruktura, partikular na sa sektor ng transportasyon.
Ayon mismo sa Pangulo, talagang malaking delay sa right of way ang naging dahilan ng pagkaantala ng ilang flagship projects.
Gayunman, natural lamang aniya ang pagkaantala dahil sa lawak at kumplikadong proseso ng mga ito, halimbawa na lamang ang mga malaking proyekto gaya ng subway, riles, at flyover, na kinakailangang sumunod sa mahahabang proseso at matinding koordinasyon sa iba’t ibang ahensya.
Kasabay nito, inatasan ng Pangulo ang mga kaukulang kagawaran na pabilisin at pag-ibayuhin ang aksyon sa implementasyon ng mga proyekto.
Isang halimbawa nito ang inilunsad na Flagship Project Management Office ng DOTR, na inuuna ang mahahalagang transport network, alinsunod na rin sa direktiba ni Pangulong Marcos, upang maibsan ang suliranin sa trapiko at mapabuti ang transportasyon sa bansa.—ulat mula kay Gilbert Perdez (Patrol 13)
Pagnanakaw gone wrong! Talaga nga namang hindi nagtatagumpay ang mga taong may masamang pinaplano. Katulad na lang ng lalaking ito mula sa Brazil na magnanakaw sana, pero agad-agad na kinarma.
Kung ano kinahinatnan ng kawatan, eto.
Sa isang video, makikita ang dalawang lalaki na naglalambitin sa isang cell tower sa Manaus, Brazil. Sa unang tingin ay aakalain na nagwa-wall climbing lang ang mga ito pero ang totoo, isa itong rescue operation para sa isang kawatan.
Tirik na tirik pa ang araw nang akyatin ng lalaki ang nasabing tower para sana magnakaw ng mga kable at ibenta ang mga copper nito.
Pero matapos nitong akyatin ang tower na may taas na 40 ft., hindi na ito nakababa.
Kung kaya ang mga rumespondeng pulis na nakatanggap ng report na nagsasabing mayroong kahina-hinalang lalaki sa tower ay humingi na ng tulong sa mga bumbero para maibaba ang kawatan.
Ayon sa mga bumbero, noong una ay hindi raw pumayag ang lalaki na sumama sa mga bumbero pero sa huli ay pumayag din ito na magpa-rescue matapos kausapin ng mga opisyal.
Samantala, ligtas namang naibaba ang lalaki at agad na pinosasan ng mga pulis at idineretso sa presinto.
Sa mga may binabalak na masama diyan, isip-isip muna lalo na at digital na ngayon ang karma.
Patuloy ang Department of Energy (DOE) sa pagsasagawa ng mga pag-aaral upang maparami ang suplay ng kuryente sa bansa at matugunan ang lumalaking pangangailangan ng mga Pilipino.
Sa isang panayam sa programang Balitambayan, ipinaliwanag ni Assistant Secretary Mario Marasigan, CESO III ng DOE, na kasalukuyan nang nagsasagawa ang ahensya ng mga hakbang patungkol sa green energy options upang matiyak ang pagkakaroon ng operational power plants sa buong Pilipinas.
“Ang DOE ay kasalukuyang nagko-conduct ng mga pag-aaral hinggil sa green energy options, tulad ng renewable energy, liquefied natural gas, at pati na rin ang posibilidad ng paggamit ng nuclear technology para sa power generation,” ani Marasigan.
Ayon sa kanya, layunin ng DOE na magkaroon ng mga operational power plants sa mga darating na taon, partikular na sa renewable energy sources, upang mapabuti ang suplay ng kuryente sa bansa. Bukod dito, may mga hakbang ding isinasagawa patungkol sa paggamit ng liquefied natural gas bilang karagdagang source ng enerhiya.
Isa sa mga target ng DOE ay ang pagpapalawak ng paggamit ng nuclear technology sa power generation, na maaaring magsimula sa taong 2032. Ayon kay Marasigan, patuloy ang mga konsultasyon at pagsusuri upang matukoy kung paano ito magiging ligtas at epektibong solusyon sa kasalukuyang pangangailangan ng bansa sa enerhiya.
Ang mga hakbang na ito ay naglalayong matugunan ang tumataas na pangangailangan para sa kuryente habang tinitiyak ang environmental sustainability at pag-iwas sa mga posibleng power shortages sa hinaharap.
Target ng Department of Public Works and Highways (DPWH) na simulan ang rehabilitasyon ng EDSA sa susunod na linggo, partikular sa bahagi ng Pasay at Guadalupe. Ayon kay Public Works and Highways Secretary Manuel Bonoan, uunahin nilang ayusin ang section na ito, bilang paghahanda sa darating na ASEAN meeting.
Kasama sa pagpaplano ang pagsasapinal ng traffic management plan, na isinasagawa ng DPWH sa pakikipagtulungan sa Metropolitan Manila Development Authority (MMDA) at Department of Transportation (DOTr). Isinasama sa plano ang mga hakbang para mabawasan ang epekto ng proyekto sa daloy ng traffic.
Dahil sa inaasahang matinding traffic, humirit na rin ang MMDA sa Korte Suprema nitong nakaraang linggo na muling ipatupad ang No Contact Apprehension Policy. Layunin nitong matulungan ang mga awtoridad na mas madaling ma-monitor at mapanagot ang mga motorista na lumalabag sa mga traffic rules, pati na rin ang pagbawas sa physical contact at pagpapatupad ng social distancing.
Inaasahan na magkakaroon ng malaking epekto sa traffic flow ang rehabilitasyon ng EDSA, kaya’t pinaalalahanan ang mga motorista na magplano ng kanilang biyahe at maghanda sa mga posibleng abala sa kalsada.
Tinawag ng Palasyo na may pagka-bayolente ang tugon ni Vice President Sara Duterte sa mga nagsusulong pa rin ng impeachment case laban sa kanya.
Sinabi ito ni Palace Press Officer at PCO Usec. Atty. Claire Castro, makaraang ihayag ni VP Duterte na handa siyang harapin ang impeachment para ipakita ang bloodbath o pagdanak ng dugo.
Umaasa si Usec. Castro na figure of speech lamang ito ng bise presidente at hindi literal.
Muling nanindigan ang palace official na hindi makikialam si Pangulong Ferdinand Marcos Jr. Sa impeachment case laban kay VP Sara.
Una nang sinabi ni usec. Castro na ang bilin ni pangulong marcos sa kaniyang gabinete pagkatapos ng eleksyon ay ituloy na ang trabaho at isulong ang mga programa ng gobyerno para sa kapakanan ng mga Pilipino.
Ibinunyag ni Vice President Sara Duterte na may naganap na panunuhol upang maipa-impeach siya sa Kamara.
Ayon kay VP Sara, inalok ang mga mambabatas ng 1.5 million pesos at anim na milyong pisong pondo para sa Ayuda sa Kapos ang Kita Program (AKAP) kapalit ang paglagda sa impeachment complaint.
Bukod pa aniya ito sa tinatawag na conditional release na sinasabing isiniwalat ni Alyansa para sa Bagong Pilipinas Campaign Manager at Navotas City Rep. Toby Tiangco.
Ang conditional release ay ang budget na sinasabing ilalaan para sa district project ng mga kongresista basta pumirma ang mga ito sa impeachment ni VP Sara.
Kung ikukumpara aniya sa public records, makikitang ang mga mambabatas na hindi sumang-ayon sa impeachment complaint at walang pondo para sa mga distrito nito.
Nabatid na mahigit 200 kongresista ang pumirma sa impeachment complaint laban sa bise presidente dahil sa sinasabing maling paggamit ng pondo ng kanyang tanggapan at ng Department of Education noong pinamumunuan pa niya ito.
Iniimbestigahan na ng Department of Migrant Workers kung may iba pa silang mga kawaning sangkot sa maanumalyang pagbili ng 1.4-billion-peso na lupa sa ilalim ng pamumuno ng sinabak na Overseas Workers Welfare Administration (OWWA) Administrator na si Arnell Ignacio.
Ayon kay DMW Secretary Hans Leo Cacdac, kumakalap pa sila ng mga impormasyon kaugnay sa sinasabing iregularidad na hindi aniya inaprubahan ng OWWA Board.
Aniya, kapag natapos na ang imbestigasyon ay saka sila magsasampa ng kaukulang kaso sa mga sangkot sa naturang isyu.
Nabatid na sinabi ni DMW Undersecretary Patricia Yvonne Caunan na para sana sa halfway house o dormitory-type accommodation ng mga Overseas Filipino Worker ang pondong ginastos sa pagbili ng lupa.
Sumirit ang bilang ng mga taong nakaranas ng food insecurity at malnutrition sa buong mundo noong 2024.
Ayon sa United Nations Food and Agriculture Organization, umabot sa halos 300 milyong indibidwal ang nakaramdam ng acute hunger sa 53 bansa.
Batay sa datos ng UN, ang nasabing bilang ay mas mataas ng halos 14 na milyon kumpara noong 2023.
Kinumpirma rin ng international organization na nakaranas ng famine o labis na kagutuman nitong nakaraang taon ang ilang bahagi ng Sudan;
Habang naitala naman ang food insecurity sa Gaza Strip, South Sudan, Haiti, at Mali.
Dahil dito, ibinabala ng FAO Director-General ang patuloy na paglala ng kaso ng acute food insecurity lalo na sa mga liblib na lugar.—sa panulat ni John Riz Calata