NATIONAL NEWS

Binigyan-diin ni dating Presidential Spokesman Harry Roque na pag-aaksaya lamang ng pera ang pag-deploy ng Criminal Investigation and Detection Group ng mga tracker team para hulihin siya.

Ayon sa dating Presidential Spoxman, hindi kailangan ng tracker dahil alam ng lahat kung nasaan siya.

Araw-araw anya siyang nasa likod ng International Criminal Court Detention Facility o sa tinawag nitong Duterte Street.

Binigyan-diin pa ng dating palace official, paraan lamang ito ng otoridad para makakurakot ng pera.

Babala pa ni Atty. Roque, kung sakali man magkaroon ng tracker team sa The Hague, Netherlands, maaaring hulihin ang mga ito dahil sa “usurpation”. —sa panulat ni Kat Gonzales

Nais ni Pangulong Ferdinand Marcos Jr. na agarang makaresponde ang mga pulis sa mga insidente  ng krimen, pinakamabilis na aniya ay sa loob ng limang minuto.

Ayon sa Pangulo, mahalagang makita ng mga tao ang mga pulis sa kalsada.

Ito aniya ay para maramdaman ng tao na ligtas sila at may agad mahihingan ng tulong sa panahong makaranas sila ng panganib o banta mula sa masasamang loob.

Kaugnay nito, inatasan ng Pangulo ang Department of Interior and Local Government at PNP na magpatupad na lamang ng iisang emergency hotline  sa buong bansa para sa mas mabilis na pagtugon.

Sa ngayon kasi aniya, kani kaniyang hotline numbers ang ginagamit sa bawat lugar at rehiyon na nagdudulot lamang aniya ng kalituhan sa publiko.—sa panulat ni Kat Gonzales

Apat na uri ng lutong pancit ang nakapasok sa 50 best stir-fry dishes in the world ng website na Taste-Atlas.

Kinilala bilang highest rated Filipino stir-fry dish at nag-rank 21 sa listahan ang pansit bato na kilalang nagmula sa bayan ng Bato, Camarines Sur.

Samantala, nakuha naman ng rice noodle dish na pansit malabon o mas kilala bilang palabok ang ika-39 na pwesto.

Nasungkit din ng pancit canton ang number 46 sa listahan habang rank 48 naman ang pancit bihon.

Sa Pilipinas, hindi nawawala sa anumang handaan ang kahit anong luto ng pancit na itinuturing ng mga pinoy na pampahaba ng buhay. —sa panulat ni Mark Terrence Molave

Balik muli sa pagtugis sa maliliit na supplier at pusher ng iligal na droga ang operasyon ng pamahalaan.

Ayon kay Pangulong Ferdinand Marcos Jr., maliban sa pagpapatuloy ng pagsawata sa malalaking operasyon ng iligal na droga, muli silang bababa sa mga kalsada o kalye at iskinita laban sa iligal na droga.

Tumutok anya sila sa malalaking sindikato at drug bust operations nitong mga nagdaang taon, subalit sinasabing lumakas naman ang bentahan sa maliliit na lansangan.

Dahil dito, ipinunto ng presidente na palalakasin muli ang mga operasyon laban sa mga pusher.

Binigyan-diin pa ng Pangulo na magiging bahagi ng pagsasagawa ng pagpapatrolya ng mga pulis ang pagbabantay laban sa mga tulak ng iligal na droga sa maraming komunidad.

Aminado naman ang Pangulo na sadyang mahirap masugpo ang mga sindikato ng iligal na droga sa bansa, lalo pa’t malaking pera aniya ang pinagagalaw rito.

Maging ang mga pulis aniya, lokal na pamahalaan o LGUs at mga huwes o prosecutors ay nabibili ng mga sindikato.—sa panulat ni Kat Gonzales

Kinumpirma ng Office of Civil Defense na maaaring pumalo sa kalahating bilyong piso ang kakailanganing emergency repair fund sa San Juanico Bridge.

Ayon kay OCD Administrator Undersecretary Ariel Nepomuceno, ang estimate na ito ay isang “very rough estimate” at wala pang kumpletong detalye.

Aniya, dahil hindi pa naglalaan ng pondo ang Department of Public Works and Highways para sa nasabing proyekto, pinag-aaralan pa ng gobyerno kung maaari itong pondohan mula sa disaster risk reduction and management fund.

Ang San Juanico Bridge, na nag-uugnay sa mga isla ng Leyte at Samar, ay isang mahalagang imprastraktura sa rehiyon.

Dahil sa mga ulat ng pagkasira at ang pangangailangan para sa agarang pagsasaayos, magugunitang itinaas ito blue alert status ng upang tiyakin ang kahandaan at koordinasyon sa mga hakbang pangkaligtasan.