NATIONAL NEWS

Dalawang kaso ng monkeypox virus ang nakumpirma sa Maguindanao Del Norte.

Isa sa mga nagpositibong pasyente ay residente ng Datu Odin Sinsuat habang ang isa naman ay kinilalang residente ng Sultan Kudarat.

Samantala, anim pang pasyente na nagpapakita ng ilang sintomas ng mpox ang patuloy na mino-monitor sa mga isolation facilities.

Kasalukuyang pinaiigting na ng Bangsamoro government ang pagpapakalat ng lahat ng health service teams upang maiwasan ang pagkalat ng sinasabing virus sa lugar. —sa panulat ni Mark Terrence Molave

70-anyos na si lola Letecia Sobebe, matagumpay na inakyat ang pinakamataas na bundok sa Pilipinas na  Mount Apo.

Ang tagumpay na ito’y labis namang ikinamangha ng netizens dahil sa taglay anyang lakas at dedikasyon ng senior hiker lalo na’t ang bundok ay may difficulty level na 7 out of 10 at ang pag-akyat dito ay aabutin ng tatlong araw.

Ikinatuwa rin ng marami ang pagsuot ng matanda ng pink na Filipiniana dress at pearl necklace sa tuktok ng bundok para magpicture sa gitna ng tanawin.

Nagsilbing inspirasyon ang kwento ni lola Letecia na nagpapatunay na hindi hadlang ang edad sa pagsasakatuparan ng pangarap. —sa panulat ni Mark Terrence Molave

Sa napakainit na panahon, problema ang bungang araw o keratosis pilaris.

Isang uri ng bungang araw ay tinatawag na chicken skin – isang harmless skin condition kung saan ang ating balat ay nagmumukhang balat ng manok kapag tinatanggalan ng balahibo.

Karaniwan itong tumutubo sa braso, hita, pwet, at paminsan-minsan kahit sa mukha.

Hindi ito seryosong kundisyon at kadalasan ay kusa namang nawawala ngunit posible rin itong pagsimulan ng seryosong sakit kung maimpeksyon.

Upang gumaling, kailangan ng gentle exfoliation ng balat para maalis ang dead skin o ang mga bara sa ating hair follicles.

Ibabad ang balat sa sabong may tubig sa loob ng limang minuto at pagkatapos ay banlawang mabuti.

Pagkatapos ay linisin, pahiran ng lotion o moisturizer para manatiling hydrated ang ating balat. —sa panulat ni Mark Terrence Molave

Kinumpirma ng Commission on Elections na sampung araw lamang ang voter registration para sa Barangay at Sangguniang Kabataan Elections.

Magbubukas ang aplikasyon para sa mga bagong botante, gayundin sa mga magpapareactivate at magpapalipat ng  registration record, sa huling linggo ng Hulyo hanggang sa unang linggo ng Agosto.

Matatandaang sisimulan sana ang pagrerehistro noong Setyembre 30 ngunit pansamantalang ipinatigil dahil sa isinagawang “May midterm elections”.

Umaasa naman ang ahensya na aabot sa isang milyon ang bilang ng mga bagong botante sa darating na BSK Elections na nakatakda sa Disyembre 1.—sa panulat ni Mark Terrence Molave

Binigyang-diin ng Malacañang na hindi babaliin o babaligtarin ni Pangulong Ferdinand Marcos Jr. ang batas para lamang makipagkasundo sa iisang tao o ilang indibidwal.

Tugon ito ni Palace Press Officer at pco Usec. Atty. Claire Castro sa mga komento ni Atty. Harry Roque na nagsabing kung talagang sinsero ang pangulo sa tinuran nitong pakikipag-ayos sa mga Duterte ay pauwiin nito sa Pilipinas si dating Pangulong Rodrigo Duterte, magpa-hair follicle test ito, at ipatigil ang impeachment case laban kay Vice President Sara Duterte.

Iginiit ni Castro na hindi dapat itutok lamang sa mga duterte ang pakikipagkasundo, dahil ang sinabi aniya ng pangulo ay gusto niyang makasundo ang lahat ng tao para makausad na ang pamahalaan at magawa ang mga programang pakikinabangan ng mga Pilipino.

Binigyang-diin pa ni Castro na ang tunay na pakikipagkasundo ay hindi dapat hinihingan ng mga kondisyon.

Hindi aniya magpapahawak sa leeg o magpapadikta ang pangulo sa maling paniniwala at hindi tatalikuran ang batas para lang pagsilbihan ang iilan.

Kung kaibigan o batas aniya ang pagpipilian, batas pa rin ang pipiliin ng pangulo.

Naniniwala ang isang Political Analyst na hindi na muli pang magbubuo ng uniteam nila Pangulong Ferdinand Marcos Junior at Vice President Sara Duterte.

Ayon kay Professor Antonio Contreras, ito’y kahit pa nagpahayag si pangulong marcos na bukas siyang makipag-ayos  sa mga Duterte.

Sa kanyang palagay anya ang kailangan na lamang gawin ng dalawang lider ng bansa ay maging civil sa isa’t isa.

Samantala, binigyan-diin naman ni Professor Contreras na kailangan pa ring ituloy ang impeachment trial dahil isa itong constitutional process.—sa panulat ni Kat Gonzales

Mariing pinabulaanan ni Senator-Elect Panfilo ‘Ping’ Lacson, ang kumalat na impormasyon na nakipagkita siya kay Vice President Sara Duterte.

Ayon sa Senador, hindi tamang makipag-usap sa Bise Presidente lalo na’t posibleng maging senator-judge siya sa napipintong impeachment trial laban dito.

Sinabi naman ni Sen. Lacson na wala siyang nakikitang mali kung mag-courtesy call ang mga bagong senador o kongresista sa ikalawang pinakamataas na opisyal ng bansa.

Gayunman, sa kasalukuyang sitwasyon, hindi aniya ito kaaya-aya dahil may nakahaing impeachment sa senado laban sa pangalawang pangulo.—ulat mula kay Cely Ortega-Bueno (Patrol 19)

Ikinagalak ng Metropolitan Manila Development Authority ang desisyon ng Korte Suprema kaugnay sa pagpartiallt lift ng temporary restraining order sa  No Contact Apprehension Policy (NCAP).

Ayon sa MMDA, nagsumite sila ng motion for reconsideration sa Korte Suprema upang muling ipatupad  ang NCAP.

Naniniwala anila sila na mas epektibong natutugunan ng NCAP ang mga problema sa trapiko sa mga pangunahing kalsada.

Bukod pa rito, binigyan-diin ng MMDA na mas mapangalagaan ang kaligtasan ng mga motorista at commuters, oras na ipatupad ang NCAP.

Nabatid na tanging sa Edsa at C5 lamang ipapatupad ang NCAP. —sa panulat ni Kat Gonzales