NATIONAL NEWS

Nagbabala ang Land Transportation Franchising and Regulatory Board sa mga driver at operator ng public utility vehicle kaugnay sa pagpapatupad ng mga ito ng dobleng bayad sa mga pasahero batay sa physical appearance; size o weight ng mga ito.

Batay sa inilabas na pahayag ng LTFRB, nakatanggap sila ng kaliwa’t kanang reklamo kaugnay sa pagpapabayad ng ilang driver ng lagpas sa dapat na bayad sa mga overweight o plus-size na pasahero.

Ayon kay LTFRB Chairman Teofilo Guadiz the Third, hindi makatarungan ang overcharging at isang discriminatory ito dahil dapat ang pamasahe ay pang-isang tao lamang kahit ano pa ang size nito.

Giit pa ng opisyal, kailangang accessible at respectful sa lahat ng mga pampublikong transportasyon.

Nakasaad din aniya sa existing law at guidelines ng LTFRB na posibleng maharap sa parusa ang mga lalabag dito tulad ng multa; suspensyon sa mga operation; at pagkakarevoke ng prangkisa ng mga ito.

Naniniwala ang isang ekonomista na makaaapekto sa ekonomiya ng bansa ang balasahan sa gabinete ni Pangulong Ferdinand Marcos Jr.

Ayon kay Prof. Astro del Castillo, mararamdaman ng karamihan ng sektor ng ekonomiya ang malawakang desisyon ng Pangulo.

Maaapektuhan rin aniya ng rigudon ng gabinete ang mga polisiya at programa ng bansa tulad ng nangyari sa mga nagdaang administrasyon.

Naniniwala si Prof. Castillo na matagalang bago maging gamay sa trabaho ang mga bagong miyembro ng gabinete.

Nagbibigay rin aniya ng kalituhan sa merkado ang desisyon ng Presidente dahil sa kabila ng pag-uulat ng mga matagumpay na hakbangin ng pamahalaan nitong mga nagdaang buwan ay biglang nagkaroon ng balasahan.

Binigyang-diin ng ekonomista na ang Pilipinas ay may mababang track record pagdating sa ‘continuity’ o tuloy-tuloy na pag-usad ngunit may mabuting record sa kawalan ng katiyakan.

Lalo rin aniya magpapagulo ang desisyon ni Pangulong Marcos sa napipintong impeachment trial ni Vice President Sara Duterte-Carpio.

Dapat tiyakin ng MMDA ang patas, mabilis, at transparent na implementasyon ng Non-Contact Apprehension Policy or NCAP para maiwasan ang mga alalahanin at pangamba sa naturang programa.

Ayon kay Senate President Chiz Escudero, mahalaga na matanggal sa isip ng mga motorista na ang NCAP ay isang paraan lang para kumita ang MMDA o ang gobyerno.

Ang pagsasaayos, aniya, sa pagpapatupad ng NCAP at ng mga batas trapiko ang pinaka-importanteng hakbang para maging katanggap-tanggap para sa lahat ang programang ito.

Kasama ang maraming motorista, ikinalungkot ni SP Escudero ang ginawang pagtanggal ng Korte Suprema sa temporary restraining order laban sa NCAP. Ito ay dahil sa marami pa, aniya, ang nangangamba kung magiging patas pagdating sa apprehension at kung masusunod ang due process sa pagpapatupad ng naturang program.

Isa aniya sa mga kwestyon ay kung mabilis na maipapadala ang Notices of Violations o NOV.

Batay aniya sa report mula sa MMDA, maaaring matagalan dahil sa mga posibleng kaharaping problema sa pagpapadala ng notice.

Lumalabas na matagal ang buong proseso sa pagpapadala ng mga notices dahil via snail mail pa.

Maaaring aniya na pag dumating na ang Notice of Violations ay hindi na matandaan ng motorista ang sinasabing violation.

Giit ni Escudero, dapat ay ilang araw lang matatanggap na ang notice… mas mabilis, mas maganda.

Maaari din aniya na magpatong-patong ang penalty para sa non-payment ng multa kung mawala ang Notices of Violations sa mail.

Kaya dapat aniya idaan sa emails ang mga notice kung available ito sa kanilang system para mapabilis ang proseso.

Giit pa ni Escudero, dapat na agarang aksyunan ng MMDA ang mga problematic lane marking, traffic lights, at signages dahil magiging basehan ang mga ito para sa maraming violation at apprehension.

Kailangan aniya klaro ang mga ebidensya at hangga’t maari ay hindi kwestyunable at hindi kaduda-duda.

Mabibigyang katwiran, aniya, at magiging katanggap-tanggap ang NCAP kung magiging patas, mabilis, transparent, at consistent ang implementasyon nito.—ulat mula kay Cely Ortega-Bueno (Patrol 19)

 Dalawamput-apat na tripulante mula sa iba’t ibang bansa ang matagumpay na nailigtas sa lumubog na Liberian-flagged cargo ship sa karagatan ng Kerala, India.

Kumpirmadong mayroong Filipino crew na kabilang sa mga nasagip sa paglubog.

Nabatid din na kabilang sa sakay ng naturang barko ang mga mapanganib na kemikal at tune-tuneladang langis.

Paglilinaw ng Indian Coast Guard, nakahanda na rin sila sa posibleng pollution response kung sakaling may pagbabanta ng oil spill sa karagatan.

—sa panulat ni Mark Terrence Molave

Bawasan ang pamimigay ng ayuda.

Ito ang mungkahi ni Senador JV Ejercito sa pamahalaan.

Sa panayam ng DWIZ, sinabi ni Sen. Ejercito na kailangang mas mag-focus ng pamahalaan sa pagkakaroon ng mga long-term at sustainable program.

Hindi rin sana aniya labas lamang nang labas ng pera ang pamahalaan para sa mga ayuda, kundi magkaroon din sana ng ‘returns’ mula rito.

—sa panulat ni John Riz Calata

 Idineklara ng Department of Agriculture ang Nueva Vizcaya bilang Ginger Capital of the Philippines.

Layon ng deklarasyon na mapaunlad ang produksyon ng luya at maiangat ang kita ng mga magsasaka sa nueva Vizcaya at buong Cagayan Valley region.

Alinsunod din ito sa direktiba ni Pangulong Ferdinand Marcos, Jr. na palaguin ang agricultural productivity sa Pilipinas.

Batay sa datos ng Philippine Statistics Authority, nanguna ang Nueva Vizcaya sa produksyon ng luya sa bansa noong 2024 na umani ng mahigit 7,000 metric tons mula sa higit siyamnaraang ektarya ng lupa sa probinsya.

—sa panulat ni John Riz Calata

Nilinaw ng Metropolitan Manila Development Authority na saklaw ng “No-Contact Apprehension Policy” (NCAP) ang lahat ng major roads na nasa hurisdiksyon ng ahensya.

Kabilang na rito ang Edsa, Commonwealth Avenue, Quezon Avenue, Roxas Boulevard, C-5, Ortigas Avenue at Macapagal Boulevard.

Ayon kay MMDA Chairman Romando Artes, sisimulan muli ang implementasyon ng NCAP sa Lunes matapos na pansamantalang alisin ng Supreme Court ang temporary restraining order laban sa polisiya.

Mahalaga anya ang naturang hakbang lalo’t kasado na sa hunyo ang edsa rehabilitation.

Sa kabila nito, tutol ang ilang motorista at transport group tulad ng pasang-masda sa pagbabalik ng NCAP, partikular ang issue kung ang PUV Operator at Driver ang magbabayad ng multa.