NATIONAL NEWS

Mayorya ng mga Pilipino ang tutol sa ginawang pag-aresto at pagsuko kay dating Pangulong Rodrigo Duterte sa International Criminal Court.

Batay sa survey ng Pulse Asia na isinagawa noong Mayo 6-9, 58% ng mga botante sa bansa ang nagsabing hindi sila sang-ayon sa pag-aresto sa dating presidente.

26% naman ang nagsabing sang-ayon sila habang 16%ang hindi masabi kung sang-ayon sila o hindi.

Matatandaang noong Marso nang arestuhin ang dating Pangulo, na kasalukuyang nasa kustodiya ng ICC para harapin ang kaso ng crimes against humanity kaugnay ng war on drugs campaign ng kanyang administrasyon.

Tutol ang nasa 50% ng mga Pilipino sa paghain ng Kamara ng impeachment case laban kay Vice Pres. Sara Duterte.

Batay sa survey ng Pulse Asia Research, Inc., 28% ng mga rehistradong botante ang sang-ayon sa paghain ng impeachment case laban kay VP Sara, habang 21% ang nasabing hindi nila masabi kung sang-ayon sila o hindi.

1% naman ang nagsabing wala silang sapat na kaalaman upang magbigay ng opinyon sa nasabing usapin.

Isinagawa ang nasabing survey mula Mayo 6-9, isang linggo bago ang 2025 elections.

Ilulunsad ng Department of the Interior and Local Government ang unified 911 emergency call system sa Hulyo. Sa pamamagitan ng naturang sistema, isa na lamang ang emergency hotline na maaaring tawagan ng sinumang nangangailangan ng tulong sa bansa.

Sisimulan ang inisyal na paglunsad nito sa Ilocos Region, Central Visayas, Bangsamoro Autonomous Region in Muslim Mindanao, at National Capital Region, gayundin sa mga probinsya ng Cavite, Laguna, at Rizal.

Target din ng ahensyang palawakin ang sakop ng proyekto sa lahat ng rehiyon sa Pilipinas. Ilan sa nakatalagang responder dito ang Bureau of Fire Protection at Philippine National Police.

—sa panulat ni Mark Terrence Molave

Nasa 160,000 ang bilang ng mga kulang na classroom sa mga pampublikong paaralan sa bansa.

Ayon kay Education Secretary Sonny Angara, isang malaking suliranin ito sa papalapit na balik-eskwela sa Hunyo lalo pa at hindi na kayang tugunan ng kanilang budget ang tumataas pang classroom shortage.

Dahil dito, posibleng magsagawa pa rin ng shifting ang mga klase sa mga public schools upang lahat ng estudyante ay makapasok sa eskwelahan.

Nakatakda ng magsimula ang pagbubukas ng klase sa Hunyo 16 at tinatayang magtatapos sa katapusan ng Marso sa susunod na taon.

—sa panulat ni Mark Terrence Molave

Hindi dapat palampasin ang mga taong nangloloko sa taumbayan sa pamamagitan ng pagpapakalat ng maling impormasyon.

Ito ang inihayag ni Senator Ramon “Bong” Revilla Jr. makaraang igiit na dapat managot ang sinumang binayaran para siya ay siraan noong panahon ng kampanya.

Ito ang dahilan kaya, aniya, sila ay maghahain ng kasong cyberlibel sa mga sangkot at nasa likod ng mapanirang social media post laban sa kanya, lalo noong palapit na halalan.

Marami, aniya, ang kabataan na bomoboto na hindi alam ang totoong nangyari kaugnay ng kanyang kasong plunder, kung saan siya ay pinawalang-sala ng Sandiganbayan at walang anumang naging utos para siya ay magsoli ng anumang halaga ng pera.

Nilinaw ni Revilla na hindi niya kinukuwestyon ang resulta ng halalan. Kahit na siya ay pang-14, dapat, aniya, itong respetuhin.

Ngunit ang nakikita nilang dahilan ay marami sa mga botante ang napaniwala sa mga pag-atake sa kanya gamit ang fake news.

Una rito, sinabi ni Atty. Raymond Fortun, legal counsel ni Senator Revilla, na lima hanggang sampu ang ipaghaharap nila ng kasong cyber libel.

Hiling ni Senate Minority Leader Koko Pimentel na ang mga bagong itatalaga ni Pangulong Ferdinand Marcos Jr. sa gabinete ay may kakayahang makatulong sa pagtugon sa malawakang kahirapan na nararanasan sa bansa.

Ito ang inihayag ni Pimentel kaugnay ng ginagawang pagbalasa ng pangulo sa ilang miyembro ng kanyang gabinete.

Giit ng senador, ang kahirapan ay isa sa mga pangunahing isyu o problema na kinakaharap ng ating bansa.

Kulang, aniya, ang pera sa bulsa ng mga ordinaryong mamamayan dahil ang kayamanan at kita ng bansa ay hindi patas at hindi pantay-pantay na naipapamahagi.

Kaya ayon kay Pimentel, sana ay mga taong may kakayahan at tunay na malasakit sa bayan ang italaga ng pangulo, upang matugunan ang malawakang kahirapan sa ilalim ng isinasagawang cabinet revamp.

Ibinunyag ng Department of Education na papalo sa tatlong milyong estudyante ang nangangailangan ng tutorial program.

Ito’y kasunod ng inilabas na datos ng Philippine Statistics Authority na nasa 5.58 million high school graduates ang ‘functionally illiterate’ o may problema sa pag-intindi at pag-comprehend.

Ayon kay Education Undersecretary Gina Gonong, nagkakaroon ng ‘gap’ sa pagkatuto ang estudyante kapag hindi nito naabot ang inaasahang matutunan nito.

Aminado rin ang opisyal na mahaba pa ang tatahakin upang matulungan ang mga mag-aaral kaugnay sa nasabing usapin.

Dahil dito, inilunsad ng DepEd ang Academic Recovery and Learning Program at bahagi nito ang libreng tutorial session sa hindi bababang tatlong milyong estudyante na nahihirapan sa functional literacy.

Sakop ng nasabing inisyatiba ang reading at math para sa Grade 1 hanggang Grade 10 at science para sa mga Grade 3 hanggang Grade 10.

Magsisimula naman ang assessment sa June 16, upang matukoy kung sino-sino sa mga estudyante ang nangangailangan ng nasabing tulong.

Tiniyak ng PDEA Philippine Drug Enforcement Agency ang commitment nito sa panawagan ng Pangulong Ferdinand “Bongbong” Marcos Jr. na hulihin ang small-scale drug dealers sa gitna na rin ng pagsunod sa proseso ng batas.

Ayón ito kay PDEA Spokesperson Joseph Frederick Calulut.

Dahil sa direktiba ng Pangulong Marcos, ipinabatid ni Spokesperson Calulut na kumikilos na ang PDEA laban sa small-scale drug dealers at inaasahang makakapaglabas sila ng data sa mga susunod na araw.

Binigyang din pa ni Spokesman Calulut na nakakumpiska ang PDEA ng malaking bulto at halaga ng iligal na droga kumpara sa nakalipas na administrasyon.

Kaya naman, inihayag ng opisyal ang pagpapaigting pa ng intelligence operations para mas marami pang illegal drugs ang makumpiska ng PDEA sa tulong din ng iba pang kinauukulang ahensya ng gobyerno.