NATIONAL NEWS

Ikinababahala na ng ilang business at industry groups ang magiging epekto ng EDSA rebuilding project sa kanilang araw-araw na operasyon.

Ito’y dahil inaasahang magdudulot ang naturang proyekto ng mas mabigat na daloy ng trapiko sa sandaling simulang na ito sa Hunyo.

Ayon sa Supply Chain Management of the Philippines o SCMAP, kabilang sa mga labis na maaapektuhan ang mga nagpo-produce at nagdedeliver ng mga produkto sa mga mall at supermarket.

Maaari anilang magresulta ito sa mas mahabang oras ng delivery, pagkaunti ng stocks at pagsirit ng presyo ng mga bilihin. Bagaman nauunawaan ng SCMAP ang kahalagahan na ayusin ang EDSA, nanawagan sila sa gobyerno na ipabatid nang maayos sa stakeholders kung ano talaga ang kanilang mga plano upang makapaghanda sila ng mas maaga at maayos.

Para naman kay Makati Business Club Executive Director Apa Ongpin, tiyak na may malaking epekto sa bawat empleyado ang inaasahang traffic congestion sa EDSA, lalo ang mga walang option na mag-work from home, gaya ng mga service workers. Samantala, hinimok ng Philippine Chamber of Commerce and Industry ang mga pribadong kumpanya na magpatupad ng hybrid work schemes sa gitna nang ikinakasang EDSA rehab.

Maglalabas ang Metropolitan Manila Development Authority ng sticker na may security features para sa mga sasakyang exempted sa ipapatupad na odd-even scheme sa EDSA gaya sa mga Transport Network Vehicle Service.

Ito ang kinumpirma ni M.M.D.A. Traffic Enforcement Group Head, Atty. Victor Nuñez sa kanyang pagharap sa pagdinig ng Senate Committee on Public Services na pinamumunuan ni Senator Raffy Tulfo.

Ayon kay Nuñez, magbibigay silang muli ng stickers na libre para sa mga T.N.V.S. Para maiwasan na maabuso, humingi na ang M.M.D.A. ng datos sa L.T.F.R.B. hinggil sa mga T.N.V.S. at nakausap na rin ang mga operators nito.

Kabilang din sa exempted sa odd-even scheme sa EDSA ang mga taxis, pampasaherong bus, mga authorized at marked government vehicles na may official plates na gamit para sa essential services gayundin ang mga electric at hybrid vehicles.

Hamon ng Pangulo sa mga kritiko, tingnan kung paano aabot hanggang sa susunod na tatlong taon o sa 2028 ang bente pesos na kada kilo ng bigas.

Ayon sa Chief Executive, nakahanap na sila ng paraan kung paano ito gagawin sa layuning ma-maintain ang nabanggit na programa.

Sinabi ng Pangulo na mayroon na aniya nilang nailatag na sistema ukol dito at kayang gawin hanggang 2028 ang murang bigas program ng pamahalaan.

—ulat mula kay Gilbert Perdez (Patrol 13)

 Inaasahang haharap sa plenaryo ng Senado sa Lunes ang labing-isang kongresista na miyembro ng panel of prosecutors sa isasagawang impeachment trial laban kay Vice President Sara Duterte.

Ayon kay Attorney Arnel Bañas, Deputy Secretary at spokesman ng Senado, ipababasa sa mga kongresista ang impeachment cases na kanilang isinampa laban sa Bise Presidente.

Sa ngayon, wala pa anyang natatanggap ang Senado na written confirmation na pupunta ang mga kongresista.

Pero may written acknowledgment na si House Speaker Martin Romualdez na natanggap nila sa Kamara ang sulat ni Senate President Chiz Escudero ukol sa gagawin sa Lunes.

Dagdag pa ni Attorney Bañas, na kailangang harapin ng congressmen-prosecutors sa Lunes dahil kailangan ito para masimulan ang impeachment trial.

 —ulat mula kay Cely Ortega-Bueno (Patrol 19)

Naresolba na ang huling kaso ng avian influenza sa Pilipinas.

Ito’y matapos ang matagumpay na pagsasagawa ng Bureau of Animal Industry ng depopulation, disposal, at disinfection sa huling lugar na may mga aktibong kaso.

Sa bagong datos ng B.A.I., nuong Abril a-trenta pa ang huling naitalang virus habang kasalukuyan ay wala na ring binabantayang bagong kaso ang ahensya.

—sa panulat ni Mark Terrence Molave

Ikinabahala ng ilang residente ang biglaang paglitaw ng isang babae sa isang imburnal sa Makati.

Ayon sa mga nakakita, agad na tumakbo palayo ang babae nang habulin ng mga security personnel.

Ipinagtaka naman ng mga otoridad kung paano ito nakapasok sa drainage matapos mapag-alamanang makipot lamang ang loob nito.

Sa kasalukuyan ay hindi pa rin malinaw kung sino ang naturang indibidwal at kung ano ang ginagawa nito sa loob ng imburnal.

Samantala, hinarangan na rin ang nasabing lugar upang hindi na ito muling pasukin ng mga tao.

—sa panulat ni Mark Terrence Molave

Makikinabang na rin sa programang bente pesos kada kilong bigas ng pamahalaan ang mga minimum wage earners.

Ito’y matapos tanggapin ng Department of Agriculture ang mungkahi ni Labor Secretary Bienvenido Laguesma na isama ang mga minimum wage workers sa subsidized rice program.

Aasahang magsisimula sa susunod na buwan ang pagbenta ng murang bigas sa mga kwalipikadong manggagawa.

Ayon kay Agriculture Secretary Francisco Tiu Laurel Junior, ang inisyatibang ito ay nakabatay rin sa direktiba ni Pangulong Ferdinand Marcos Jr. na palawakin pa ang programa sa mga Pilipinong higit na nangangailangan.

Sa kasalukuyan, tanging mga nasa vulnerable sector lamang ang bahagi ng programa kabilang ang mga indigent member ng 4Ps, solo parents, senior citizens, at persons with disabilities.

—sa panulat ni Mark Terrence Molave

Nanindigan si Pangulong Ferdinand Marcos Jr., na hindi siya magbibitiw sa pwesto kasunod ng panawagan na mag-resign siya dahil hindi umano ang gabinete ang problema, kundi siya mismo.

Ginawa ng presidente ang pahayag sa kapihan with the media sa sidelines ng ASEAN Summit sa Malaysia, sa gitna ng ikinakasang cabinet revamp ng pamahalaan.

Gayunman, iginiit mismo ni Pangulong Marcos na hindi siya tumatalikod sa problema.

Binigyang-diin ng pangulo na sumasalang sa masusing evaluation ang mga kalihim at iba pang opisyal ng pamahalaan upang matukoy kung nararapat pa silang manatili sa pwesto.

Matatandaang iginiit ng Palasyo na layunin ng panawagang courtesy resignation na mabigyan ng panahon ang pangulo upang suriin ang performance ng bawat kalihim at matukoy kung sino ang dapat manatili alinsunod sa mga bagong prayoridad ng administrasyon.