NATIONAL NEWS

Itinanggi ng Kamara ang pahayag ni senate President Francis “chiz” Escudero na hindi pa umano nito naaaprubahan ang panukalang batas na magtatakda ng mas mahabang termino para sa mga opisyal ng barangay at sangguniang kabataan.

Ayon kay Atty. Princess Abante, tagapagsalita ng Kamara, inaprubahan na ng mababang kapulungan sa ikatlo at pinal na pagbasa noong Lunes ang nasabing panukala at katunayan ay ipadadala na ito sa Senado.

Nakalulungkot anya na tila misinformed si Senador Escudero sa kaganapan sa Kamara.

Layunin ng Barangay Term bill na amyendahan ang local government code upang magtakda ng anim na taong fixed term para sa mga opisyal ng Barangay at SK, at isa sa mga pangunahing panukalang batas na binigyang-diin sa productivity report ng kamara kamakailan.

Binigyang-diin ni Abante na natapos na ng mababang kapulungan ang bahagi nito at sasalang na ang panukala sa deliberasyon ng Bicameral Conference Committee.

 Inatasan ni Pangulong Ferdinand Marcos Jr. ang local Water Utilities Administration na imbestigahan ang kawalan ng supply ng tubig sa ilang pampublikong paaralan sa bansa.

Kasunod ito ng ginawang pag-iinspeksyon ng pangulo sa dalawang paaralan sa bulacan kung saan napuna niya ang kondisyon ng mga palikuran na walang supply ng tubig.

Ayon kay Presidential Communications Office Undersecretary Claire Castro, binibigyan lamang ng 48 hours ng LWUA para magsumite ng report sa pangulo kaugnay sa problema.

Nais aniyang malaman ni Pangulong Marcos kung sino ang dapat na panagutin kung bakit walang water supply at kung paano ito maibabalik bago magsimula ang klase sa susunod na linggo.

Batid ng Palasyo na ang pamahalaan ay may pananagutan hindi lang sa mga mag-aaral kundi sa mga magulang na umaasa sa gobyerno.

Dagdag pa ni Usec. Castro, dapat matiyak ang maayos na pasilidad sa mga paaralan na pundasyon ng ligtas, epektibo, at maayos na edukasyon.

—ulat mula kay Gilbert Perdez (Patrol 13)

Sasailalim sa drug rehabilitation ang babaeng lumabas sa isang kanal sa Makati.

Ayon sa Department of Social Welfare and Development, batid ng kanilang social workers ang “occasional” na paggamit ng iligal na droga ni alyas Rose.

Dahil dito, tinututukan anya ang kaso ng babae upang matiyak kung may positibong pagbabago sa buhay nito ang mga natanggap na tulong mula sa ahensya.

Aminado si Pangulong Ferdinand Marcos Junior na nakasubaybay siya sa mga ganap sa senado hinggil sa impeachment case laban kay Vice President Sara Duterte.

Ayon kay Pangulong Marcos, isang senate function ang impeachment process kaya’t hinahayaan nya lamang si Senate President Chiz Escudero na pangunahan ang pagdedesisyun kaugnay sa impeachment proceedings.

Naniniwala din ang pangulo na hindi dapat maging isyu ang pagtawid ng impeachment  sa susunod na kongreso mula sa 19th congress dahil kahit simulan anya ngayon ang paglilitis ay malabo pa rin itong matapos bago pumasok ang mga bagong senador.

Naniniwala sa Senate President Chiz Escudero na hindi kasalanan ng senado ang kabiguang magtakda ng  Bicameral Conference Committee meeting para sa panukalang dagdag na sahod.

Ayon sa Lider ng senado, wala pa rin silang natatanggap na kopya ng 200 pesos daily minimum wage hike bill na ipinasa ng Kamara.

Dahil dito, hindi tiyak ni SP Escudero kung may mapagkakasunduan silang halaga gayong hindi pa nila nababasa ang  nilalaman ng panukala.

Binigyang-diin din ng Senate President na wala sa ledac priority bills ang panukala kaya’t hindi agad ito naihabol sa mga nakalipas na sesyon.

Mariing kinondena ng mga mambabatas sa huling pagdinig ng House Quad Committee ang pakikipagsabwatan umano ng ilang Pilipino sa mga criminal syndicate mula sa china upang makapasok sa bansa at dito gumawa ng krimen.

Ayon kay Quad Committee Co-Chair at House Committee on Dangerous Drugs Chairman Robert Ace Barbers ng Surigao Del Norte, tila binihag, isinaladlak sa dusa at ginahasa pa ng mga Tsino ang Pilipinas sa tulong na rin ng ilang Pinoy.

Ang imbestigasyon ay nakatuon sa koneksyon ng mga operasyon ng POGO sa human trafficking, drug smuggling, at mga extrajudicial killings sa kasagsagan ng madugong kampanya kontra-droga sa ilalim ng administrasyong Duterte.

Inilarawan ni Barbers ang mga natuklasan ng komite bilang halos hindi kapani-paniwala, na aniya’y mistulang pinagsamang “mafia, hollywood at james bond movies.”

Bagama’t may isang malinaw na kuwento na nagpapakita ng organisadong krimen sa pagitan ng mga chinese at mga kasabwat na Pilipino.

Isinisi naman ng Kongresista ang paglawak ng operasyon ng pogo sa bisa ng Executive Order 13, na ipinalabas sa ilalim ng administrasyong Duterte at nagbigay-daan sa paglawak ng offshore gaming sa ngalan ng umano’y economic growth.

Isa sa mga tinukoy ay si dating Bamban Mayor Alice Guo, na umano’y nabunyag bilang si Guo Hua Ping, na isang hinihinalang Chinese national na nakapasok sa political system gamit ang pekeng dokumento.

Aminado ang Department of Transportation na maaaring hindi sapat ang isang buwang pagpaplano para sa rehabilitasyon ng Edsa.

Ayon kay Transportation Secretary Vince Dizon, magiging mabagal ang proseso kung dadaanin sa tradisyunal na pamamaraan ang naturang pagpaplano.

Kasunod ito ng pansamantalang pagpapatigil ni Pangulong Ferdinand Marcos Jr. sa Edsa rebuild project upang hanapan ng mas mabilis at epektibong solusyon ang proyekto.

Samantala, ayon kay Public Works Secretary Manuel Bonoan, kailangang pag-aralan ang paggamit ng makabagong teknolohiya at materyales mula sa mga bansang may matagumpay na karanasan sa malalaking imprastraktura.

Magugunitang kinansela na rin ng metropolitan manila development authority ang dry-run ng odd-even traffic scheme na nakatakda sanang simulan sa Hunyo 16.