NATIONAL NEWS

Handa na ang Department of Migrant Workers para sa mass evacuation ng mga Overseas Filipinos sa Israel.

Sa gitna ito ng tumitinding bakbakan ng Iran at Israel na nagresulta na sa pagkamatay ng mahigit dalawandaan katao simula noong Biyernes.

Ayon kay Migrant Workers Secretary Hans Leo Cacdac, maingat nilang tinatansa ang sitwasyon kabilang ang air space para makarating sa tamang tiyempo.

Hinimok naman ng kalihim ang mga pamilya sa Pilipinas na i-check ang kanilang mga kamag-anak sa israel sa pamamagitan ng DMW hotlines.

May inorganisa anyang help desk na may hotlines na naka-post online simula pa noong June 14 o isang araw matapos maglunsad ng missile at airstrikes ang Israel sa Iran.

Aabot sa tatlumpung libong Pilipino ang naninirahan o nagtatrabaho sa Israel habang tatlumpu lamang sa Iran.

Kumpiyansa ang Department of Transportation na kakayaning matapos ang Edsa rebuild project sa loob lamang ng kalahating taon.

Ito ay sa pamamagitan ng pagkuha ng contractor na may karanasan na sa modernong teknolohiya.

Ayon kay Transportation Secretary Vince Dizon, nakita na niya ang mga proposal mula sa ilang contractor simula nang bigyan ni Pangulong Bongbong Marcos ang Department Of Public Works and Highways ng isang buwan para planuhing maigi ang rehabilitasyon.

Kailangan anyang pumili ng makabagong teknolohiya at hindi na pwede ang dating ginagawa na conventional na paraan o construction methodology.

Magsisimula sana ngayong buwan ang Edsa rehabilitation subalit umani ito ng batikos sa publiko, partikular ang odd-even scheme na maglilimita sa mga motorist na dumaan sa Edsa.

Pabor ang Department of Health sa mungkahing ipatupad ang 30 kilometer per hour speed limit sa mga lungsod upang mapigilan ang pagdami ng aksidente sa kalsada.

Kasunod ito ng ulat na pangunahing sanhi ng pagkamatay ng mga kabataang Pilipino edad 5 hanggang 29 ay ang aksidente.

Ayon kay Health Secretary Ted Herbosa, ito rin ang ikalimang pangunahing sanhi ng kamatayan sa Pilipinas, kasunod ng sakit sa puso, cancer, diabetes, at pulmonya.

Naniniwala ang DOH Chief na makatutulong ang pagpapatupad ng speed limit sa pagbaba ng kaso ng aksidente, tulad ng ipinatupad sa Commonwealth Avenue Sa Quezon City.

Nanawagan naman ang kagawaran ng mas mahigpit na pagpapatupad at pagsusuri sa mga umiiral na batas para matiyak ang kaligtasan sa daan.

Iginiit ni Kabataan Partylist Representative Raoul Manuel na hindi dapat palayain sa International Criminal Court detention center si dating Pangulong Rodrigo Duterte, kahit ito’y pansalamanta lamang.

Ayon sa Mambabatas, tila may bombang naghihintay na sasabog sa paglaya ng dating pangulo, na tiyak na magiging viral content material na gagamitin ng paid troll army.

Layon nito anya bully-hin, takutin, at sirain ang morale ng mga pamilya ng mga biktima ng extra judicial killings na nais lumahok sa proseso ng ICC.

Dahil dito, humirit si Representative Manuel sa malakanyang na huwag pairalin ang pag-iwas sa gulo dahil isang paraan ito ng pag-iwas sa hustisya.

Pinakakansela ni Transportation Secretary Vince Dizon ang lisensya ng nag-viral na taxi driver na naaktuhang naniningil ng mahigit sa isang-libong piso sa kanyang pasahero para sa biyahe mula NAIA Terminal III patungong Terminal 2.

Ayon sa mga pasahero, pinara nila ang taxi sa labas ng airport at napag-usapang gamitin ng driver ang metro nito.

Anila, umabot sa 1,1045-pesos ang kanilang binayaran kasama ang kaukulang toll gate fee.

Dipensa naman ng nagpakilalang manager ng operator ng taxi hub transport, wala silang ibinibigay na rate sa mga driver; at mahigpit anyang pinagbabawalan ng kumpanya ang mangontrata.

Kaugnay nito, kinumpirma naman ng DOTR na kanila nang natukoy ang sangkot na driver sa naturang labis na paniningil-pasahe at kung mapatunayang nangontrata ay tatanggalin anila sa trabaho.

—sa panulat ni Jasper Barleta

Pinasisibak na sa pwesto ang dalawang kawani ng Land Transportation Office – Region 2 matapos mahuling nanampal at nanadyak ng isang kinse-anyos na lalaki sa Tuguegarao, Cagayan.

Kinilala ang mga ito bilang sina Assistant Regional Director Manuel Baricaua at Chief Enforcer Charles Ursulum.

Ayon sa ulat, naganap ang nasabing pananakit matapos tumanggi ang isang babaeng singer na kasamahan ng biktima na lumapit sa mga opisyal.

Sinuspinde na si Baricaua bilang bahagi ng standard procedure ng LTO; samantalang ipinag-utos na rin ni Transportation Secretary Vince Dizon ang agarang pagpapatanggal sa puwesto ng dalawang sangkot na opisyal.

Nagpapatuloy ang imbestigasyon ng ahensya sa insidente na ngayon ay nakikipag-ugnayan na sa dalawang biktima para sa pagsasampa ng reklamo.

—sa panulat ni Jasper Barleta

Naniniwala ang isang ICC-Accredited Lawyer na sakaling pahihintulutan ng International Criminal Court ang interim release ni dating Pangulong Rodrigo Duterte ay isang bansa na malapit lang sa The Hague, Netherlands ang tatanggap sa kanya.

Ito ay matapos humirit ng interim release para sa dating pangulo ang mga abogado nito.

Kasabay nito, nilinaw ni Atty. Joel Ruiz Butuyan na kailangan ay member-country ng ICC ang tatatangap kay duterte at binigyang-diing kailangan nitong sumunod sa lahat ng utos at kondisyon ng ICC.

Kabilang na rito ang hindi pakikipag-ugnayan ni Duterte sa sinuman, maliban sa kanyang pamilya, at pagbabawal sa paggamit ng internet at cellphone.

Nabatid na nahaharap ang dating pangulo sa kasong crimes against humanity at kasalukuyang nasa kustodiya ng ICC dahil sa pagpapatupad ng war on drugs campaign sa ilalim ng kanyang administrasyon.

—sa panulat ni John Riz Calata