NATIONAL NEWS

Agarang tinulungan ng Department of Social Welfare and Development ang lalaking may autism na biktima ng pisikal na pang-aabuso sa loob ng isang pampasaherong bus sa San Jose Del Monte City, Bulacan.

Alinsunod sa utos ni DSWD Secretary Rex Gatchalian, nagsagawa ng home visit ang DSWD Field Office-3 para malaman ang kalagayan ng biktima.

Dahil dito, naisailalim na rin sa pagsusuri sa isang ospital ang biktima.

Bukod dito, nakikipagtulungan na rin ang ahensya sa lokal na pamahalaan para mabigyan ng psychosocial support at tulong pinansyal ang inabusong pasahero ng bus.

Tinutukoy rin ng DSWD ang posibleng ligal na tulong upang makapagsasampa ng kaso ang biktima laban sa salarin.

—sa panulat ni John Riz Calata

Kinumpirma ng Bacolod City Health Office na nakapagtala na sila ng unang kaso ng Mpox sa lungsod.

Ayon sa Bacolod-CHO, nasa stable na kalagayan na ang pasyente ng nasabing sakit at patuloy itong binabantayan sa isang health facility.

Sinabi ng CHO na katuwang ang Corazon Locsin Montelibano Memorial Regional Hospital, nag-activate na sila ng mga protocol para maayos na mapangasiwaan ang sitwasyon at patuloy na matiyak ang kaligtasan ng publiko.

Kasabay nito, siniguro ng bacolod city government na nakahanda na ang lahat ng mga inilatag nilang hakbang para matugunan ang pagkalat ng Mpox sa kanilang lugar.

Inaabisuhan na rin nila ang publiko na manatiling kalmado, maging malinis sa katawan, sundin ang mga health protocol, at magpakonsulta agad sa doktor kung may mga sintomas.

—sa panulat ni John Riz Calata

 Tiniyak ni Pangulong Ferdinand Marcos Jr. na ga-graduate ang mga kabataan bilang magagaling na estudyante.

Ito ang tiniyak ng Pangulo sa gitna ng pagsasagawa ng mga hakbang ng pamahalaan para ayusin ang mga kinakaharap na problema ng mga estudyante tulad ng  pagiging functionally illiterate.

Sinabi ng Presidente na hangad nila na kapag nakapag-graduate na ang mga kabataan ay marunong na ang mga itong magbasa, at nadadalian sa math at iba pang mga asignatura.

Dapat aniyang maging handa ang mga bata sa kolehiyo hanggang sa puntong magta-trabaho na ang mga ito at gagampanan na ang napiling career.

Una nang naglabas ang Philippine Statistics Authority ng datos, na nagsasabing milyun-milyong mag-aaral ang functionally illiterate o hindi nakauunawa sa binabasa.

—ulat mula kay Gilbert Perdez (Patrol 13)

Positibo ang pagtanggap ng publiko sa nakikitang presensiya ng mga pulis sa lansangan.

Ito ay ayon mismo kay Pangulong Ferdinand Marcos Jr. sa gitna ng kanyang pagnanais na palakasin pa ang police visibility sa pamamagitan ng cops on the beat.

Ayon sa pangulo, maganda ang pagtanggap ng mga tao sa nabanggit na hakbang, kasabay ng pagpapalakas pa ng pamahalaan sa aspeto ng seguridad at kaligtasan sa mga pampublikong lugar.

Nakararamdam aniya ng kapanatagan ang mga pilipino, base sa mismong testimonya ng mga ito.

Nais din ni Pangulong Marcos na palakasin ang pagresponde ng mga pulis sa pamamagitan ng pagpapatupad ng three-minutes police response na isinusulong ng bagong liderato ng Philippine National Police.

—ulat mula kay Gilbert Perdez (Patrol 13)

Nagsumite ng motion for clarification sa senate impeachment court ang house prosecution team.

Ito ang sinabi ni Batangas Rep. Gerville Luistro, isa sa 11-man prosecution panel sa ginanap na media presscon sa Kamara.

Bukod kay Rep. Luistro, humarap din sa media sina Congressmen Joel Chua, Bel Zamora, Marcelino Libanan, Romeo Acop, Jill Bongalon, Rodge Gutierrez at Jonathan Keith Flores habang hindi naman nakadalo si Iloilo Rep. Lawrence Defensor.

Ayon sa house prosecution panel, nalalabuan sila sa utos ng senate impeachment court na i-remand o ibalik ang articles of impeachment sa kamara.

Nilinaw ni Congresswoman Luistro na hindi nila sinusuway ang senate impeachment court at gusto lamang nila na makakuha ng clarification.

Sa usapin naman kung magpapasaklolo ang prosecution panel sa korte suprema, sinabi ni Luistro na maaga pa para ito ay kanilang ikunsidera.

—sa panulat ni John Riz Calata

Naniniwala si incoming Akbayan Partylist Rep. Chel Diokno na pag-abandona sa saligang batas ang pagpapabalik ng senado ng articles of impeachment laban kay Vice President Sara Duterte sa Kamara .

Ayon kay Atty. Diokno, isa sa magsisilbing house prosecutor sa 20th Congress, malinaw na nakasaad sa konstitusyon na kapag na-transmit na ang articles of impeachment na nilagdaan ng 1/3 ng bilang ng mga miyembro ng kamara, walang ibang dapat gawin kundi agarang ikasa ang paglilitis.

Binigyang-diin din ng incoming representative na ang konstitusyon ay hindi lamang “papel” Kundi “utos ng bayan” at hindi maaaring basta-basta na lamang ibasura o balewalain.

Kataka-taka rin aniya kung bakit kailangan pa ng senado ng certification sa articles of impeachment gayong ang pagbibigay nito sa senado ay sertipikasyon na ng kamara.

Sinabi rin ni Atty. Diokno na hindi pa dapat ituring na patay ang impeachment case laban kay VP Sara, dahil mismong si Senate President Francis “Chiz” Escudero ang nagsabi na hindi naman dinismiss ang kaso.

—sa panulat ni John Riz Calata

Naniniwala ang house prosecution team na nilabag ng senado ang konstitusyon at tiwala ng publiko kaugnay sa usaping impeachment trial ni Vice President Sara Duterte.

Ito ang sinabi ni Iloilo Rep. Lorenz Defensor, isa sa mga miyembro ng 11-man prosecutor, matapos ibalik ng senado ang articles of impeachment sa kamara.

Iginiit ni Rep. Defensor na hindi option ang i-remand ang impeachment ng bise presidente dahil malinaw aniya ito na pagsagasa sa saligang batas.

Binigyang-diin ng mambabatas na ang dapat na naging hakbang o aksyon ng senado ay ang i-acquit o i-convict ang akusado.

—sa panulat ni John Riz Calata