NATIONAL NEWS

Iginiit ni Akbayan Partylist Rep. Perci Cendaña na hindi nirespeto ng Senado ang konstitusyon sa ginawang botohan ng senator-judges para ibalik sa kamara ang articles of impeachment laban kay Vice President Sara Duterte.

Nabatid na napatibay ng Senado ang desisyong ibalik ang articles of impeachment sa kamara matapos itong paboran ng labing-walong senador, habang lima naman ang hindi sumang-ayon, dahilan upang hindi matuloy ang pagbasa ng house prosecution panel sa nasabing artikulo.

Aminado si Rep. Cendaña na nadismaya siya matapos piliin ng karamihan sa mga senator-judges na magpakaduwag at itakwil ang kanilang sinumpaang tungkulin.

Ikinalungkot rin ng mambabatas ang pagkasira sa inaasahan ng taumbayan na makita ang katapangan ng mga senador na tumatayo bilang senate impeachment court.

—sa panulat ni John Riz Calata

Nasa kamay pa rin ng impeachment court ang hurisdiksyon sa impeachment trial laban kay Vice President Sara Duterte.

Ito ang nilinaw ni Senate President Francis ‘Chiz’ Escudero, sa kabila ng utos ng senate impeachment court na ibalik sa prosecution o kamara ang articles of impeachment upang tiyakin na ito ay tumatalima sa probisyon ng saligang batas na one-year ban, at makapaglabas ng resolusyon na itutuloy ng 20th Congress ang impeachment laban sa bise presidente.

Sinabi rin ni Senate President Escudero na malinaw rin sa mosyon na hindi pinadi-dismiss o pinate-terminate ang impeachment complaint laban sa pangalawang pangulo.

Naniniwala ang lider ng senado na mayroon silang hurisdiksyon kaya sila nakapag-isyu ng summon kay VP Sara

Sa ngayon aniya, wala pang aksyon na pwedeng gawin ang impeachment court at hihintayin muna nila ang compliance ng prosecution at ang sagot ng panig ng bise presidente sa ipinadalang writ of summon.

—sa panulat ni John Riz Calata

Iginiit ni Senate President Francis ‘Chiz’ Escudero na hindi maaaring tanggihan ng Kamara ang desisyon ng senado na ibalik sa kanila ang articles of impeachment laban kay Vice President Sara Duterte.

Ayon kay SP Escudero, sa ngayon, hindi pantay ang kanilang estado sa kamara dahil ang senado aniya ay tumatayo bilang impeachment court habang ang kamara naman ay ang prosecutor kaya maaaring utusan ang mga ito ng Senado.

Dahil dito, dapat aniyang tumalima ang mga kongresista sa kautusan ng mataas na kapulungan ng Kongreso.

Sinagot naman ni Senate President Escudero ang pahayag ng ilang constitutionalist na hindi trabaho ng senado bilang  impeachment court na kwestyunin kung dumaan sa tamang proseso ang impeachment case laban sa bise presidente.

Sinabi ng lider ng senado na hindi ito ipinagbabawal sa kanilang rules kaya bilang presiding officer, hindi niya pwedeng pagbawalan ang sino mang senator-judge na maghain ng mosyon.

—sa panulat ni John Riz Calata

Tutol ang Department of Justice sa direktiba ni Philippine National Police Chief General Nicolas Torre III sa mga pulis na magparamihan sa mga mahuhuling kriminal.

Sinabi ng DOJ na matagal nang tinututulan ni Justice Secretary Jesus Crispin ‘Boying’ Remulla ang nasabing kautusan dahil maaari aniya itong maabuso, sa paraan ng pagtatanim ng ebidensya.

Posible rin aniyang mapilitan na manghuli ang mga pulis para sa accomplishment at promosyon.

Gayunman, ayon sa DOJ, buo ang tiwala nila sa kakayahan ni gen. Torre at susuporta sila sa mga layunin ng bagong PNP Chief sa masugpo ang kriminalidad.

Bagamat, dapat ay naaayon anila sa batas at tanging mga may kasalanan lamang ang mga aarestuhin ng mga otoridad.

—sa panulat ni John Riz Calata

Kinwestyon ni Senator-Elect Vicente “Tito” Sotto III ang mosyon ng senado na ibalik sa kamara ang articles of impeachment laban kay Vice President Sara Duterte.

Ayon sa dating Senate President, hindi kinakailangang i-remand sa mga kongresista ng 19th Congress ang kaso ng impeachment dahil ang mga ito aniya ang naghain nito.

Aniya, mas angkop kung ipina-ratify na lamang ng impeachment court sa mga kongresista ng 19th Congress ang articles of impeachment.

Naniniwala rin si Senator-Elect Sotto na ang mga kongresista ng 20th Congress ang nararapat na tanungin kaugnay sa inihaing impeachment.

Binigyang-diin ng dating Senate President na mas nakatataas ang konstitusyon kaysa sa plenaryo ng Senado at ang Korte Suprema lamang ang ang makapagsasabi kung unconstitutional ang isang gawain – hindi ang impeachment court at hindi ang Senado.

Nabatid na nag-mosyon si Sen. Ronald ‘Bato’ Dela Rosa na i-dismiss ang impeachment case ni VP Sara dahil sa sinasabing “constitutional infirmities”.

—sa panulat ni John Riz Calata

 Pinatawan ng parusa ng Land Transportation Office ang 32 driving schools sa Metro Manila at Central Luzon.

Ayon kay LTO Chief Atty. Vigor Mendoza II, 17 driving schools at 7 driving instructors ang naparusahan sa Central Luzon.

Habang 15 driving schools naman ang nahuling lumabag sa Metro Manila.

Kabilang sa mga nasabing paglabag ang pag-isyu ng driving courses certificates sa mga estudyante kahit hindi pa natatapos ang kinakailangang oras ng training o kahit hindi pa ito nagpapakita sa klase.

Dahil dito, haharap sa suspensyon ng hanggang anim na buwan at multang aabot sa isang milyong piso ang mga sangkot na paaralan.

—sa panulat ni Mark Terrence Molave

 Tagumpay para kay Senator-Judge Ronald “bato” Dela Rosa ang naging pasya ng mayorya ng mga senador na ibalik sa kamara ang articles of impeachment laban kay Vice President Sara Duterte.

Ikinatuwa ni Senator Bato ang pagsasang-ayon ng iba pang senator-judges sa kanyang privilege speech na sinasabing constitutionally infirm ang inihain na articles of impeachment sa Senado.

Dagdag pa ng Senador, malinaw na halos katumbas na ng dismissal ng kaso ang naging desisyon ng Senado gayong duda rin siya na mapapatunayan ng kamara na wala silang paglabag sa one-year ban rule.

Maliban dito, kailangan din anyang alamin ng kamara kung interesado pa rin ang 20th Congress na ipagpatuloy ang impeachment case laban sa bise presidente.

—sa panulat ni Mark Terrence Molave

Umapela si Cardinal Pablo Virgilio David, Pangulo ng Catholic Bishops’ Conference of the Philippines sa Senado na panindigan ang responsibilidad nito sa pagtugon sa mga impeachment complaints na inihain laban kay Vice President Sara Duterte.

Ayon kay Bishop Ambo, hindi siya nagsasalita sa pangalan ng anumang grupo o interes sa pulitika pero mula sa pananaw ng simbahan na nananawagan para sa moral responsibility, accountability at ang kahalagahan ng kabutihan ng lahat.

Inilarawan ni David ang papel ng senado sa impeachment proceedings bilang isang “seryosong mandato” na nagsasabing hindi ito usapin ng kaginhawaan sa pulitika bagkus isang mahalagang tungkulin na nakaugat sa katotohanan at katarungan.

Nanawagan din si Cardinal David sa lahat ng senador lalo na sa mga nasa liderato na payagan ang constitutional process na magpatuloy nang walang hadlang.

Iginiit ni Bishop Ambo na kung walang itinatago ay walang dapat ikatakot.