NATIONAL NEWS

 Tiniyak ni Pangulong Ferdinand Marcos Jr. na ga-graduate ang mga kabataan bilang magagaling na estudyante.

Ito ang tiniyak ng Pangulo sa gitna ng pagsasagawa ng mga hakbang ng pamahalaan para ayusin ang mga kinakaharap na problema ng mga estudyante tulad ng  pagiging functionally illiterate.

Sinabi ng Presidente na hangad nila na kapag nakapag-graduate na ang mga kabataan ay marunong na ang mga itong magbasa, at nadadalian sa math at iba pang mga asignatura.

Dapat aniyang maging handa ang mga bata sa kolehiyo hanggang sa puntong magta-trabaho na ang mga ito at gagampanan na ang napiling career.

Una nang naglabas ang Philippine Statistics Authority ng datos, na nagsasabing milyun-milyong mag-aaral ang functionally illiterate o hindi nakauunawa sa binabasa.

—ulat mula kay Gilbert Perdez (Patrol 13)

Positibo ang pagtanggap ng publiko sa nakikitang presensiya ng mga pulis sa lansangan.

Ito ay ayon mismo kay Pangulong Ferdinand Marcos Jr. sa gitna ng kanyang pagnanais na palakasin pa ang police visibility sa pamamagitan ng cops on the beat.

Ayon sa pangulo, maganda ang pagtanggap ng mga tao sa nabanggit na hakbang, kasabay ng pagpapalakas pa ng pamahalaan sa aspeto ng seguridad at kaligtasan sa mga pampublikong lugar.

Nakararamdam aniya ng kapanatagan ang mga pilipino, base sa mismong testimonya ng mga ito.

Nais din ni Pangulong Marcos na palakasin ang pagresponde ng mga pulis sa pamamagitan ng pagpapatupad ng three-minutes police response na isinusulong ng bagong liderato ng Philippine National Police.

—ulat mula kay Gilbert Perdez (Patrol 13)

Nagsumite ng motion for clarification sa senate impeachment court ang house prosecution team.

Ito ang sinabi ni Batangas Rep. Gerville Luistro, isa sa 11-man prosecution panel sa ginanap na media presscon sa Kamara.

Bukod kay Rep. Luistro, humarap din sa media sina Congressmen Joel Chua, Bel Zamora, Marcelino Libanan, Romeo Acop, Jill Bongalon, Rodge Gutierrez at Jonathan Keith Flores habang hindi naman nakadalo si Iloilo Rep. Lawrence Defensor.

Ayon sa house prosecution panel, nalalabuan sila sa utos ng senate impeachment court na i-remand o ibalik ang articles of impeachment sa kamara.

Nilinaw ni Congresswoman Luistro na hindi nila sinusuway ang senate impeachment court at gusto lamang nila na makakuha ng clarification.

Sa usapin naman kung magpapasaklolo ang prosecution panel sa korte suprema, sinabi ni Luistro na maaga pa para ito ay kanilang ikunsidera.

—sa panulat ni John Riz Calata

Naniniwala si incoming Akbayan Partylist Rep. Chel Diokno na pag-abandona sa saligang batas ang pagpapabalik ng senado ng articles of impeachment laban kay Vice President Sara Duterte sa Kamara .

Ayon kay Atty. Diokno, isa sa magsisilbing house prosecutor sa 20th Congress, malinaw na nakasaad sa konstitusyon na kapag na-transmit na ang articles of impeachment na nilagdaan ng 1/3 ng bilang ng mga miyembro ng kamara, walang ibang dapat gawin kundi agarang ikasa ang paglilitis.

Binigyang-diin din ng incoming representative na ang konstitusyon ay hindi lamang “papel” Kundi “utos ng bayan” at hindi maaaring basta-basta na lamang ibasura o balewalain.

Kataka-taka rin aniya kung bakit kailangan pa ng senado ng certification sa articles of impeachment gayong ang pagbibigay nito sa senado ay sertipikasyon na ng kamara.

Sinabi rin ni Atty. Diokno na hindi pa dapat ituring na patay ang impeachment case laban kay VP Sara, dahil mismong si Senate President Francis “Chiz” Escudero ang nagsabi na hindi naman dinismiss ang kaso.

—sa panulat ni John Riz Calata

Naniniwala ang house prosecution team na nilabag ng senado ang konstitusyon at tiwala ng publiko kaugnay sa usaping impeachment trial ni Vice President Sara Duterte.

Ito ang sinabi ni Iloilo Rep. Lorenz Defensor, isa sa mga miyembro ng 11-man prosecutor, matapos ibalik ng senado ang articles of impeachment sa kamara.

Iginiit ni Rep. Defensor na hindi option ang i-remand ang impeachment ng bise presidente dahil malinaw aniya ito na pagsagasa sa saligang batas.

Binigyang-diin ng mambabatas na ang dapat na naging hakbang o aksyon ng senado ay ang i-acquit o i-convict ang akusado.

—sa panulat ni John Riz Calata

Iginiit ni Akbayan Partylist Rep. Perci Cendaña na hindi nirespeto ng Senado ang konstitusyon sa ginawang botohan ng senator-judges para ibalik sa kamara ang articles of impeachment laban kay Vice President Sara Duterte.

Nabatid na napatibay ng Senado ang desisyong ibalik ang articles of impeachment sa kamara matapos itong paboran ng labing-walong senador, habang lima naman ang hindi sumang-ayon, dahilan upang hindi matuloy ang pagbasa ng house prosecution panel sa nasabing artikulo.

Aminado si Rep. Cendaña na nadismaya siya matapos piliin ng karamihan sa mga senator-judges na magpakaduwag at itakwil ang kanilang sinumpaang tungkulin.

Ikinalungkot rin ng mambabatas ang pagkasira sa inaasahan ng taumbayan na makita ang katapangan ng mga senador na tumatayo bilang senate impeachment court.

—sa panulat ni John Riz Calata

Nasa kamay pa rin ng impeachment court ang hurisdiksyon sa impeachment trial laban kay Vice President Sara Duterte.

Ito ang nilinaw ni Senate President Francis ‘Chiz’ Escudero, sa kabila ng utos ng senate impeachment court na ibalik sa prosecution o kamara ang articles of impeachment upang tiyakin na ito ay tumatalima sa probisyon ng saligang batas na one-year ban, at makapaglabas ng resolusyon na itutuloy ng 20th Congress ang impeachment laban sa bise presidente.

Sinabi rin ni Senate President Escudero na malinaw rin sa mosyon na hindi pinadi-dismiss o pinate-terminate ang impeachment complaint laban sa pangalawang pangulo.

Naniniwala ang lider ng senado na mayroon silang hurisdiksyon kaya sila nakapag-isyu ng summon kay VP Sara

Sa ngayon aniya, wala pang aksyon na pwedeng gawin ang impeachment court at hihintayin muna nila ang compliance ng prosecution at ang sagot ng panig ng bise presidente sa ipinadalang writ of summon.

—sa panulat ni John Riz Calata

Iginiit ni Senate President Francis ‘Chiz’ Escudero na hindi maaaring tanggihan ng Kamara ang desisyon ng senado na ibalik sa kanila ang articles of impeachment laban kay Vice President Sara Duterte.

Ayon kay SP Escudero, sa ngayon, hindi pantay ang kanilang estado sa kamara dahil ang senado aniya ay tumatayo bilang impeachment court habang ang kamara naman ay ang prosecutor kaya maaaring utusan ang mga ito ng Senado.

Dahil dito, dapat aniyang tumalima ang mga kongresista sa kautusan ng mataas na kapulungan ng Kongreso.

Sinagot naman ni Senate President Escudero ang pahayag ng ilang constitutionalist na hindi trabaho ng senado bilang  impeachment court na kwestyunin kung dumaan sa tamang proseso ang impeachment case laban sa bise presidente.

Sinabi ng lider ng senado na hindi ito ipinagbabawal sa kanilang rules kaya bilang presiding officer, hindi niya pwedeng pagbawalan ang sino mang senator-judge na maghain ng mosyon.

—sa panulat ni John Riz Calata

Tutol ang Department of Justice sa direktiba ni Philippine National Police Chief General Nicolas Torre III sa mga pulis na magparamihan sa mga mahuhuling kriminal.

Sinabi ng DOJ na matagal nang tinututulan ni Justice Secretary Jesus Crispin ‘Boying’ Remulla ang nasabing kautusan dahil maaari aniya itong maabuso, sa paraan ng pagtatanim ng ebidensya.

Posible rin aniyang mapilitan na manghuli ang mga pulis para sa accomplishment at promosyon.

Gayunman, ayon sa DOJ, buo ang tiwala nila sa kakayahan ni gen. Torre at susuporta sila sa mga layunin ng bagong PNP Chief sa masugpo ang kriminalidad.

Bagamat, dapat ay naaayon anila sa batas at tanging mga may kasalanan lamang ang mga aarestuhin ng mga otoridad.

—sa panulat ni John Riz Calata

Kinwestyon ni Senator-Elect Vicente “Tito” Sotto III ang mosyon ng senado na ibalik sa kamara ang articles of impeachment laban kay Vice President Sara Duterte.

Ayon sa dating Senate President, hindi kinakailangang i-remand sa mga kongresista ng 19th Congress ang kaso ng impeachment dahil ang mga ito aniya ang naghain nito.

Aniya, mas angkop kung ipina-ratify na lamang ng impeachment court sa mga kongresista ng 19th Congress ang articles of impeachment.

Naniniwala rin si Senator-Elect Sotto na ang mga kongresista ng 20th Congress ang nararapat na tanungin kaugnay sa inihaing impeachment.

Binigyang-diin ng dating Senate President na mas nakatataas ang konstitusyon kaysa sa plenaryo ng Senado at ang Korte Suprema lamang ang ang makapagsasabi kung unconstitutional ang isang gawain – hindi ang impeachment court at hindi ang Senado.

Nabatid na nag-mosyon si Sen. Ronald ‘Bato’ Dela Rosa na i-dismiss ang impeachment case ni VP Sara dahil sa sinasabing “constitutional infirmities”.

—sa panulat ni John Riz Calata