NATIONAL NEWS

Iginiit ni outgoing Senate Minority Leader Aquilino ‘Koko’ Pimentel III na dapat ay ‘hands off’ o hindi dapat makialam si Pangulong Ferdinand Marcos Jr. sa impeachment  case  ni Vice President Sara Duterte.

Ayon kay Senador Pimentel, alinsunod sa ilalim ng  Article 11 ng konstitusyon, patungkol sa impeachment at accountability ng public officials, walang nakasaad na may gagampanang papel ang pangulo sa impeachment process dahil siya mismo ay impeachable official.

Kaya naman hirit ng senador, huwag nang mamagitan ang pangulo sa banggaan ng senado at kamara kaugnay ng impeachment process.

Tama anya na hindi nagbibigay ng anumang  pahayag si Pangulong Marcos at kung meron man, wala dapat aniya itong mabigat na impluwensya sa mga senator-judges.

—ulat mula kay Cely Ortega-Bueno (Patrol 19)

Muling ibinabala ni Philippine National Police Chief General Nicolas Torre III na kanyang sisibakin ang mga pulis na bigong magbawas ng timbang sa loob ng isang taon.

Ayon kay Gen. Torre, ang hakbang na ito ay alinsunod sa section 30 ng Republic Act no. 6975 na nagsasabing ang mga miyembro at opisyal ng PNP ay hindi dapat kumulang o lumagpas ng limang kilo mula sa itinakdang standard weight para sa mga pulis, base sa kanilang tangkad, edad, at kasarian nito.

Sinabi ng Hepe ng pambansang pulisya na ang sinumang pulis na hindi makakasunod sa standard weight ay bibigyan ng anim hanggang isang taon para ma-normalize ang timbang nito.

Habang ang mga pulis naman na may medical conditions ay posibleng maharap sa “complete disability discharge” o ilipat sa administrative work.

Nauna nang ipinag-utos ni Gen. Marbil sa mga pulis na panatilihin ang malusog na pangangatawan dahil posible itong makaapekto sa kanilang promosyon.

—sa panulat ni John Riz Calata

Binanatan ni Vice President Sara Duterte ang mga business groups na kumakalampag sa Senado upang agad nang simulan ang impeachment trial laban sa kanya upang maipakita anila ang accountability at rule of law sa bansa.

Ayon kay VP Sara, mayroon man o walang impeachment ay wala na talagang investor confidence kaya huwag aniya siyang gawing rason sa pangit na takbo ng ekonomiya ng Pilipinas.

Hinamon din ng Bise Presidente ang mga business group na kung nais ng mga ito ng accountability, magsampa ang mga ito ng kaso sa mga korte.

Nabatid na kamakailan lamang ay naglabas ng magkakahiwalay na pahayag ang Makati Business Club, Financial Executives of the Philippines, at iba pang business groups na nagsasabing ang pagtanggi ng senado na ipagpatuloy ang impeachment trial ni VP Sara ay makaaapekto sa ekonomiya ng bansa.

Irerekomenda ni House Deputy Minority Leader at Act Teacher’s Partylist Rep. France Castro sa kongreso na imbestigahan ang matagal nang problema sa mga pampublikong paaralan.

Ito’y matapos ang ikinasang “bisita-eskuwela” initiative ng grupo sa iba’t ibang paaralan sa Metro Manila kasabay ng muling pagbubukas ng klase kahapon.

Ayon kay Rep. Castro, magsasagawa sila ng konsultasyon sa mga school administrators; faculty at staff tungkol sa mga isyung kinakaharap ng public schools.

Sisiyasatin din nila ang kakulangan ng mga classroom bunsod ng pagsisiksikan ng mga estudyante; shifting sa class schedules; at implementasyon ng blended learning.

Kaugnay nito, makakatulong din anya ang kanilang pagbisita sa mga paaralan upang makakuha ng mga impormasyon na magiging parte ng legislative agenda ng Act Teachers sa 20th Congress.

—sa panulat ni Mark Terrence Molave—ulat mula kay Geli Mendez (Patrol 30)

Mariing itinanggi ni Senador Joel Villanueva ang paratang ng kamara na ayaw makipag-usap ng Senado sa mga Kongresista hinggil sa panukalang dagdag na sahod.

Paglilinaw ni Senador Villanueva, nakipag-usap siya kasama si Senate President Chiz Escudero sa house conferees na kinabibilangan nina Representatives Arlene Brosas, Democrito Mendoza, at Jolo Revilla para muling i-apela ang kahilingang i-adopt na lamang ng kamara ang 100 pesos daily minimum wage hike bill ng Senado.

Ngunit sa huling araw anya ng sesyon nuong Hunyo 11, nalaman na lamang nila na nireject ni House Committee on Labor Chairman Juan Fidel Nograles ang apela ng senado.

Iginiit din ng Senador na matapos maaprubahan ng kamara nuong Hunyo 5 ang bersyon ng panukala ng kamara, hindi nito agad isinumite sa Senado ang kopya ng naaprubahang bill kaya’t hindi na ito na-aral pa ng mga senador bago magtapos ang 19th Congress.

—sa panulat ni Mark Terrence Molave

Pinag-aaralan na ng Department of Transportation ang panawagan ng Department of Health at ilang grupo na magpatupad ng 30 kilometer speed limit sa mga urban areas.

Ayon kay Transportations Secretary Vince Dizon, bagaman mabagal ang iminumungkahing speed limit at maaaring makaapekto sa oras ng biyahe, bukas sila sa anumang mga panukala.

Nais anya nilang balansehin ang kaligtasan at kaginhawaan ng mga pasahero at motorista.

Magugunitang kinatigan ni Health Secretary Ted Herbosa na magpatupad ng speed limit upang maiwasan ang mga aksidente sa kalsada na kabilang sa mga pangunahing sanhi ng kamatayan ng mga Pilipinong edad 5 hanggang 29.

Nanawagan ang isang Ekonomistang Mambabatas para sa mas matatag na preparasyon ng ekonomiya ng Pilipinas sa gitna nang posibleng epekto sa mundo ng bakbakan ng Israel at Iran.

Ayon kay Albay 2nd District Rep. Joey Salceda, Chairman ng House Committee on Ways and Means, namemeligrong maapektuhan ang presyo at supply ng krudo, exchange rate, labor market at import costs na pangunahing nagpapatakbo sa ekonomiya ng Pilipinas.

Dapat anyang ikunsidera ang mga ganitong scenario lalo’t isinasapinal na ng mga ahensya ang kanilang 2026 budget proposals.

Ibinabala rin ng mambabatas na ang anumang disruption sa Strait of Hormuz, na daanan ng dalawampung porsyentong oil supply sa mundo, ay lubhang maka-aapekto sa presyo ng inaangkat na krudo ng Pilipinas.

Kagaya ng inaasahan, sinalubong ng mga karaniwang problema ang ilang paaralan, lalo sa Metro Manila ngayong unang araw ng balik-eskwela.

Halimbawa na lamang nito sa President Corazon Aquino Elementary School (PCAES) isa sa mga may pinaka-malaking populasyon ng mga mag-aaral sa Quezon City.

Ayon kay PCAES Principal Gerry Isip, nasa walong libo limandaang estudyante ang nag-enroll para sa academic year 2025–2026.

Gayunman, nananatili anyang hamon ang espasyo partikular sa mga silid-aralan ng grades 1 hanggang 3, na mayroong 35 hanggang 38 mag-aaral bawat section.

Para mapangasiwaan ang volume ng mga estudyante, kailangang magpatupad ng morning at afternoon class shifts.

Umaasa naman si Isip na makapagpapatayo pa ng karagdagang mga gusali upang ma-decongest ang bilang ng mga mag-aaral kada classroom.