NATIONAL NEWS

Bumwelta ang palasyo sa pahayag ni Vice President Sara Duterte kaugnay ng lumolobong utang ng Pilipinas.

Nabatid na sa isang rally sa australia, kinwestyon ni VP Sara ang mahigit labing-anim na trilyong utang ng bansa at sinabing hindi naman nararamdaman ng publiko kung saan napupunta ang inuutang.

Sa press briefing sa Malacañang, iginiit ni Palace Press Officer Claire Castro na hindi lamang sa kasalukuyang administrasyon nag-ugat ang naturang utang.

Anya, as of June 2022 bago maupo si Pangulong Ferdinand Marcos Jr. sa pwesto, nasa 12.79 trillion pesos na ang utang na iniwan ng Duterte administration.

Kung saan, umabot anya sa 6.83 trilyon ang inutang sa panahon ni dating Pangulong Rodrigo Duterte, katumbas ng 115.1% na pagtaas kumpara sa mga naunang administrasyon.

Balak sampahan ng kaso ng isang convenience store ang content creator na si Vivian Bravo Vinuya matapos siyang mag-viral sa social media dahil sa pagpasok at paghiga nito sa loob ng store freezer na may lamang mga tube ice.

Ginamit ni Vinuya ang video bilang content para sa kanyang vlog, ngunit agad itong binatikos ng publiko dahil sa hindi tamang pagtrato sa kagamitan ng tindahan.

Tinawag ng Alfamart ang insidente bilang hindi otorisado at mapanganib, at magsasagawa rin sila anila ng imbestigasyon ukol sa insidente.

Bilang tugon, agad tinanggal ng kumpanya ang lahat ng ice products, nilinis at sanitize ang naturang freezer, at pinalitan ang mga tube ice para matiyak ang kalinisan at kaligtasan ng mga customer.

Ayon sa pamunuan ng convenience store, itutuloy nila ang legal na aksyon upang mapanatili ang integridad ng kanilang brand at upang hindi na maulit pa ang ganitong uri ng paglabag.

Pursigido si Department of the Interior and Local Government Secretary Jonvic Remulla na pabilisin pa ang pagtugon ng mga pulis sa mga krimen at emergency situations.

Kaya naman, sinabi ni Secretary Remulla na isinulong nya sa NCR Regional Peace and Order Council Meeting ang “Buy one, get one” System sa local Government Units sa Metro Manila sa pagbili ng police vehicles.

Inamin din ni Secretary Remulla ang malaking kakulangan sa bilang ng police vehicles sa Metro Manila.

Bukod sa patrol cars, ipinabatid ni Secretary Remulla na bibili ang DILG ng mas maraming police motorcycles at maliliit na fire trucks upang mas madaling makapasok sa mga masisikip na lugar sa mga lungsod.

Una nang nangako si Secretary Remulla na magdaragdag pa ng mga patrol vehicle bilang tugon sa direktiba ni PNP Chief Gen. Nicolas Torre III na 5 minute response policy sa mga tawag para sa tulong o emergency.

Nagpaalala ang Maynilad Water Services sa mga customer nito sa ilang lugar sa metro manila ukol sa naka-iskedyul na maintenance activities ngayong linggo na maaaring magdulot ng pansamantalang water interruption sa ilang barangay.

Ayon sa maynilad, isasagawa ang mga network maintenance at diagnostic leak localization mula ngayong araw hanggang sa katapusan ng buwan ng Hunyo.

Mararanasan ang water interruption sa mga piling lugar sa Caloocan, Maynila, Malabon, Quezon City, at Valenzuela.

Isasagawa ang naturang aktibidad mula alas diyes ng gabi hanggang ala-sais ng umaga upang mabawasan ang abala sa mga residente.

Para naman sa buong listahan ng lahat ng apektadong barangay, maaaring bisitahin ang official Facebook page ng Maynilad Water Service Incorporated.

Naghain ng reklamo ang mahigit isandaan na inabuso sa online lending applications.

Ayon sa Presidential Anti-Organized Crime Commission, nagtungo sa kanilang tanggapan ang mga biktimang nakaranas ng pagbabanta o pananakot mula sa mga online lending applications (OLA) upang magsumite ng kanilang sinumpaang salaysay.

Iligal na ginagamit anya ng mga OLA kabilang ang public shaming, doxing, coercive messaging, at pagbabanta, ay malinaw na paglabag sa data privacy, lending regulations, at human dignity.

Dagdag pa ng PAOCC, na mas malinaw na maraming Pilipino ang nagpapasya na ipaglaban ang kanilang mga karapatan at labanan ang pang-aabuso.

Sa ngayon, mayroon nang mahigit isandaang pormal na reklamo at posible pang madagdagan ito.

Nilinaw ng Philippine National Police na walang inaprubahang Fitness Instructor si PNP Chief General Nicolas Torre III para manguna sa anumang physical fitness program ng organisason.

Ito ay kasunod ng pagdalo ng Fitness Vlogger na si Rendon Labrador sa “93 weight loss challenge” ng Public Community Affairs and Development Group kamakailan.

Ayon sa memo ni PMGen. Roderick Augustus Alba ng Directorate for Police Community Relations, inisyatibo lamang ito ng PCADG at hindi saklaw ng buong PNP.

Pinatitigil din ang pagpapakalat ng maling impormasyon kaugnay dito, dahil walang direktibang ibinigay ang PNP Chief na magtalaga ng opisyal na fitness coach.

Wala ring kaalaman si PNP Spokesperson PBGen. Jean Fajardo sa sinasabing papel ni Labrador bilang Fitness Coach ng PNP.

Hindi pa handa ang Pilipinas sa kahit anong digmaan dahil kulang sa direksyon ang administrasyon ni President Ferdinand Marcos Jr.

Ito ang sinabi ni Vice President Sara Duterte sa isinagawang “Free Duterte Now” Rally sa Melbourne, Australia, kung saan umapela ang bise presidente ng tulong sa kanyang mga taga-suporta sa pagpapalaya sa amang si dating Pangulong Rodrigo Duterte na nakakulong ngayon sa The Hague, Netherlands.

Inihayag din ni VP sara ang kanyang hindi pagsang-ayon sa pagdeploy ng amerika ng typhoon missile system para sa Pilipinas.

Naniniwala anya ang bise presidente na kailangang balansehin lamang ng Pilipinas ang relasyon sa iba’t ibang bansa at manatili sa gitna’t walang pinapanigan.