NATIONAL NEWS

Nilinaw ng Philippine National Police na walang inaprubahang Fitness Instructor si PNP Chief General Nicolas Torre III para manguna sa anumang physical fitness program ng organisason.

Ito ay kasunod ng pagdalo ng Fitness Vlogger na si Rendon Labrador sa “93 weight loss challenge” ng Public Community Affairs and Development Group kamakailan.

Ayon sa memo ni PMGen. Roderick Augustus Alba ng Directorate for Police Community Relations, inisyatibo lamang ito ng PCADG at hindi saklaw ng buong PNP.

Pinatitigil din ang pagpapakalat ng maling impormasyon kaugnay dito, dahil walang direktibang ibinigay ang PNP Chief na magtalaga ng opisyal na fitness coach.

Wala ring kaalaman si PNP Spokesperson PBGen. Jean Fajardo sa sinasabing papel ni Labrador bilang Fitness Coach ng PNP.

Hindi pa handa ang Pilipinas sa kahit anong digmaan dahil kulang sa direksyon ang administrasyon ni President Ferdinand Marcos Jr.

Ito ang sinabi ni Vice President Sara Duterte sa isinagawang “Free Duterte Now” Rally sa Melbourne, Australia, kung saan umapela ang bise presidente ng tulong sa kanyang mga taga-suporta sa pagpapalaya sa amang si dating Pangulong Rodrigo Duterte na nakakulong ngayon sa The Hague, Netherlands.

Inihayag din ni VP sara ang kanyang hindi pagsang-ayon sa pagdeploy ng amerika ng typhoon missile system para sa Pilipinas.

Naniniwala anya ang bise presidente na kailangang balansehin lamang ng Pilipinas ang relasyon sa iba’t ibang bansa at manatili sa gitna’t walang pinapanigan.

Tiniyak ng pamahalaan na hindi bibigyan ng VIP treatment ang kilalang Russian Vlogger na si Vitaly Zdorovetskiy na kasalukuyang nakakulong sa Taguig City Jail Male Dormitory.

Iginiit ni Bureau of Jail Management and Penology Spokeman Jail Superintendent Jayrex Bustinera na pantay-pantay ang trato nila sa lahat ng mga Persons Deprived of Liberty, anuman ang estado sa buhay o nationality.

Aminado si Jail Supt. Bustinera na may mga karagdagang hakbang sa paghawak sa mga dayuhang PDL, kabilang ang pakikipag-ugnayan sa embahada at pagbibigay ng access sa diplomatic visits.

Ngunit ipinaliwanag niya na hindi ito nangangahulugang espesyal na trato o pribilehiyo.

Samantala, hindi pa rin nasisimulan ang proseso ng deportasyon sa suspek dahil hindi pa natatapos ang kasong kriminal ng vlogger sa pilipinas.

Kasalukuyang naka-medical quarantine ang dayuhan, gaya ng protocol para sa lahat ng bagong pdl, at hindi pa isinama sa regular na populasyon ng kulungan.

Matatandaang isang kilalang Youtube Content Creator si Zdorovetskiy na ilang beses nang nasangkot sa kontrobersiya sa iba’t ibang bansa.

—sa panulat ni Mark Terrence Molave

Nilinaw ni House Spokesperson Atty. Princess Abante na mayroong inilaang pondo ang Kongreso para sa pagsasaayos ng San Juanico Bridge.

Taliwas aniya ito sa paratang ni Senator Imee Marcos na pang pintura lamang ang inilaang budget para sa tulay.

Ayon kay Atty. Abante, ang pondo para sa rehabilitasyon at maintenance ng naturang tulay ay nakahanda na mula noong 2018 o bago pa naging House Speaker si Leyte Rep. Ferdinand Martin Romualdez at makikita rin ito sa public records.

Matatandaang una nang idineklara ni Pangulong Ferdinand Marcos Jr. ang “state of calamity” sa Eastern Visayas dahil sa sitwasyon ng San Juanico Bridge na mahalaga sa ekonomiya, turismo at buhay ng mga taga-Eastern Visayas.

—sa panulat ni Mark Terrence Molave

Handa si returning Senator Vicente Sotto III na  pangasiwaan  o tumayong Presiding Officer sa impeachment trial ni Vice President Sara Duterte.

Ito’y sa oras na siya ang muling maupo bilang Senate President sa papasok na 20th Congress.

Magugunitang tumayo bilang Majority Leader at Rules Committee Chair ang senador noong isinagawa ang impeachment trial laban kay dating Chief Justice Renato Corona kaya’t kabisado na niya ang rules at procedure ng Senado, gayundin ang rules of court at impeachment rules.

—sa panulat ni Mark Terrence Molave

Planong ipabusisi ni Senator Sherwin Gatchalian  sa Senado ang  epekto ng girian ng Israel at Iran sa Pilipinas.

Layunin anya nitong makabuo ng mga posibleng aksyon at desisyon upang matugunan ang mga problemang dulot ng gyera, tulad ng epekto nito sa mga Overseas Filipino Workers, sa presyo ng produktong petrolyo at sa electricity rates lalo na sa mga off-grid areas.

Iginiit din ng Senador na sa pamamagitan ng pagbusising ito’y mapapalakas ang kahandaan ng bansa, matitiyak ang patuloy na suplay ng enerhiya at mapoprotektahan ang mga consumer sa pagtaas ng mga bayarin.

Binigyang-diin din ni Senator Gatchalian na tanging kahandaan lamang ang sandata sa walang-katiyakang dulot ng giyera sa pagitan ng Israel at Iran.

—sa panulat ni Mark Terrence Molave

Sinang-ayunan ng isang Technology Editor at Cybersecurity Expert na si Art Samaniego ang panawagang magpatupad ng AI o artificial intelligence-regulatory body sa bansa.

Ito’y sa gitna ng nakababahalang pagsulputan ng mga AI  generated videos sa internet na posibleng gamitin sa iba’t ibang panloloko at mga iligal na gawain.

Sa panayam ng DWIZ, nanawagan ang eksperto ng agarang pagkilos ng pamahalaan at mambabatas na gumawa ng kaukulang batas na lalaban sa AI.

Maliban dito’y iginiit din ng IT Expert na kailangan ring manawagan sa mga social media platforms tulad ng meta na higpitan ang kanilang pulisiya sa kung ano ang mga lumalabas sa websites nila.

Tiwala si House Spokesperson Atty. Princess Abante na hindi maaapektuhan ang budget process sakaling matuloy ang impeachment trial ni Vice President Sara Duterte.

Ito’y dahil sa posibilidad na sasabay ang deliberasyon ng panukalang 2026 National Budget kung tuluyang uusad ang impeachment proceeedings ng bise presidente.

Ayon kay Atty. Abante, ang prosecution panel ang tututok sa impeachment trial habang ang ibang miyembro naman ng Kamara ang siyang nakatalaga para sa pagdinig ng 2026 general appropriations bill.

Dahil dito, kumpiyansa ang abogado na walang magiging problema sa paglilitis dahil kaya naman itong mapunan ng malaking kapulungan.

Bukas si Pangulong Ferdinand Marcos Jr. sa mga suhestiyon na muling sumama ang Pilipinas sa Rome Statute o ang tratado na bumuo sa International Criminal Court.

Ito ang naging pahayag ni Communications Usec. Claire Castro, kasunod ng panawagan ng UN Rapporteur sa philippine government na i-ratify ang international human rights treaties at ang pagiging bahagi ng bansa noon sa rome statute.

Ikinatuwa rin ni Usec. Castro na napapansin anya sa international level ang ginagawa ng Marcos administration para sa pagpapa-igting ng karapatang pantao at pagsusulong ng freedom of expression sa Pilipinas.

Bagama’t maganda ang suhesyon ng UN Rapporteur, kinakailangan pa rin anya itong mapag-aralan ng pangulo.

Nanawagan si House Secretary General Reginald Velasco sa Presidential Communications Office (PCO) na paigtingin ang paghahanda laban sa fake news na maaaring kumalat online ilang araw bago at pagkatapos ng State of the Nation Address (SONA) ni Pangulong Ferdinand Marcos Jr.

Kasunod ito ng muling pagpupulong ng mga ahensya ng pamahalaan para paghandaan ang ika-apat na SONA ni PBBM.

Kabilang sa mga dumalo, ang mga opisyal mula sa Office of the President, Senate at House of Representatives kung saan ay tinalakay ang SONA calendar at mga invitation program, guest list, plenary, room assignments; kabilang ang secretary and protocols assignment.

Samantala, binigyan din naman ni PCO Secretary Jay Ruiz ang kahalagahan na pagkakaroon ng consistent messaging na madaling maintindihan ng publiko.

Mahalaga rin niya na mabantayan nang maigi ang online disinformation upang matiyak na tama ang mga lumalabas na mga datos online.