NATIONAL NEWS

Bukas si Pangulong Ferdinand Marcos Jr. sa mga suhestiyon na muling sumama ang Pilipinas sa Rome Statute o ang tratado na bumuo sa International Criminal Court.

Ito ang naging pahayag ni Communications Usec. Claire Castro, kasunod ng panawagan ng UN Rapporteur sa philippine government na i-ratify ang international human rights treaties at ang pagiging bahagi ng bansa noon sa rome statute.

Ikinatuwa rin ni Usec. Castro na napapansin anya sa international level ang ginagawa ng Marcos administration para sa pagpapa-igting ng karapatang pantao at pagsusulong ng freedom of expression sa Pilipinas.

Bagama’t maganda ang suhesyon ng UN Rapporteur, kinakailangan pa rin anya itong mapag-aralan ng pangulo.

Nanawagan si House Secretary General Reginald Velasco sa Presidential Communications Office (PCO) na paigtingin ang paghahanda laban sa fake news na maaaring kumalat online ilang araw bago at pagkatapos ng State of the Nation Address (SONA) ni Pangulong Ferdinand Marcos Jr.

Kasunod ito ng muling pagpupulong ng mga ahensya ng pamahalaan para paghandaan ang ika-apat na SONA ni PBBM.

Kabilang sa mga dumalo, ang mga opisyal mula sa Office of the President, Senate at House of Representatives kung saan ay tinalakay ang SONA calendar at mga invitation program, guest list, plenary, room assignments; kabilang ang secretary and protocols assignment.

Samantala, binigyan din naman ni PCO Secretary Jay Ruiz ang kahalagahan na pagkakaroon ng consistent messaging na madaling maintindihan ng publiko.

Mahalaga rin niya na mabantayan nang maigi ang online disinformation upang matiyak na tama ang mga lumalabas na mga datos online.

Mahigpit na binabantayan ng Department of Health ang nadiskubreng bagong variant ng COVID-19 na NB.1.8.1 o tinatawag na “Nimbus variant.”

Ayon kay Health Secretary Ted Herbosa, wala pa naman anyang naitatalang kaso sa bansa na tinamaan ng nasabing variant ngunit patuloy nilang hihigpitan ang pagmomonitor lalo na at tumataas din ang mga bagong kaso sa buong southeast asia na dulot ng COVID.

Bagama’t walang binanggit na numero, sinabi rin ni Secretary Herbosa na hanggang ngayon ay hindi naman tumataas ang COVID cases sa bansa.

Nilinaw din ng Kalihim na nananatiling epektibo laban sa bagong variant ang mga dati nang bakuna na ginamit  kontra COVID-19.

Nakaamba sa susunod na linggo ang panibagong malakihang taas-presyo sa mga produktong petrolyo.

Batay sa pagtaya ng ilang oil company, posibleng tumaas ng hanggang 3 pesos 65 centavos ang kada litro ng diesel; 3 pesos and 53 centavos naman sa kerosene habang 2 pesos 37 centavos sa gasolina.

Samantala, nakikita naman ni Jetti Petroleum President Leo Bellas ang pagsirit mula 3 pesos 90 centavos hanggang 4 pesos and 10 centavos sa kada litro ng diesel.

Gayunman, posible anyang tumaas pa ito sakaling patuloy na bumaba ang halaga ni piso kontra dolyar.

Nanawagan ang Malakanyang sa Senado na sundin ang konstitusyon at rule of law kaugnay ng impeachment trial ni Vice Pres. Sara Duterte.

Ayon kay Palace Press Officer at Communications Usec. Claire Castro, dapat bigyang-pansin ng senado ang panawagan ng iba’t ibang sektor na nababahala sa posibleng maging epekto ng pagkakaantala ng impeachment trial sa bansa.

Nilinaw ni Usec. Castro na hindi dinidiktahan ng palasyo ang mga senator-judges, pero dapat aniyang kilalanin ng senado ang kaalaman at kasanayan ng mga nananawagan dahil may basehan ang mga apela nito.

Tugon ito ng Palasyo sa panawagan ng makati business club na simulan na ang impeachment trial, dahil sa pinangangambahang epekto sa ekonomiya at investments ng bansa, kapag hindi pa rin gumulong ang paglilitis sa bise presidente.

 Pinabulaanan ni Senator Risa Hontiveros namayroon itong papanigan sa impeachment trial laban sa bise presidente ng Pilipinas.

Aniya, gagawin lamang nito ang naaayon sa kanyang trabaho bilang isang senator-judge sa impeachment case.

Dagdag pa ng Senadora, na susuriin niyang mabuti ang mga nakalap na ebidensya laban sa bise presidente at hindi mag papaapekto sa mga pamumuna sa kanya na siya ay kalaban ng mga Duterte.

Nanawagan din ito kay VP Sara Duterte na sagutin nito ang summons mula sa senado at magpaliwanag sa mga akusasyon sa kanya.

Nais baguhin ng Metropolitan Manila Development Authority ang magiging tila parusa sa mga lalabag sa No Contact Apprehension Policy.

Ayon kay MMDA Chairman Romando Artes, kanilang pinag-aaralan na ang pagpapalit ng parusa kung saan mula sa multa ay gagawuin na lamang itong community service.

Layon aniya nito na makatulong sa hakbangin ng ahensiya kontra baha.

Kabilang sa mga gagawin sa community service ang paglilinis ng imburnal at sa mga daluyan ng tubig.

Handa ang Armed Forces of the Philippines na umalalay sa pagpapauwi ng mga Pilipinong naiipit sa tensyon sa pagitan ng Israel at Iran.

Ito ang tiniyak ni AFP Spokesperson Col. Francel Margareth Padilla, kasabay ng pagsasabing nakatuon na ang kanilang atensyon sa pagtulong sa pamahalaan upang masigurong ligtas ang mga Pilipinong nasa israel at iran.

Kaugnay nito, sinabi ni Col. Padilla na handa na sila sa posibleng repatriation o pagpapauwi sa mga Pilipino kung kinakailangan.

Tiniyak din ng AFP Official na handa silang tumugon anumang oras, alinsunod sa mga utos at direktiba ni Pangulong Ferdinand Marcos Jr.

Masusi na rin aniya nilang binabantayan ang sitwasyon ngayon sa gitnang silangan, partikular na sa Israel at Iran.