NATIONAL NEWS

Tinanggap na ni Pangulong Rodrigo Duterte ang resignation ni Philippine Charity Sweepstakes Office (PCSO) General Manager Royina Garma.

Hunyo a –6 nang magbitiw si Garma bilang Chairperson at GM ng PCSO pero hindi nito idinetalye ang dahilan ng kanyang resignation.

Kinumpirma ni Executive Secretary Salvador Medialdea na hahalili sa nagbitiw na opisyal si PCSO Chairman Anselmo Simeon pinili bilang Officer-in-Charge ng Office of the General Manager.

Taong 2019 nang italaga si Garma sa naturang Government-owned and Controlled Corporation.

Bago italaga sa PCSO, nagsilbi munang Cebu City Police Office Director si Garma.

Aminado si Pangulong Rodrigo Duterte na sa kanyang edad na 77 ay hirap na siya sa pagbabasa.

Sa kanyang talumpati sa pagbisita sa National Academy of Sports sa New Clark City sa Capas, Tarlac, inihayag ni Pangulong Duterte na hindi niya matiyak kung makababasa pa siya sa mga susunod na panahon.

Magugunitang inamin noon ng Punong Ehekutibo na mayroon siyang Neuromuscular Disease na Myasthenia Gravis at Barrett Esophagus dahil sa kanyang pag-inom noon ng alak.

Maaaring hindi na magpatupad ng mas mataas na COVID-19 Alert level kung mababa pa rin ang hospitalization rate sa kabila ng tumataas na mga bagong infection sa nakalipas na ilang linggo.

Ito ang inihayag ni Presidential Adviser for Entrepreneurship Joey Concepcion sa gitna ng pangambang posibleng ibalik sa Alert level 2 status ang National Capital Region.

Ayon kay Concepcion, hindi naman lahat ng COVID-19 cases ay humahantong sa mga ospital dahil ilan lamang ang severe at critical na na a-admit, kaya’t wala pang dahilan na isailalim muli ang NCR sa mas mataas na Alert level.

Una nang ibinabala ng Department of Health na may posibilidad na ibalik sa Alert level 2 ang Metro Manila kung patuloy na tataas ang COVID-19 cases.

Nakatakdang mag-expire ngayong araw sa NCR at iba pang bahagi ng bansa ang Alert level 1, na pinaka-mababang COVID Alert level system.

Sakaling bumalik sa Level 2, balik din sa 50% ang indoor capacity ng mga establisyimento at aktibidad para sa mga fully vaccinated adults habang 70% ang outdoor capacity.

Posibleng itaas sa Moderate COVID-19 risk classification mula sa Low risk ang Metro Manila bunsod ng patuloy na pagtaas muli ng mga bagong infection ngayong buwan.

Ibinabala ito ni OCTA Research Group Fellow, Professor Guido David makaraang sumampa sa 53% o 131 ang 7-day average ng COVID-19 cases mula sa 86 cases per day.

Ayon kay David, tumaas din ang reproduction number o bumilis ang hawaan sa 1.59 mula sa 1.21% habang ang positivity rate ay umakyat sa 2.7% mula sa 2.2%.

Bahagya rin anyang umakyat ang Healthcare Utilization Rate sa 23% kumpara sa 21% noong nakaraang linggo kaya’t maaaring itaas ang risk level sa loob ng isa hanggang dalawang linggo.

Idinagdag pa ni David na bagaman hindi gaanong kalaki ang mga bilang, nakikitaan nila ito ng trend o pattern at nagkakaroon ng pagtaas kada linggo at sa katunayan ay apat na linggo nang sumisirit ang COVID cases simula pa noong unang linggo ng Mayo.

Indikasyon ito na hindi pa tuluyang bumabagal ang hawaan ng COVID-19 sa Metro Manila.

Handang-handa na umano si Senator-elect Robin Padilla na makipag-debate sa senado.

Pero, Filipino at hindi raw Ingles ang gagamitin niyang lingguwahe sa pakikipag-debate dahil mga Pilipino naman ang kanyang makaka-debate.

Ito ang inihayag ni Padilla, matapos bumisita sa senado na bahagi ng kanyang paghahanda bilang bagong mambabatas.

Sa kanyang pagtungo sa senado, binigyan ang aktor ng briefing ni Deputy Secretary for Legislation, Atty. Edwin Bellen hinggil sa proceedings sa mataas na kapulungan ng kongreso tulad ng pagsasagawa ng committee hearing at pagdalo sa plenary session.

Tiniyak ni Padilla na 100% na siyang handa para sa kanyang bagong tungkulin, lalo ang pagsusulong ng pederalismo.

Bukod sa Senate orientation, una ng sumalang si Binoy sa briefing hinggil sa ekonomiya, foreign policy at iba pang aspeto na may kinalaman sa kanyang pagiging senador.

Samantala, inihayag ni Padilla na wala pang kumakausap sa kanya hinggil sa komite na nais niyang hawakan, partikular ang senate Committee on Constitutional Amendments and Revisions of Codes. —ulat mula kay Cely Ortega Bueno (Patrol 19)

Maka-aapekto sa inaasahang paglago ng ekonomiya ng bansa ngayong taon sakaling muling itaas sa Alert level 2 ang Metro Manila.

Ito ang pangamba ni Senator Joel Villanueva sa harap ng posibleng pagsasailalim muli sa National Capital Region sa Alert level 2 bunsod ng tumataas na namang kaso ng COVID-19.

Ayon kay Villanueva, sa pagtaya ng World Bank, lalago ang ekonomiya ng bansa ng 5.7% ngayong taon, na pinakamataas sa Asya, habang 5.6% ang inaasahang paglago sa taong 2023 hanggang 2024.

Crucial anya ngayong panahon ang pagbubukas ng ekonomiya, lalo na sa turismo sakaling itaas muli ang Alert level.

Gayunman, idinagdag ng senador na ang IATF at team ng mga eksperto nito ang dapat magrekomenda sa dapat gawin alinsunod sa pinaka-bagong datos at dapat ibatay din sa karanasan ng ibang bansa. —ulat mula kay Cely Ortega Bueno (Patrol 19)

Pinag-aaralan na ng MMDA na higpitan ang mga patakaran sa paggamit ng E-bikes at E-scooters matapos ang mga napaulat na insidente noong isang taon.

Ayon kay MMDA Traffic Discipline Office for Enforcement Head Victor Nuñez, medyo maluwag ang ahensiya sa pagpapatupad ng Administrative Order 2021-039 ng Land Transportation Office.

Ito’y sa gitna ng binawasang public transportation capacity, noong isang taon.

Pero dahil balik na anya sa 100% ang mass public transport at mag re-resume na rin ang face-to-face class, posibleng maraming mga estudyante ang gumamit ng E-bikes at E-scooters kaya’t nais nilang i-promote ang road safety.

Sa ilalim ng A.O. 2021-039, ang E-vehicles na may maximum speed na 50 kilometers per hour ay required na magparehistro sa LTO.

Ang mga E-vehicle user ay dapat magkaroon ng driver’s license, dapat limitado lamang sa bicycle lanes, barangay roads at bawal dumaan sa mga major thoroughfares, maliban kung tatawid lang.

Noong nakaraang taon, nakapagtala ang MMDA ng 346 road crashes na kinasangkutan ng E-vehicles sa kahabaan ng mga pangunahing lansangan sa Metro Manila.