NATIONAL NEWS

Nakalikha ng murang feeds ang Department of Agriculture (DA) na ipapakain sa mga tilapia at bangus.

Ginawa ito ni Dr. Roger Edward Mamauag sa pamamagitan ng Southeast Asian Fisheries Development Center-Aquaculture Division at National Fisheries Research and Development Institute.

Ayon kay Mamauag, gawa sa agricultural at poultry products ang feeds tulad ng mais, coconut-fermented copra meal at mga nakikita sa manukan.

Dahil sa imbensyon, bababa sa P27 kada kilo ang feeds ng bangus mula sa P35 kada kilo.

Habang P24 kada kilo ang magiging presyo ng feeds sa tilapia mula sa P32 hanggang P34 kada kilo.

Sa kabila ng panawagan ng OCTA Research Group na i-urong muna ang pagbabalik ng face-to-face classes, nais ng Teachers’ Dignity Coalition na ituloy na ang pagdaraos nito sa Agosto.

Sa panayam ng DWIZ, sinabi ni Benjo Basas, National Chairperson ng TDC na masyado pang maaga para sabihing huwag munang ituloy ang in-person classes.

Una nang sinabi ng OCTA Research Group na mas mabuting i-atras muna ang pagbabalik ng face-to-face classes kahit isang buwan lang bunsod ng pagtaas ng COVID-19 cases sa bansa.

Nilinaw pa ni Basas na hindi naman 100% ng mga bata ang papasok ng sabay-sabay kapag ipinatupad na ang in-person classes.

Nagpasalamat sa liderato ng Iglesia ni Cristo si Pangulong Rodrigo Duterte dahil sa suportang ibinigay nito sa buong panahon ng kaniyang termino.

Bago magtungo sa New Clark City sa Capas, Tarlac, dumaan muna ang Punong Ehekutibo kahapon sa central office ng INC sa Quezon City kasama si Senator Bong Go.

Kabilang sa suportang ibinigay ng INC sa Administrasyong Duterte ay ang pagtulong sa mga mamamayan sa panahon ng kahirapan, krisis, kalamidad at COVID-19 pandemic.

Matapos ang courtesy call, dumiretso na ang Pangulo at Senador sa Tarlac para inspeksiyunin ang National Academy of Sports na naging batas dahil kay Go.

Aabot sa 311 panukala ang naisabatas sa ikatlong regular na sesyon ng 18th Congress.

Ayon kay House Majority Leader Martin Romualdez, 119 sa bagong batas ay may national scope habang 192 ang lokal.

Mula July 22, 2019 hanggang June 3, 2022, nakapaghain ang Kamara ng nasa 13, 526 measures.

Kabilang dito ang 10, 845 na panukalang batas habang 2, 681 ang resolusyon.

Mula sa panahon ni Dating House Speaker Alan Peter Cayetano at Outgoing Speaker Lord Allan Velasco, kabuuang 1, 618 na panukala ang pinagtibay sa mababang kapulungan ng Kongreso.

Makararanas pa rin ng panaka-nakang pag-ulan ang Metro Manila ngayong araw.

Ayon sa PAGASA, dulot ito ng localized thunderstorm na maaaring magresulta ng flood at landslide prone area.

Magiging mainit at maalinsangan naman ang panahon sa Visayas at Mindanao pero asahan pa rin ang pag-ulan.

Nagpaalala naman sa publiko ang PAGASA na huwag kalimutang magdala ng payong kung lalabas ng bahay bilang panangga sa biglaang pagbuhos ng ulan o matinding sikat ng araw.