NATIONAL NEWS

Nalampasan ng Caloocan City ang vaccination target nito para sa “Chikiting Bakunation Days” campaign.

Dahil dito, nakatanggap ng Certificate of Recognition ang lungsod mula kay DOH-National Capital Region Director Dr. Gloria Balboa.

Ang naturang kampanya ay inilunsad upang mabakunahan ang mga batang 23 buwang gulang pababa laban sa mga sakit gaya ng polio, hepatitis b, measles, rubella, at mumps.

Ayon sa lokal na pamahalaan, 15,432 na mga bata ang nabakunahan o katumbas ng 101% ng target nito na 15,188.

Idinaos ito mula Mayo 30 hanggang Hunyo 10 sa mga Barangay Health Centers, at nagsagawa rin ang city health workers ng  house-to-house vaccinations.

Kaugnay nito, nagpasalamat naman si Incumbent Mayor Oscar “Oca” Malapitan sa mga miyembro ng City Health Department na nanguna sa pagbabakuna sa lungsod.

Binalaan ng Philippine Overseas Employment Administration (POEA) ang publiko laban sa mga kumakalat na text message na nag-aalok ng trabaho sa ibang bansa.

Ayon sa Anti-Illegal Recruitment Unit ng ahensya, nagsesend ng link ang scammer sa bibiktimahin nito na naglalaman umano ng mga detalye kaugnay sa trabaho.

Kaugnay nito, pinayuhan ang publiko na huwag pansinin o burahin na lamang ang nasabing text message dahil hindi ito nanggaling sa ahensya.

Hinimok rin ng POEA ang publiko na makipag-ugnayan lamang sa kanila at sa accredited recruitment agencies kung nais na mag-apply ng trabaho sa abroad.

Inirekomenda ng Department of Health (DOH) ang pagsusuot ng face masks hanggang sa katapusan ng taon.

Ayon kay Health Undersecretary Maria Rosario Vergeire, pinoprotektahan ng face masks ang publiko hindi lamang sa COVID-19 kundi maging sa iba pang mga sakit gaya ng monkeypox.

Sinabi pa ng opisyal na maaari lamang tanggalin ang face masks tuwing kakain o mag eehersisyo.

Delikado rin aniya ang pag-isyu ng Executive Order upang alisin ang face mask mandate lalo’t tumataas ngayon ang mga kaso ng COVID-19, may mga subvariant na nakapasok sa bansa at humihinang immunity o bisa ng bakuna laban sa virus.

Aabot sa 141 na mga estudyante mula sa Indigenous People’s (IP) Community sa Zamboanga City ang nakatanggap ng ikalawang dose ng COVID-19 vaccine.

Ayon kay Maria Christine Lim, City Health Office Education at Promotion Officer, tiniyak nga lokal na pamahalaan na mapabilang ang IP Communities sa vaccination rollout.

Pawang edad 5 hanggang 11 ang naturang mga estudyante na kabing sa Samal at Badjao Tribes.

Habang 55 IP students din, edad 12 hanggang 17 ang nakatanggap ng unang dose ng bakuna nitong Martes.

Sa ngayon ay umabot na sa 1.3 milyong doses ng COVID-19 vaccine ang na-administer ng CHO sa Zamboanga City.

Magpupulong na ngayong araw ang Metro Manila Council (MMC) para pag-usapan kung itataas na sa Alert level 2 ang buong Metro Manila.

Ayon kay Parañaque Mayor at MMC Chairman Edwin Olivarez, kung siya ang tatanungin ay dapat pa ring manatili sa Alert level 1 ang rehiyon.

Hindi pa aniya napapanahon ang bagong Alert level dahil hindi pa ganoong kataas ang naitatalang bagong kaso ng sakit.

Hanggang ngayong araw na lang iiral ang Alert level 1 sa Metro Manila at iba pang bahagi ng bansa habang nasa desisyon na ng IATF kung palalawigin pa ito.