NATIONAL NEWS

Posibleng ilabas sa susunod na linggo ang bagong pinuno ng Philippine National Police (PNP) pagkatapos ng inagurasyon ni President-Elect Ferdinand ‘Bongbong’ Marcos Jr., sa katapusan ng buwan.

Ipinabatid ni PNP Spokesperson Police Colonel Jean Fajardo, na batay sa isang provision ng republic act 6975 ang Chief PNP ay ina-appoint ng presidente ng bansa.

Aniya, pipili ito base sa listahan ng mga kandidato para maging PNP Chief na isusumite ng National Police Commission (NAPOLCOM) at ang mga ranggo ng mga ito ay One-Star General o Brigadier General pataas.

Samantala, ilan sa mga matunog na pangalan na pinagpipilian na magiging susunod na PNP Chief ay sina Deputy Chief For Administration Police Lieutenant General Rhodel Sermonia, Area Police Command- Northern Luzon Commander Police Lieutenant General Rodolfo Azurin Jr., Directorate for Operations Director Police Major General Valeriano De Leon.

Ani Fajardo mananatiling nakasuporta ang buong police force ng PNP sa sinuman ang mapiling chief PNP.

Hindi naniniwala ang Department of Trade and Industry na ibabalik sa mas mahigpit na Alert Level 2 ang National Capital Region (NCR) sa gitna ng muling pagsirit ng kaso ng COVID-19 sa rehiyon.

Sinabi ni DTI Secretary Ramon Lopez na kailangan nang mapanatili ang pagbangon ng ekonomiya ng bansa kaya  malabong magpasya ang Inter-Agency Task Force (IATF) na isasailalim sa Alert Level 2 ang Metro Manila.

Paliwanag pa ng kalihim na natutunan na ng mga otoridad na hindi dapat mauwi sa escalation ng alert level ang mild COVID-19 cases at mababang Intensive Care Unit (ICU) utilization rate.

Una nang sinabi ng kagawaran na mababa ang utilization rate ng health care facilities kahit pa tumaas ang lingguhang kaso ng COVID-19 sa 14 na local government unit sa Metro Manila.

Kailangan makipag-ugnayan ng mga health workers ng pribadong ospital na hindi pa nakatatanggap ng One COVID-19 Allowance (OCA) sa Centers for Health Development.

Ayon sa Department of Health (DOH), ito’y para mas mabilis na matanggap ng mga nabanggit na health workers ang nararapat na benepisyo.

Inabisuhan naman ng kagawaran ang pamunuan ng mga pribadong ospital na kailangan nilang ipasa ang kumpletong listahan ng mga health workers na nakatanggap na ng nabanggit na allowance.

Una nang iginiit ng Private Hospitals Association of the Philippines (PHAPI) na karamihan sa kanilang health workers ay wala pa rin nakukuhang allowance hanggang sa ngayon.

Wala pang dahilan na nakikita ang National Government para isailalim sa Alert Level 2 ang ilang lalawigan sa Pilipinas.

Ito ay ayon kay Interior Secretary Eduardo Año na dapat   makipag-usap muna aniya sila sa IATF bago itaas ang alert level status sa ilang lugar sa bansa kabilang na ang metro manila na nasa Alert Level 1 hanggang sa Hunyo 15.

Dagdag ni Año na ang metrics para pumunta sa Alert Level 2 ay binabase sa bilang ng mga kaso at hospitalization rate ng bansa.

Samantala, nakapagtala ang bansa ng 257 na panibagong kaso ng COVID-19 kung saan nasa 3,130 na ang active tally mula sa 3, 097.

Tiwala ang COMELEC na masisimulan muli sa July 4 ang registration para sa barangay at sangguniang elections.

Ayon kay COMELEC Spokesman Atty Rex Laudiangc, .hinihintay pa nila ang Go signal ng COMELEC En Banc para tuluy tuloy na ang paghahanda nila sa nasabing eleksyon sa December 5.

Ipinabatid sa DWIZ ni laudiangco na target nila ang nasa halos 66M voters para sa barangay elections at nasa mahigit 20M sa eleksyon sa SK.

Patay ang dalawang umanoy suspek sa sa pagdukot sa dalawang Filipino Chinese sa Maynila.

Kinilala ang mga suspek na sina Rollie Castillo at Jeramil Ventura.

Ayon sa mga otoridad , dinukot ng mga suspek ang mag pinsang Chinoy sa Tondo, Maynila nitong June 4 at humihingi ng P100M ransom.

Nabatid na naibigay ng pamilya ang ransom sa pakil, laguna kayat pinakawalan ang mga biktima sa bayan ng famy.

Sinundan naman ng mga pulis ang getaway vehicle hanggang sa Pillilia, Rizal kung saan nagkaruon ng engkuwentro at napatay ang mga suspek.

Magpapatupad ng gun ban ang PNP para sa hiwalay na inagurasyon nina President Elect Ferdinand Bongbong Marcos, Jr. at Vice President Elect Sara Duterte-Carpio.

Ipinabatid ni Major General Valeriano De Leon, PNP Director for Operations na epektibo ang gun ban sa Davao Region mula June 16 hanggang 21 para sa inagurasyon ni Duterte sa June 19 samantalang mula June 27 hanggang July 2 ang gun ban sa Metro Manila para sa panunumpa ni Marcos sa June 30.

Sinabi ni De Leon na ang pagtatakda ng gun ban ay para makapagsagawa pa ng imbestigasyon sa insidente ng paglabag kung kinakailangan.

Ang inagurasyon ni Duterte ay idaraos sa San Pedro Square sa Davao City samantalang sa National Museum naman isasagawa ang panunumpa ni BBM sa June 30.

Bahagyang naantala ang operasyon ng LRT kaninang umaga.

Ayon sa Light Rail Manila Corporation (LRMC), pasado alas-7 ng umaga nang magka aberya sa biyahe ng LRT-1 mula Baclaran pa Balintawak

Kaagad namang kinumpuni ng technician ng LRMC ang nagka problemang tren malapit sa UN Avenue station at muling itinuloy ang operasyon makalipas ang halos 12 minutos.

Mas maraming Pilipino na ang nagtitiwala sa mga balita.

Ito ay batay sa inilabas na Digital News Report 2022 ng Reuters Institute for the Study of Journalism kung saan tumaas sa 37% ang bilang ng mga Pilipinong nagtitiwala sa mga balita sa maraming pagkakataon.

Ang nasabing porsyento ay mas mababa sa 42% na naitalang global average.

Nasa 47% ng mahigit 2,000 Pinoy adults ayon sa pag-aaral ang minsan o bibihirang pumaling o makinig sa mga balita.

Tumaas naman sa 75% ang news avoidance o pag iwas sa mga balita sa bansa dahil sa umanoy pag rereport ng mga pulitika at COVID-19 na nakakaapekto sa mood ng mga Pinoy na karamihan ay naniniwalang walang importansya at may kinikilingan ang mga balita.