Aabot na sa lampas P100 ang kada litro ng mga produktong petrolyo sa ilang lalawigan matapos ang panibagong big time price increase, kahapon.
Halimbawa na lamang sa Puerto Princesa City, Palawan at Odiongan, Romblon, naglalaro na sa P97 hanggang P108 ang kada litro ng diesel sa ilang gasolinahan habang nasa P107 na ang gasolina.
Batay sa monitoring ng Department of Energy, nasa P97 per liter na ang premium diesel sa Ormoc City, Leyte; P94 sa Zamboanga City habang P93 ang gasolina sa bayan ng Claveria, Cagayan.
Gayunman, bagsak sa P60 ang kada litro ng gasolina sa Bongao, Tawi-Tawi dahil nagmumula ang kanilang supply sa karatig-bansang Malaysia.
Samantala, nag-kilos protesta naman ang grupong PISTON upang ipanawagang suspendihin na ang excise tax at value-added tax sa petroleum products.
Pero maka-ilang ulit nang ibinasura ng Malakanyang ang hirit ng mga transport group sa kadahilanang ang buwis na nakokolekta sa langis ay ginagamit sa iba’t ibang proyekto ng gobyerno.
