NATIONAL NEWS

Nahulog sa bangin kahapon ang isang bus sa Bukidnon na may sakay na 31 pasahero.

 Ayon kay Manolo Fortich Police Investigator, Police Senior Master Sergeant Larie Eco, pawang minor injuries ang natamo ng mga pasaherong sakay ng bus na bumabagtas sa kahabaan ng Sayre Highway, Sitio Mangima, Barangay Tankulan sa Bayan ng Manolo Fortich.

 Minamaneho ito ng driver na si Tommy Magno na nagmula sa Cagayan De Oro City at patungong Davao City.

 Agad namang rumesponde ang pulisya at rescue team ng Municipal Disaster Risk Reduction Office (MDRRO) sa aksidente at dinala sa Bukidnon Provincial Hospital ang mga nasugatan.

 Batay sa inisyal na imbestigasyon ng roads and traffic administration ng lungsod, posibleng nawalan ng preno ang bus na dinagdagan pa ng madulas na daan dahil sa pag-ulan.

Inihayag ng Department of Transportation (DOTr) na sumang-ayon ito sa Chinese Embassy sa Manila na simulan muli ang negosasyon para sa mga pangunahing proyekto sa transportasyon sa bansa.

Ayon kay Transportation secretary Jaime Bautista, ito ay napag-usapan na nila ni Chinese Ambassador Huang Xilian sa naganap na unang pagpupulong noong Huwebes, Agosto a-11.

Aniya, tinalakay nila sa nasabing pagpupulong ang Major China-Funded Railway Projects tulad ng South Long Haul Project o ang North-South Commuter Railway, Subic-Clark Railway and Mindanao Railway o ang Tagum-Davao-Digos Railway.

Una nang sinabi ni DOTr undersecretary for Railways Cesar Chavez na hindi inaksyunan ng Chinese Government ang request ng nagdaang Duterte Administration para sa loan financing ng tatlong major railway projects na kung saan ikinonsidera itong withdrawn at kailangang i-renegotiate ng kasalukuyang gobyerno.

Nilinaw ng Department of Education (DEPED) na wala pa silang hawak na kongkretong detalye kaugnay sa posibleng pagtuturo ng ASEAN language sa mga paaralan.

 Ayon kay DEPED Spokesman Michael Poa, pinaplano pa nila ang pagtuturo ng karagdagang lenggwahe sa mga mag-aaral.

 Una rito, sinabi ni Vice President at Education Secretary Sara Duterte sa 55th Founding Anniversary ng ASEAN, na isinusulong niyang ituro ang ginagamit ng wika ng mga bansa sa Southeast Asia partikular sa mga mag-aaral sa unibersidad.

 Maliban sa wikang Ingles at Tagalog, mas mahahasa pa aniya ang isipan ng mga mag-aaral kung mapag-aaralan ang iba pang wika.

Bubuksan na ngayong araw sa mga motorista ang CAVITEX C5 link flyover extension.

 Orihinal dapat na bubuksan ang tulay noong July 2022 pero iniusog ito ngayong linggo.

 Ang flyover extension ay magsisimula sa Merville patungong Eugolio Rodriguez Avenue sa Parañaque City.

 Kasabay ng pagbubukas, ipatutupad din ang mga bagong traffic management scheme para sa mga motoristang magmumula sa Taguig, Las Piñas at Parañaque City.

 Kabilang dito ang paglipat ng New Merville Entry/ Exit sa tapat ng Shell C5 Southlink sa Barangay Moonwalk, Parañaque City.

 Bubuksan rin ang service road tunnel, kung saan kakaliwa na ang mga motorista patungong Kaingin Road.

Ipinagtanggol ng malakanyang si Executive Secretary Vic Rodriguez, kaugnay sa pag-iisyu ng ‘unauthorized resolution sa importasyon ng asukal.

 Ayon kay Press Secretary Atty. Trixie Cruz-Angeles, hindi si Rodriguez ang nag-utos sa pag-convene ng sugar regulatory board.

 Sa katunayan, si Rodriguez pa ang nagpaabot ng ulat kay Pangulong Ferdinand ‘Bongbong’ Marcos Jr. sa lumabas ng impormasyong nag-convene at nag-isyu ng illegal resolution.

 Sa ngayon, wala pang impormasyon si Cruz-Angeles kung tinanggap na ni Pangulong Marcos Jr. ang pagbibitiw ni Agriculture Undersecretary Leocadio Sebastian.

Hindi pa nakikita ng Department of Science and technology (DOST) na kailangan nang magpatupad ng mandatory evacuation sa mga lugar na malapit sa bulkang Taal.

 Sinabi ito Ni DOST Secretary Renato Solidum kasabay ng muling pagbubuga ng abo at usok ng bulkan na nag-resulta ng makapal na vog o volcanic smog.

 Sa panayam ng DWIZ, inihayag ni Solidum na sa ngayon ay wala pang indikasyong ipinapakita ang bulkan para muli itong magkaroon ng malakas ng pagsabog.

 Pero sa kabila nito, tiniyak ni Solidum na mahigpit na nilang binabantayan ang sitwasyon ng bulkan.

Bumaba na ang farmgate price ng baboy at manok sa Pilipinas.

Ayon kay Kristine Evangelista, Spokesperson at Undersecretary ng Consumer Affairs ng Department of Agriculture (DA), base sa kanilang monitoring nitong Agosto a-12 ay nasa 330 pesos na ang retail price para sa kasim, 340 pesos sa liempo, at 180 pesos sa whole dressed chicken.

Tiniyak naman ni Evangelista ang pagpapaigting ng mga programa na makatutulong sa pagpigil ng inflation.

Ang Agriculture Department ang nagbibigay ng iba’t-ibang interbensyon at suporta sa mga producer upang mapataas ang kanilang produksyon.

Sila rin ang nagpoprotekta sa mga producers at consumer lalo na ngayong tumataas ang presyo ng mga bilihin.

 Pinagbibitiw sa pwesto ni Senate President Juan Miguel Zubiri ang mga opisyal ng Sugar Regulatory Administration (SRA) na sangkot sa iligal na importation order ng 300,000 toneladang asukal.

 Ipinaabot ni Zubiri ang panawagan matapos sabihin ni Press Secretary Trixie Cruz Angeles Cruz-Angeles na nagbitiw na sa pwesto si Agriculture Undersecretary Leocadio Sebastian.

 Ayon kay Zubiri, mas mabuting magbitiw na lamang sa pwesto ang mga sangkot na opisyal bilang delicadeza sa kanilang ginawa.

Iginiit naman ng Senate President ang pagsasampa ng kaso sa mga may kinalaman sa isyu dahil sa tangka nila pagpapahamak sa pangulo.

Maliban sa panawagan, tiniyak din ni Zubiri ang pagpapatawag ng imbestigasyon sa iligal na importation order.

Hindi makikialam ni Pangulong Ferdinand ‘Bongbong’ Marcos Jr. sa nagpapatuloy na imbestigasyon, sa paglalabas ng unauthorized at iligal na resolusyon para sa importasyon ng 300,000 metriko toneladang asukal.

 Sa isang panayam, sinabi ni Press Secretary Trixie Cruz-Angeles na hahayaan na ng pangulo ang kinauukulan na imbestigahan ang isyu.

 Pero sa kabila nito, nais aniya ni Pangulong Marcos Jr. na maging patas ang imbestigasyon sa kabila ng tangkang pagpapasama sa kaniya, gamit ang pag-issue ng sugar regulatory commission ng isang resolusyon na hindi inaprubahan ng punong-ehekutibo.

Sinabi naman ni Cruz-Angeles na kabilang sa kanilang sisilipin ay kung may pananagutang kriminal ang mga opisyal ng Sugar Regulatory Administration (SRA) na sangkot sa ‘illegal resolution’.

 Gagawin ito sa oras na matapos ang fact finding sa kaso at may makitang matibay na ebidensiya na may kriminal na pananagutan ang mga sangkot.

 Si Pangulong Marcos Jr. ang kasalukuyang Kalihim ng Department of Agriculture (DA) at Chairman din ng SRA.