Bumaba sa kauna-unahang pagkakataon ang COVID-19 positivity rate sa Metro Manila.
Ayon kay OCTA Research Fellow Dr. Guido David, bumagsak sa 16.4% ang positivity rate sa rehiyon nitong August 12 kumpara sa 17.5% noong nakaraang linggo.
Pero mas mataas pa rin ito sa itinakdang threshold ng World Health Organization (WHO) na 5%.
Magandang senyales naman para kay David ang bagong datos dahil ipinapakita nito na nag-peak na ang COVID-19 cases sa National Capital Region (NCR).
Bumuo na ng task force ang lokal na pamahalaan ng Makati na magmo-monitor sa kaso ng monkeypox cases sa lungsod at mapigilan ang pagkalat nito.
Ayon kay Makati Mayor Abby Binay, responsable ang task force sa pagpapakalat ng impormasyon kung paano mapipigilan ang pagkalat ng fake news kaugnay sa monkeypox.
Pinaplano rin ni Binay na isama ang monkeypox data sa COVID-19 tracker, upang magamit sa pagdedesisyon kung magpapatupad ng granular lockdowns upang mapigilan ang community transmission.
Sa ngayon, bagaman wala pang kaso ng monkeypox sa Makati City ay patuloy naman ang pakikipag-ugnayan ng City Epidemiology and Surveillance Unit (CESU) sa Research Institute for Tropical Medicine (RITM) para sa testing ng virus.
Hinimok ng isang kongresista ang Malakanyang na isama sa panukalang 2023 National Budget, ang dagdag na 25 billion pesos para mapondohan ang karagdagang 500 buwanang pension para sa mga indigent senior citizens.
Ayon kay Surigao del Sur Rep. Johnny Pimentel, kailangang magkaroon ng sapat na pondo ang gobyerno upang mapunan ang karagdagang halaga sa pagbibigay ng health maintenance needs lalo na ngayong tumataas ang presyo ng bilihin.
Nabatid na sa ilalim ng section 25 ng batas, hindi pwedeng dagdagan ang panukalang budget pero pwede itong bawasan.
Kaya paliwanag ni Pimentel na mas mabuting isama na sa susunod na panukalang pondo ang 25 billion pesos na dagdag.
Nitong Agosto lamang naging ganap na batas ang Republic Act no. 11916 kung saan ini-akyat sa 1000 mula 500 pesos ang monthly pension ng mga matatanda.
Magde-deploy ang Bureau of Jail Management and Penology (BJMP) ng 1,000 personnel na tutulong sa brigada eskwela ng Department of Education (DEPED).
Ayon kay BJMP Chief Jail Director Allan Iral, tutulong ang mga ito sa pagsasagawa ng cleanup drives at volunteer works para sa pagbubukas ng klase sa Agosto a-22.
May tema ang brigada eskwela ngayong taon na “Tugon sa Hamon ng Ligtas na Balik-Aral” na nagsimula nitong Agosto a-uno at magtatagal hanggang a-26.
Nakagawian na ng BJMP na sumusporta sa DEPED lalo na sa pagdaraos ng brigada eskwela.
Sa katunayan noong Agosto a-11 ay inatasan ni Interior Secretary Benjamin Abalos Jr. ang Department of the Interior and Local Government (DILG) at iba pang Local Government Unit (LGU) na tumulong sa paghahanda ng mga paaralan para sa pagbubukas ng school year 2022-2023.
Patuloy pa rin ang pagbuga ng mainit na likido ng bulkang Taal sa Batangas.
Batay sa datos ng Philippine Institute of Volcanology and Seismology (PHILVOCS) hanggang kaninang alas-otso ng umaga, umabot na sa 2,100 metrong plumes ang ibinuga ng bulkan.
Papalo naman sa 3,945 tonelada ng sulfur dioxide ang pinakawalan ng bulkan hanggang kahapon.
Maliban sa mainit na likido, nakitaan din ng volcanic smog o vog ang taal volcano na nakapaligid dito.
Sa huling tala, nakataas pa rin ang alert level 1 sa bulkang Taal pero wala nang naitalang pagyanig sa paligid nito.
Patuloy namang ipinagbabawal ang pagpasok sa apat ng kilometrong permanent danger zone ng bulkan lalo’t maaaring maganap ang biglaang pagputok ng steam o phreatic explosions.
Asahan na sa mga susunod na buwan ang taas-singil sa kuryente sa bansa.
Ito ay matapos aprubahan ng Energy Regulatory Commission (ERC) ang petisyon ng National Power Corporation (NAPOCOR) na i-recover ang 2.6 billion pesos shortfall sa rural electrification subsidy noong 2012.
Sa resolusyong inilabas na may petsang Agosto a-kwatro, binigyan ng final authority ng ERC ang petisyon ng NAPOCOR na maibalik ang kulang sa Universal Charge-Missionary Electrification (UC-ME) noong 2012.
Nagkakahalaga ito ng mahigit 2.6 billion pesos o katumbas ng 0.0239 per kilowatt-hour.
Sa ilalim ng kautusan, aatasan din ang lahat ng Distribution Utilities (DUs) at National Grid Corporation of the Philippines (NGCP) na kolektahin sa mga consumers ang nawalang halaga sa loob ng 12 buwan o hanggang sa maipon na ito.
Aabot sa 152 pamilya ang nagpalipas ng gabi sa Evacuation Center sa Mandaue City, Cebu, matapos ang pag-apaw ng tubig ng Butuanon River.
Ayon sa Disaster Risk Reduction and Management Office (DRRMO), nagmula ang mga evacuees sa Sitio Laray, Barangay Umapad na nakaranas ng pagbaha matapos ang malakas na ulan nitong Sabado.
Katumbas ang bilang ng higit 700 indibidwal, kung saan 208 ang kabataan at 18 ang matatanda.
Sa ngayon, ito na ang ikalimang pagbaha sa lugar.
Maliban sa pagbaha, nakapagtala rin ng landslides sa Sitio Tagaytay, Barangay Kalunasan at sa Purok 5, Barangay Camputhaw na sumira ng maraming kabahayan.
Dead-on-the-spot ang isang motorcycle rider matapos itong sumalpok sa bangketa sa Commonwealth Avenue sa Quezon City.
Kinilala ng Metropolitan Manila Development Authority (MMDA) ang biktima na si Mark Manlangit, 32 anyos at residente ng Bagong Silang, Caloocan City.
Ayon sa MMDA, nangyari ang aksidente dakong alas-sais y medya kanina sa tapat ng opisina ng Commission on Audit (COA).
Patungo sanang Northbound Lane si Manlangit nang bumangga ito sa gutter dahilan para siya ay tumilapon.
Ang matinding tama sa ulo ang ikinasawi ng biktima nang tumilapon ang kaniyang helmet.
Sa ngayon, kinuha na ng punerarya ang labi ng biktima habang kinolekta ng MMDA at Quezon City Police District (QCPD) ang motorsiklo nito para sa kaukulang disposisyon.
Mawawalan ng kuryente ang bohol sa susunod na Sabado, Agosto a-20 matapos masira ng bagyong Odette ang Energization Towers ng lalawigan.
Batay sa abiso ng National Grid Corporation of the Philippines (NGCP), tatagal ng 15 oras ang power interruption sa lugar na magsisimula alas-kwatro ng madaling-araw at matatapos ng alas-siyete ng gabi.
Apektado nito ang mga consumers ng Bohol Light Inc. sa Tagbilaran City at Bohol Electric Cooperative Inc. (BOHECO) 1 at 2.
Ipatutupad ang shutdown sa Maasin-Ubay-Corella 138 Kilovolt (KV) upang maayos ng NGCP ang tatlong permanenteng tower ng 138-KV Towers na 43, 22 at 105.
Patuloy na naghahanda ang Light Rail Transit Authority (LRTA) sa pagdagsa ng nasa 25K estudyante kada araw para sa muling pagbubukas ng klase sa Agosto 22.
Kaugnay nito, muling sinabi ni LRTA administrator Hernando Cabrera na maaaring i-avail ng mga mag-aaral ang libreng sakay sa LRT 2 mula Agosto a-22 hanggang Nobyembre a-5.
Kailangan lamang aniya ng mga ito na magpakita ng School ID o orihinal na kopya ng enrollment form sa passenger assistance booth para makakuha ng single journey ticket.
Hindi naman kabilang sa nasabing programa ng gobyerno ang nasa graduate school at magulang o guardians ng mga mag-aaral.
Samantala, magpapatuloy ang 20% diskuwento para sa mga estudyante, senior citizens, at persons with disability (PWD) sa Nobyembre 6.