NATIONAL NEWS

Magsasagawa ng briefing ngayong araw, ang House Committee on Good Government and Public Accountability, para pag-usapan ang mga isyung nakapaloob sa importasyon ng asukal sa bansa.

Ayon kay Committee chairperson at San Jose Del Monte Representative Florida Robes, nais nilang maliwanagan hinggil sa totoong nangyari sa pag-isyu ng resolusyon para sa pag-angkat ng bansa ng 300, 000 metriko toneladang asukal na siyang tinutulan ni Pangulong Ferdinand ‘Bongbong’ Marcos Jr.

Sinabi ni Robes na mahalaga ang transparency at accountability sa magandang pamamahala kaya pursigido ang Komite na suriin itong mabuti.

Matatandaang nagbitiw sa puwesto si Agriculture Undersecretary Leocadio Sebastian matapos niyang ipag-utos na bigyan na ng green light ang panukalang mag-import ang bansa ng asukal.

Bumaba na ang farmgate price ng baboy at manok sa Pilipinas.

Ayon kay Kristine Evangelista, Spokesperson at Undersecretary ng Consumer Affairs ng Department of Agriculture, base sa kanilang price monitoring nitong Agosto a-12, nasa P330 na ang retail price para sa Kasim, P340 sa liempo, at P180 sa whole dressed chicken.

Tiniyak naman ni Evangelista ang pagpapaigting ng mga programa na makatutulong sa pagpigil ng inflation sa bansa.

Sinabi ni Evangelista na ang Agriculture Department ang nagbibigay ng iba’t ibang interbensyon at suporta sa mga producer upang mapataas ang kanilang produksyon.

Bukod pa dito, sila rin ang nagpoprotekta sa mga producer at consumer lalo na ngayong tumataas ang presyo ng mga bilihin sa merkado.

Hindi makikialam si Pangulong Ferdinand “Bongbong” Marcos Jr. sa nagpapatuloy na imbestigasyon sa paglalabas ng unauthorized at illegal resolution para sa importasyon ng 300, 000 metric tons ng asukal.

Ayon kay Press secretary Trixie Cruz-Angeles, hahayaan ng Pangulo ang kinauukulan na imbestigahan ang naturang isyu pero dapat patas ang gagawing imbestigasyon.

Matatandaang nag-isyu ng isang resolusyon ang Sugar Regulatory Administration (SRA) para sa importasyon ng asukal na hindi umano inaprubahan ng punong-ehekutibo na kasalukuyang Kalihim ng Department of Agriculture at Chairman din ng SRA.

Iginiit ni Cruz-Angeles na sakaling matapos na ang fact finding sa kaso at may makitang matibay na ebidensiya, kabilang sa kanilang sisilipin kung may pananagutang kriminal ang mga opisyal ng SRA na sangkot sa “illegal resolution.”

Posibleng ulanin ang Luzon partikular na ang MIMAROPA o Southwestern tagalog Region na binubuo ng Mindoro, Marinduque, Romblon, at Palawan.

Ayon kay PAGASA weather specialist Obet Badrina, mataas ang tiyansa na ulanin ang kanlurang bahagi ng Luzon kasama na ang Bataan at Zambales.

Magiging mainit naman ang panahon sa umaga pero asahan na makakaranas parin ng pag-ulan sa nalalabing bahagi ng bansa kasama na dito ang buong Metro Manila lalo na sa hapon hanggang sa gabi dahil parin sa thunderstorms.

Asahan parin ang maulap na kalangitan partikular na sa Western at Central Visayas dahil parin sa Southwest Monsoon o Hanging Habagat.

Magkakaroon naman ng isolated rain showers at thunderstorm sa Eastern Visayas habang magiging maulap parin ang kalangitan na may mga kalat-kalat na pag-ulan, pagkulog at pagkidlat sa Zamboanga Peninsula at Northern Mindanao habang isolated rain showers naman sa nalalabing bahagi ng Mindanao.

Agwat ng temperatura sa Metro Manila ay maglalaro sa 25°C hanggang 31°C habang sisikat naman ang haring araw mamayang 5:42 ng umaga at lulubog naman ito mamayang 6:19 ng hapon.

Dapat pataasin muna ang kaligtasan o immunity ng mga Pilipino laban sa COVID-19 bago alisin ang mga restriksyon sa bansa.

Ito ang inihayag ni Department of Health o DOH Officer-In-Charge Undersecretary Maria Rosario Vergeire kasunod ng mungkahi ng US Centers for Disease Control and Prevention (CDC) na tanggalin ang COVID-19 restrictions tulad ng physical distancing, quarantine at testing para sa mga asymptomatic na pasyente.

Aniya, unti-unting susundin ng bansa ang modelo ng Estados Unidos sa pagluluwag ng mga restriksyon sa COVID-19, pero kailangan munang mapataas ang immunity ng mga nasabing indibidwal.

Giit pa ni Vergeire na ang importante sa lahat ay mayroong layunin ang bansa na protektahan ang healthcare system at maiwasan ang pagdami ng severe at critical cases gayundin ang bilang ng mga nasasawi.

Batay sa pinakahuling datos ng DOH, nasa 72 million Filipinos na ang fully vaccinated kontra COVID-19 kung saan  17 million dito ang nakatanggap na ng booster shots.

Magsasagawa ng briefing bukas, Agosto a-15 ang House Committee on Good Government and Public Accountability, para pag-usapan ang mga isyung nakapaloob sa importasyon ng asukal sa bansa.

 Ayon kay Committee Chairperson at San Jose del Monte Representative Florida Robes, gusto nilang maliwanagan sa totoong nangyari sa pagpapalabas ng umano’y iligal na kautusan para sa pag-angat ng bansa ng 300,000 metriko toneladang asukal.

 Mahalaga aniya ang transparency at accountability sa magandang pamamahala kaya pursigido ang komite na suriin itong mabuti.

 Nitong Miyerkules, unang sinabi ni Press Secretary Trixie Cruz-Angeles na tumutol si Pangulong Ferdinand ‘Bongbong’ Marcos Jr. sa panukalang mag-import ang bansa ng asukal.

 Pero matapos nito ay kumalat ang isang “unauthorized” import document na nilagdaan ni Agriculture Undersecretary Leocadio Sebastian, na nag-uutos na bigyan na ng green light ang panukala.

 Agad naman nagbitiw sa pwesto si Sebastian at inamin ang kaniyang pagkakamali, sabay ipinaabot sa pangulo ang kaniyang resignation letter.

Limitado muna ang gagawing aktibidad ni Pasig City Mayor Vico Sotto matapos itong operahan sa tuhod.

Pagkumpirma ni Mayor Vico sa kaniyang Facebook post, sinabi nito na sumailalim siya sa platelet-rich plasma procedure sa kaniyang dalawang tuhod.

Dahil dito, limitado muna ang paglalakad ng alkalde hanggang bukas, Agosto a-15.

Tiniyak naman ng opisyal na tuloy pa rin ang kaniyang mga aktibidad sa lungsod matapos ang kaniyang pagpapahinga.

Agad ding nagpasalamat si Mayor Vico sa kaniyang mga manggagamot na si Dr. Gar Eufemio na 10 taon na siyang nagpapagamot.

Si Mayor Vico ay tatlong taon ng alkalde sa Pasig City matapos magwagi ng 3-yeam term nitong May 9 elections.