NATIONAL NEWS

Kumbinsido ang isang eksperto na hindi kailangang maghigpit ang Pamahalaan sa mga turistang pumapasok sa Pilipinas sa kabila ng naitalang tatlong kaso ng monkeypox virus.

Ayon kay Rontgene Solante, isang infectious expert, mas epektibo kung papaalalahanan ang mga bumabiyahe na magi-ingat lalo na sa mga bansang marami nang kaso ng sakit.

Binigyang-diin naman ni Solante na mahalaga ang pagpapakita ng kanilang health information kung mayroon silang sintomas ng naturang virus.

Sa ngayon, paalala ni Solante sa publiko na ugaliing maghugas ng kamay at sundin pa rin ang mga health protocols kontra COVID-19 na panlaban din sa monkeypox virus. —sa panulat ni Hannah Oledan

Hindi na kwalipikadong mabigyan ng educational assistance ang mga benepisyaryong kasama na sa Pantawid Pamilyang Pilipino Program (4Ps).

Sa kabila ito ng naunang pahayag ni Department of Social Welfare and Development secretary Erwin Tulfo, na kasama rin ang mga 4Ps benepiciary sa mabibigyan ng ayuda ngayong pasukan.

Sa panayam ng DWIZ kay Tulfo, sinabi nito na ipinabatid sa kaniya ng mga Opisyal ng Assistance to Individuals in Crisis Situation na nakatanggap na ng ayuda ang mga 4Ps beneficiary mula sa DSWD.

 Kaya imbes na sa pamilyang kalahok, sa mga kabataan na lang ibibigay ang ayuda.

  Para sa mga DSWD beneficiaries lang yun, yan yung mga unconditional cash transfer, yun bang mga nagaantay para makapasok sa 4Ps office…, mga social pensionnaire… mga apo ng social pensionnaire, sila yun, ang ginawa natin, binuksan natin sa lahat, paano naman iyong mga tricycle drivers, paano naman yung jeepney  drivers, grab drivers, mga katulong, kusinera, binuksan natin, bagama’t ako’y winarningan ng mga matatanda na sa DSWD… ” Sir magkakaproblema ka rito”, ang sabi ko naman tanggapin ko lang ang problema, gusto lang natin na lahat mapasama.” —DSWD secretary Erwin Tulfo sa panayam ng DWIZ

Pansamantala munang inilipat sa Online class ang klase sa University of Southern Mindanao sa Bayan ng Kabacan, Cotabato.

Ito ay matapos magpositibo sa COVID-19 ang 13 mag-aaral nito na pumapasok sa face-to-face classes.

Ayon kay Geoffray Atok, Vice President for Academic Affairs ng USM, walo sa mga nagpositibo ay mula sa College of Nursing habang lima sa College of Veterinary Medicine.

Regular itong pumapasok sa klase pero noong nakaraang araw ay isinugod sa ospital matapos makitaan ng sintomas at dito na nalaman na positibo pala sa sakit.

Nasa 17 mag-aaral ang pumapasok sa in-person classes sa Kabacan na hindi naman ini-lockdown dahil sa nangyari.

Sa ngayon, inatasan na ni Atok ang dekana ng mga kolehiyo na magsagawa ng disinfection sa mga silid-aralan at pasilidad.

Ipatutupad muli ng MRT-3 ang segregation scheme sa mga tren simula ngayong linggo, Agosto 21, at isang araw bago magbukas ang klase bukas, Lunes.

Ang Segregation scheme ay ang paglalaan ng unang dalawang pintuan ng unang bagon para sa mga senior citizens, Persons with Disabilities (PWDs), buntis, at mga indibidwal na may kasamang bata.

Nakalaan naman ang huling tatlong pintuan ng unang bagon para sa mga babaeng pasahero, kasama ang mga babaeng estudyante.

Samantala, ang ikalawa at ikatlong bagon ng tren ay bukas para sa lahat ng uri ng pasahero.

Tiniyak naman ng MRT-3 na makakakuha ng 20% fare discount ang mga estudyanteng pasahero sa buong oras ng operasyon ng MRT-3.

Kailangan lamang nilang ipakita ang Valid student ID o orihinal na enrolment/registration form sa pagbili ng ticket.

Nakatuklas ng isang bagong species ng daga ang Department of Environment and Natural Resources (DENR) sa Davao Oriental.

May kulay itong dark brown, may malambot na balahibo, maliit na mata at tenga, at matulis ang nguso.

Kadalasang kinakain ng bagong klase ng daga ang earthworm at nakatira sa pugad tulad ng isang Philippine Eagle.

Sa ngayon, tinawag ng DENR ang bagong species na Baletemys Kampalili hango sa salitang griyego na ang ibig sabihin ay Daga; “Balete” mula sa pumanaw na Pilipinong field biologist na si Danilo Balete, at “Kampalili” na pangalan ng bundok kung saan ito nakita.

Sugatan ang 29 na katao sa Zamboanga City matapos magkaroon ng stampede sa pila sa pagkuha ng educational assistance mula sa Department of Social Welfare and Development (DSWD).

Ayon sa Zamboanga LGU, kabilang sa mga nasugatan ang 2 lalaki at 27 babae na nadaganan ng mga nag-uunahang makapasok sa gate ng City Coliseum.

Nabatid na noong gabi pa ng Biyernes pumila ang karamihan sa mga mag-aaral upang makakuha ng ayuda.

Samantala, ganito rin ang naranasahan sa pagkuha ng educational assistance sa Bacolod City kung saan halos buong araw kahapon na nagkagulo ang mga tao.

Reklamo ng mga pumila, walang maayos na sistema sa pamamahagi at wala ring humarap sa mga tao upang magpaliwanag.

Kada Sabado hanggang Setyembre 24 magtatagal ang pamamahagi ng educational assistance sa bansa.

Inanunsyo ng Department of Health (DOH) na mananatili sa Alert level 1 ang National Capital Region (NCR) at ilang lugar sa bansa, habang ibinaba naman ang alerto sa iba pang mga lalawigan simula August 16 hanggang 31.

Ayon sa DOH, na siyang Chairman ng Inter-Agency Task Force for the Management of Emerging Infectious Diseases (IATF-EID), na kabilang sa mga inilagay na sa Alert level 1 ang Occidental Mindoro at Camarines Sur, at mga Munisipalidad ng Poro, Cebu; Talalora, Western Samar; Pualas, Lanao del Sur; at Binidayan, Lanao del Sur.

Ibinaba ng DOH ang alerto sa mga lugar na ito matapos makitang nasa low risk na ang kanilang case classification at total beds utilization rates, habang tumaas din ang kanilang vaccination rate para sa mga senior citizen.

Kabilang sa mga nasa Alert level 1 sa Luzon, ang Cordillera Administrative Region na kinabibilangan ng  Abra, Apayao, Kalinga, Mountain Province, at Baguio City; sa Region I, ang Ilocos Norte, Ilocos Sur, La Union, Pangasinan, at Dagupan City; Region II: Batanes, Cagayan, Isabela, Nueva Vizcaya, Quirino, at City of Santiago; Region III: Aurora, Bataan, Bulacan, Nueva Ecija, Pampanga, Tarlac, Zambales, Angeles City, at Olongapo City; Region IV-A: Batangas, Cavite, Laguna, Rizal, at Lucena City; Region IV-B: Marinduque, Occidental Mindoro, Oriental Mindoro, Romblon, at Puerto Princesa City; Region V: Albay, Camarines Sur, Catanduanes, Naga City, at Sorsogon.

Ilan ding mga area sa Visayas ang nasa Alert level 1 gaya ng Region VI na binubuo ng Aklan, Capiz, Guimaras, Iloilo Province, Bacolod City, at Iloilo City; sa Region VII ang Siquijor, Cebu City, Lapu-Lapu City, at Mandaue City; at sa Region VIII, ang Biliran, Eastern Samar, Southern Leyte, Ormoc City, at Tacloban City.

Habang ang mga lugar naman sa Mindanao na nasa Alert level ay ang Zamboanga City sa Region IX; kasama na ang Region X na kinabibilangan ng Camiguin, Bukidnon, Misamis Occidental, Misamis Oriental, Cagayan de Oro City, at Iligan City; sa Region XI ang Davao City at Davao Oriental; sa Region XII ang South Cotabato at General Santos City; sa Caraga, Agusan del Norte, Agusan del Sur, Surigao del Sur at Butuan City; kabilang na ang Cotabato City sa BARMM.

Otomatiko namang nasa Alert level 2 ang mga hindi nabanggit  na lugar.

Iniulat ng Department of Health (DOH) na nakapagtala kahapon ang bansa ng 3, 715 New COVID-19 infections habang bumaba naman sa 36, 146, ang aktibong kaso.

Dahil dito, pumalo na sa kabuuang 3, 852, 170 ang naitalang bagong kaso ng DOH, samantalang nabawasan naman ng 1, 079 ang aktibong kaso mula sa 37, 225 noong nakalipas na Biyernes.

kabilang sa mga rehiyon na nakapagtala ng mataas na virus cases sa nagdaang dalawang linggo ang National Capital Region na mayroong 14, 206 cases na sinundan ng CALABARZON na may naitalang 8, 641, Central Luzon – 4, 842, Western Visayas – 2, 572, at Cagayan Valley – 2, 177.

Umabot naman sa 4, 753 ang new recoveries, dahilan upang umakyat sa 3, 754, 716 ang kabuuang bilang ng mga gumaling mula sa COVID-19.

Umakyat naman sa 61, 308 ang death toll sa buong bansa makaraang madagdagan ito ng forty-seven new fatalities.

Ongoing ang mga isinasagawang transition sa pagitan ng Department of Social Welfare and Development at National Commission of Senior Citizens (NCSC).

Ito’y para sa paglilipat ng mga tungkulin na may kinalaman sa usapin ng mga lolo’t lola.

Sa ginanap na Malacañang briefing, inihayag ni DSWD sec. Erwin Tulfo na tuloy-tuloy ang pakikipagpulong nila sa mga opisyal ng NCSC na pinamumunuan ni Chairman Franklin Quijano.

Maliban sa Administrative Functions, kabilang rin anya sa kanilang mga tinatalakay ang pondo at lawak ng trabaho ng NCSC.

Sinabi ng Kalihim, sa ngayon, kinukumpleto pa ng NCSC ang kailangang mga tao sa kanilang opisina.

Itinatag ng dating Duterte Administration ang NCSC sa ilalim ng Office of the President upang matutukan ang mga kinakailangang serbisyo para sa mga senior citizen.

Kasama sa inaasahang tungkulin na gagampanan ng National Commission of Senior Citizens ang pamamahagi ng social pension sa mga mahihirap na lolo’t lola.