NATIONAL NEWS

Itinaas ng Philippine Institute of Volcanology and Seismology (Phivolcs) ang Bulkang Mayon sa Alert level 1 o low level unrest mula sa Alert Level zero.

Ito ay matapos makitaan ng bahagyang pamamaga ang bulkan dahil sa pag-akyat ng volcanic gas.

Batay sa obserbasyon ng Phivolcs, may average na 688 tonelada kada araw na sulfur dioxide ang ibinubuga ng Mayon.

Naitala rin ang mahihinang pagyanig sa bulkan noong Mayo 26 hanggang Hunyo 20.

Mahigpit namang ipinagbabawal ang pagpunta sa 6-kilometer permanent danger zone dahil posible ang steam driven o phreatic eruption.

Magkaka-baby na ang aktres na si Bianca King.

Sa isang Instagram post, ibinahagi ni king ang larawan ng kaniyang baby bump.

Ayon sa aktres, hindi naging madali ang kaniyang journey para magkaroon ng anak dahil nasa mid-late 30’s na siya.

Aniya, pinlano rin niyang sumailalim sa in vitro fertilization (IVF).

Nagpapasalamat naman si King sa kaniyang asawa na si Ralph Wintle dahil sa matiyagang paghihintay nito para maging isa siyang ganap na ina.

Matatandaang ikinasal si King at Wintle noong Hunyo ng nakaraang taon.

Isinulong ng isang kongresista ang panukalang magkaroon ng hiwalay na utos sa importasyon ng asukal para sa industriya ng inumin.

Ito ay para hindi makaapekto ang shortage ng asukal sa presyo nito sa local market.

Ayon kay San Jose Del Monte City Representative Florida Robes, halos 50% ng inumin sa bansa ay may sangkap na imported srefined sugar.

Dahil dito, inaasahang magiging malaki dagok sa kanila kung itataas ang presyo sa kada kilo ng asukal.

Una rito, sinabi ng Beverage Giant Coca-Cola Beverages Philippines Inc. na aabot sa 450 thousand metriko tonelada ng premium refined sugar ang kanilang kailangan para sa kanilang produkto.

Sa ngayon, sa oras na maisabatas ang panukala, mismong ang sugar regulatory administration ang magpapatupad ng mandato upang hindi makaapekto ang sugar shortage sa beverage industry at local consumers.—sa panulat ni Hannah Oledan

Tiniyak ng grupo ng mga supermarkets na sapat ang suplay ng asukal sa merkado sa kabila ng paglobo ng presyo nito.

Sa panayam ng DWIZ, sinabi ni Steven Cua, Presidente ng Philippine Amalgamated Supermarkets Association, na sa loob ng dalawang buwan, pumalo na sa isandaang piso ang kada kilo ng asukal mula sa P72.50 noong Hunyo.

Dahil dito, ramdam na ang kakulangan sa supply ng matatamis na inumin tulad ng soft drinks.

May mga ilang softdrinks naman sa merkado ang hindi na available at may iilang distributors din ang bigong makapag deliver ng nasabing produkto.

Sa ngayon, bilang-solusyon sa problema sa asukal, inilatag ni Cua ang pagkakaroon ng long term planning para masolusyunan ito.—sa panulat ni Hannah Oledan

Pangungunahan ni Vice President at Education secretary Sara Duterte ang pagbubukas ng klase sa bansa sa Lunes, Agosto 22.

Ayon sa DepEd, bibisita ang Pangalawang Pangulo sa Dinalupihan Elementary School sa Bataan bilang bahagi ng National School Opening Day Program na pamumunuan ng Schools Division Office.

Magbibigay ng mensahe si Duterte sa event kaugnay sa panibagong school year at panawagan nito ng suporta sa mga stakeholders.

Mapapanood ala-1 ng hapon ang event via livestream sa Facebook Page ng DepEd, Youtube Channel, at DepEd Philippines Website. —sa panulat ni Hannah Oledan