NATIONAL NEWS

Iniulat ng Department of Health (DOH) na nakapagtala kahapon ang bansa ng 3, 715 New COVID-19 infections habang bumaba naman sa 36, 146, ang aktibong kaso.

Dahil dito, pumalo na sa kabuuang 3, 852, 170 ang naitalang bagong kaso ng DOH, samantalang nabawasan naman ng 1, 079 ang aktibong kaso mula sa 37, 225 noong nakalipas na Biyernes.

kabilang sa mga rehiyon na nakapagtala ng mataas na virus cases sa nagdaang dalawang linggo ang National Capital Region na mayroong 14, 206 cases na sinundan ng CALABARZON na may naitalang 8, 641, Central Luzon – 4, 842, Western Visayas – 2, 572, at Cagayan Valley – 2, 177.

Umabot naman sa 4, 753 ang new recoveries, dahilan upang umakyat sa 3, 754, 716 ang kabuuang bilang ng mga gumaling mula sa COVID-19.

Umakyat naman sa 61, 308 ang death toll sa buong bansa makaraang madagdagan ito ng forty-seven new fatalities.

Ongoing ang mga isinasagawang transition sa pagitan ng Department of Social Welfare and Development at National Commission of Senior Citizens (NCSC).

Ito’y para sa paglilipat ng mga tungkulin na may kinalaman sa usapin ng mga lolo’t lola.

Sa ginanap na Malacañang briefing, inihayag ni DSWD sec. Erwin Tulfo na tuloy-tuloy ang pakikipagpulong nila sa mga opisyal ng NCSC na pinamumunuan ni Chairman Franklin Quijano.

Maliban sa Administrative Functions, kabilang rin anya sa kanilang mga tinatalakay ang pondo at lawak ng trabaho ng NCSC.

Sinabi ng Kalihim, sa ngayon, kinukumpleto pa ng NCSC ang kailangang mga tao sa kanilang opisina.

Itinatag ng dating Duterte Administration ang NCSC sa ilalim ng Office of the President upang matutukan ang mga kinakailangang serbisyo para sa mga senior citizen.

Kasama sa inaasahang tungkulin na gagampanan ng National Commission of Senior Citizens ang pamamahagi ng social pension sa mga mahihirap na lolo’t lola.

Pumalo sa mahigit 27 million students ang nagpa-enroll ilang araw bago ang tuluyang pagbabalik ng face to face classes bukas, araw ng Lunes, August 22, 2022.

Ayon sa Department of Education (DepEd), as of August 19, nasa kabuuang 27, 158, 578 na mga estudyante ang nagparehistro, kasunod narin ng nagpapatuloy na enrollment hanggang sa pagbubukas ng klase.

Aabot naman sa 23, 029, 151 students ang nagpa-enroll sa in-formal education, habang 4, 129, 427 students ang nagpatala para sa early registration.

Nakuha ng CALABARZON ang pinakamataas na number of registrants na umabot sa 3, 709, 599, sinundan ng Central Luzon – 2,810,330 at National Capital Region na mayroong 2, 406, 014 na mga enrollees.

Muling ipinaalala ng DepEd na maaring gawin ang pagpapa-enroll sa mga estudyante sa pamamagitan ng in-person, remote, at dropbox forms.

Maari ding magpatala ang mga mag-aaral ng Alternative Learning System o ALS via Online o In-person.

Una nang sinabi ng ahensya na hanggang sa Oktubre na lamang papayagan ang blended at full-distance learning dahil simula November 2, kailangan nang bumalik sa face to face classes ang lahat ng pampubliko at pribadong paaralan sa bansa.

Nasabat ng mga otoridad ang halos 60, 000 bags ng mga hinihinalang hoarded sugar mula sa apat na bodega sa Guiguinto, Bulacan.

Ayon sa Office of the Press Secretary (OPS), ininspeksyon ng  Bureau of Customs (BOC) personnel ang apat na warehouse sa T12 Polo Land, Barangay Tabang, kahapon.

Dito, nadikskubre ng mga otoridad ang mga imported na asukal na mula sa Thailand at may timbang na 50 kilos bawat sako.

Pahayag ng OPS, halos punuan ang dalawang bodega, habang umabot naman hanggang sa bubong ang pinagpatung-patong na mga saku-sakong asukal sa isang warehouse.

Sinabi pa ng ahensya na base sa pahayag ng warehouse caretaker, dumating sa kanilang bodega ang thai sugar nitong nakalipas na biyernes mula sa Manila International Container Terminal (MICT).

Inamin din umano ng caretaker na alinsunod sa Sugar Order No.3 na inisyu ng Sugar Regulatory Board noong Pebrero ang ginamit nilang permit kaya’t nakapag-angkat sila ng libu-libong sako ng mga nasabat na Thai sugar.

Dagdag pa ng OPS, nagsasagawa na ngayon ng beripikasyon ang mga opisyal ng Customs kaugnay sa legalidad ng mga importation documents na iprinesenta ng caretaker ng mga bodega ng asukal sa Guiguinto, Bulacan.

Samantala, napigilan naman ng mga ahente ng BOC sa Subic Port, Zambales ang pagpasok ng hinihinalang smuggelled na asukal na aabot sa 7,021 metric tons matapos mapag-alamang recycled ang import permit na ginamit para dito.

Una nang sinabi ni Press Secretary Trixie Cruz-Angeles, na tuloy-tuloy ang mga isinasagawang pag-iinspeksyon ng BOC at ng iba pang kinauukulang ahensya ng gobyerno sa mga imbakan ng asukal, alinsunod sa pinaigting na kampanya ni Pang. Ferdinand Marcos Jr., laban sa mga illegal na importasyon ng mga produktong pang-agrikultura.

Matumal ang bentahan ng asukal sa ilang pamilihan sa Metro Manila.

Ito ay sa gitna ng mataas na presyo na naglalaro sa 95 pesos hanggang 100 pesos kada kilo para sa puting asukal.

70 pesos naman ang washed sugar habang 68 pesos hanggang 70 pesos sa brown sugar.

Dahil dito, lumipat na sa paggamit ng flavored powder ang ilang samalamig vendor.

Malulugi kasi aniya ang kanilang negosyo kung patuloy pa rin silang gagamit ng asukal.

Mababatid na ilang kompanya na rin ang naapektuhan dahil sa mataas na presyo ng naturang produkto.

Muling ipatutupad ng pamunuan ng Metro Rail transit line 3 o MRT 3 ang segregation scheme na magbibigay ng eksklusibong access sa unang dalawang pinto ng unang bagon para sa mga senior citizen, Persons with Disability (PWDs), buntis at may mga kasamang bata simula bukas.

Anila, ang hakbang ay napapanahon para sa muling pagbubukas ng klase sa lunes, Agosto 22.

Kaugnay nito, maaaring mag-avail ng 20% sa pamasahe ang mga estudyante, kailangan lamang ipakita ang identification cards o orihinal na kopya ng enrollment forms habang bumibili ng ticket sa booths ng naturang tren.

Samantala, ipatutupad ng pamunuan ng MRT 3 ang “seven commandments” para maiwasan ang pagkalat ng COVID-19 kabilang dito ang pagsusuot ng face masks, hindi pagsasalita at pagkain sa loob ng tren, pagsunod sa physical distancing, pagtitiyak na may sapat na bentilasyon at ang regular na pagdi-disinfect sa tren.

Humingi ng paumanhin si Department of Social Welfare and Development (DSWD) secretary Erwin Tulfo sa mga mag-aaral at magulang na hindi nakatanggap ng educational assistance sa kabila ng pagpila ng mga ito sa batasan complex sa Quezon City ngayong araw.

Ayon sa kalihim, naghahanap na sila ng solusyon para maayos ang pamamahagi ng cash aid.

Sinabi din ni Tulfo na plano ng kagawaran na ibaba ang pera sa mga lokal na pamahalaan lamang at hindi sa mga barangay.

Nabatid na maraming estudyante at magulang ang pumila ng alas-singko pa lamang ng hapon nitong biyernes para makaabot sa cut-off ngayong araw.

Una ring inanunsyo ng DSWD na tuwing sabado hanggang Setyembre 24 ipapamahagi ang financial assistance sa mga mahihirap na mag-aaral.

 Muling bumuo si Pangulong Ferdinand Marcos Jr. ng sugar regulatory board kasama ang tatlong bagong talagang opisyal at mga miyembro.

Itinalaga ni Marcos si David John Thaddeus P. Alba bilang acting admininistrator ng SRA.

Papalitan ni Alba si Former SRA administrator Hermenegildo Serafica na umalis sa pwesto kaugnay sa nasabing usapin.

Kabilang din sa mga bagong itinalagang miyembro ng pangulo sina Pablo Luis Azcona at Ma. Mitzi Mangwag.

Samantala, ginawa ng punong ehekutibo ang appointment sa gitna ng kontrobersyal na sugar order no. 4 na nagpapahintulot sa pag-angkat ng tatlong daang libong metrikong tonelada ng asukal na kalaunan ay idineklarang “ilegal” dahil wala itong approval ng pangulo.

Kinumpirma ng Philippine Navy na nag-stop over sa Guam ang BRP Antonio Luna habang pabalik ng bansa.

Ito’y kasunod ng matagumpay na pakikilahok nito sa katatapos na Rim of the Pacific o RIMPAC Naval Exercise sa Hawaii.

Dumaong doon ang barko ng Navy para sa pag-replenish ng mga supply at para makapagpahinga ang mga tauhan ng Naval Task Group.

Pahayag ni Navy Spokesperson Commander Benjo Negranza, ang pagtanggap sa kanila ng Guam ay testamento sa matagal na pagkakaibigan ng dalawang bansa.

Masayang tinanggap ni AFP Chief of Staff Lt. Gen. Bartolome Vicente Bacarro ang ilang matataas na opisyal ng militar ng Australia at Estados Unidos sa pagbisita ng mga ito sa AFP General Headquarters sa Camp Aguinaldo, Quezon City.

Paliwanag ni AFP Public Affairs Office Chief Col. Jorry Baclor, malinaw na ito’y pagkakataon para mapatatag ang magandang relasyon ng magkaalyadong bansa.

Kabilang sa mga bumisita sa AFP sa magkahiwalay na okasyon sina Australian Defense Force Chief of Operations Lt. Gen. Greg Bilton at United States Pacific Fleet Commander Admiral Samuel Paparo.