NATIONAL NEWS

Isinusulong ni Ilocos Norte First District Rep. Ferdinand Alexander “Sandro” Marcos ang pagtatayo ng mga specialty hospitals sa Northern Luzon.

Sinabi ni Marcos na sa ganitong paraan ay hindi na kailangang bumiyahe pa-Maynila ang mga pasyenteng nangangailangan ng special medical services.

Dahil dito, ipinaliwanag ng anak ni Pangulong Ferdinand “Bongbong” Marcos Jr. na mahalagang magkaroon ng mga specialty hospitals sa rehiyon na katulad ng Philippine Health Center, National Kidney and Transplant Institute, Lung Center of the Philippines, Philippine Children’s Medical Center, Philippine Orthopedic Center, at Philippine Cancer Center.

Malayo pa sa target na 23.8 milyong Pilipino na natuturukan ng booster shot.

Ito’y matapos makapagtala pa lamang ng aabot sa 1, 725, 547 na indibidwal ang nakatatanggap ng COVID-19 booster shot sa ilalim ng PinasLakas campaign ng pamahalaan.

Sinabi ni DOH Officer In Charge Maria Rosario Vergeire, patuloy aniya ang pagpapaigting ng kanilang mga estratehiya upang dumami ang magpabakuna at mahikayat ang taumbayan na tumanggap ng booster dose.

Sa ngayon ay nasa sa higit 18, 900 na ang PinasLakas vaccination sites sa buong bansa.

Samantala, nagbabala naman si Vergeire na posibleng tumaas ang bilang mao-ospital sa darating na Setyembre o Oktubre kapag nagpatuloy ang mababang booster turnout ng bansa.

Nagsagawa ang ilang paaralan sa Metro Manila ng dry run sa pagpapatupad ng COVID-19 health protocols.

Ito’y bilang paghahanda sa pagbabalik ng face to face classes sa Lunes, August 22.

Sa Padre Jose Burgos Elementary School sa Manila, ilang mga guro ang nagturo sa mga estudyante ng mga step by step process ng COVID-19 health protocols bago pumasok sa paaralan.

Bago pumasok sa Entrance ng School, kinakailangan na mag-alcohol muna ang mga estudyante at saka didiretso sa Covered Court upang pumila ng may physical distancing para sa pagpasok sa kanilang mga silid-aralan.

Bago pumasok ng classrooms, maghuhugas ng kamay ang bata at ichi-check ang kanilang temperatura.

Ganito ring proseso ang isinagawang dry run ng mga Grade 1 at Grade 2 students ng San Rafael School sa Navotas City.

Patuloy naman ang pagpapaalala ng Department of Education (DepEd) sa kahalagahan ng pagsunod sa health protocols.

Hindi dapat makapampante ang publiko kahit tatlo pa lamang ang kaso ng monkeypox virus sa Pilipinas.

Sa isang panayam, sinabi ni Dr. Rontgene Solante, Head ng Adult Infectious Diseases and Tropical Medicine Unit ng San Lazaro Hospital na posible pang tumaas ang bilang, dahil sa higit sa tatlong indibidwal na nahawaan ng kaso.

Tinitignan naman ng eksperto ang pagkakaroon ng Chain of Transmission ng mga taong may sintomas sa pamamagitan ng close contact sa ibang tao.

Karaniwang sintomas ng monkeypox virus ay lagnat, kulani, pananakit ng katawan at ulo, at skin lesion sa paa at kamay.

Simula na ngayong araw ang pamimigay ng Department of Social Welfare and Development (DSWD) ng Educational Assistance para sa mga indigent na mga estudyante.

Ayon kay DSWD secretary Erwin Tulfo, anim na sabado gagawin ang pamimigay o hanggang September 24, mula alas-8 ng umaga hanggang alas-5 ng hapon.

Nagmula ang pondo sa P500 million na inihanda para sa Educational Assistance sa mga mahihirap na estudyante.

Ang mga nag-aaral sa Elementarya ay tatanggap ng P1, 000.00, P2, 000.00 sa Sekondarya, P3, 000.00 sa Senior High School at P4, 000.00 sa mga estudyante ng vocational course.

Para makakuha ng tulong pinansiyal, kailangan lamang ipakita ang Enrollment Certificate at School ID.

Aabot sa 10.5 milyong Covid-19 vaccines ang hinihingi ngayon ng Department of Health (DOH) sa CoVax facility, para ipampalit sa mga bakunang nasira sa bansa.

Ayon kay Health Officer-In-Charge Maria Rosario Vergeire, ibinase ang bilang sa mga kinakailangang COVID-19 vaccines doses sa bansa.

Sa Disyembre, inaasahang ide-deliver ang request na bakuna ng bansa na magpapatuloy hanggang sa Enero at Pebrero sa susunod na taon.

Samantala, hindi naman masabi ni Vergeire kung masusundan pa ang request na bakuna dahil ibinabase ang imbentaryo sa mga nasisirang bakuna.

Matatandaaang sa pagdinig noong Lunes sa Senado, sinabi ni Vergeire na nasa 8.42% ng bakuna sa Pilipinas ang nasira, dahil sa mababang bilang ng nagpapaturok ng booster shot.

Uulanin ang ilang bahagi ng bansa sa pagbubukas ng klase sa Lunes.

Ayon sa PAGASA, dulot ito ng Southwest Monsoon o Habagat na pinalakas ng Low Pressure Area (LPA) na nasa silangan ng Central Luzon.

Ang mga rehiyong uulanin hanggang sa Lunes ay ang Southern Luzon at Visayas.

Hindi naman nakikita ng PAGASA na magiging isang ganap na bagyo ang LPA na inaasahang lalabas sa bansa pagsapit ng Huwebes sa susunod sa linggo.

Nananatili pa rin sa low risk classification ng COVID-19 ang Pilipinas maliban sa Mindanao na nakitaan ng pag-plateau ng kaso.

Ayon kay Department of Health Officer-In-Charge Maria Rosario Vergeire, nasa 3.53 pa rin ang Average Daily Attack Rate (ADAR) sa bansa sa kada 100K populasyon.

Nasa ilalim naman ng moderate risk classification ang National Capital Region at Cordillera Administrative Region na may ADAR na 8.83 at 8.54 kada 100K populasyon.

Ang ADAR ay tumutukoy sa bilang ng mga indibidwal na nahahawa sa virus.

Sa huling datos ng DOH, 72.3 milyong Pilipino na ang fully vaccinated sa bansa.

Nasa 17.3 milyon naman ang nakatanggap ng unang booster habang 1.9 milyon ang nakatanggap ng second booster.

Nakapagtala ang Department of Health (DOH) ng 3, 748 bagong nahawa sa COVID-19 sa bansa kahapon.

Ayon sa DOH, bahagyang tumaas ang active cases na nasa 37, 225 kumpara sa 36, 115 noong Huwebes.

Nadagdagan naman ng 2, 591 ang mga gumaling, kaya’t umabot na sa 3, 749, 963 ang recoveries.

Ang COVID-19 death toll ay tumungtong na sa 61, 261 matapos madagdagan ng 40 kahapon.

Sa ngayon, umakyat na sa 3, 848, 449 ang total case load sa bansa.

All set na ang Department of Education (DepEd) sa pagbubukas ng klase sa Lunes.

Ayon kay Education spokesperson Atty. Michael Poa, nakahanda na ang kanilang mga safety features para matiyak na nasusunod ng mga paaralan ang ipinatutupad na minimum health protocols.

Dito ire-require ang mga paaralan na magkaroon ng stock ng face mask para ipamahagi sa mga mag-aaral o iba pang nangangailangan nito.

Sa huling datos ng DepEd, 19% pa lamang ng mga mag-aaral sa bansa ang nabakunahan kontra COVID-19.

Bilang solusyon, sinabi ng DOH na aabot sa 3, 131 vaccination sites na ipatatayo nila sa mga paaralan.

Pero paliwanag ni Poa, magkakaroon muna ng counselling sa mga magulang ng mag-aaral para malaman kung sino ang nais magpabakuna.