NATIONAL NEWS

Handa na nga ang mababang kapulungan ng kongreso para sa pagsisimula ng 2023 National Budget hearing bukas, Biyernes.

Nakatakdang talakayin bukas ang panukalang 5.268-billion pesos na Pambansang Pondo.

Batay sa abisong inilabas ng Kamara, magsisimula ang briefing sa pangunguna ng mga miyembro ng Development Budget Coordination Committee (DBCC),  Budget Secretary Amenah Pangandaman, Finance Secretary Benjamin Diokno, NEDA Secretary Arsenio Balisacan at BSP Gov. Felipe Medalla.

Habang nauna nang tiniyak ni House Speaker Martin Romualdez na magiging transparent ang budget process at sisiguraduhin nitong ang pambansang pondo ay epektibong tutugon sa mga pangangailangan ng taumbayan lalo na sa kalusugan, trabaho at seguridad sa pagkain.

Nabatid na target na maaprubahan ng mababang kapulungan  ang panukalang badyet bago October 1 na siyang unang recess ng Kamara na magtatagal hanggang November 6. —sa ulat ni Tina Nolasco (Patrol 11)

Nailigtas ng Philippine Coast Guard (PCG) ang tatlong mangingisda matapos lumubog ang kanilang motorbanca sa karagatang sakop ng San Nicolas Shoals sa Cavite.

Sinabi ng PCG, nagkaroon ng engine trouble ang motorbanca na sinabayan pa ng maalong karagatan at malakas na hangin.

Knilala ang mga mangingisda na sina Joel Dela Cruz Dimano Jr., 45 years old, Alexander Bababel 44 years old, at Joshua Morallos, 22 years old na pawang mga residente ng Mariveles, Bataan.

Nabatid na nakatanggap ang PCG Station Manila ng ulat mula sa PCG District NCR-Central Luzon hinggil sa tatlong mangingisda na naligtas ng nagdaang cargo vessel na MV Ever Pride.

Agad na nagtungo ang barko ng coast guard na BRP Malabrigo sa nasabing lokasyon para tumulong sa mga mangingisda.

Nasa maayos naman na kalagayan ang mga nakaligtas na mangingisda matapos suriin ng mga tauhan ng PCG Medical Service. —sa ulat ni Aya Yupangco (Patrol 5)

Humiling ang Malakanyang ng pang-unawa mula sa mga may-ari ng mga maliliit na groceries dahil sa epekto ng isyu sa suplay ng asukal.

Ito’y matapos umangal ang mga may-ari ng small time grocery dahil hindi umano nila kakayanin na mapanatili ang mababang presyo ng kada kilo ng asukal.

Kaugnay ito sa boluntaryong pagbaba ng mga supermarkets ng presyo ng asukal sa 70 pesos kada kilo mula sa dating 90 hanggang 110 pesos kada kilo.

Ngunit sinabi ni Press Secretary Trixie Cruz-Angeles, pansamantala lang naman ang 70 pesos kada kilong asukal at limitado lang din sa itinakdang dami.

Ibig sabihin, kapag naubos na ang volume ng asukal na binawasan ang presyo ay babalik na ulit ang presyo nito batay sa market prices.

Kung sakali man anyang mapalawig ito at labis na maapektuhan ang maliliit na groceries, tiniyak ni Angeles na magpapaabot ng tulong ang gobyerno.

Nagpaabot ng pakikiramay ang Department of Education (DepEd) sa pamilya ng isang gurong nasawi  matapos malunod sa baha sa Camarines Sur nuong Martes.

Sinabi ni DepEd Spokesperson Atty. Michael Poa, nakakalungkot umano ang nangyari sa guro na si Romeo Sison Jr. ng San Roque High School sa bayan ng Libmanan.

Aniya, kasama ng biktima ang co-teacher nito na si Gemmo Intia ng tinawid ang baha sa kasagsagan ng Bagyong Florita sakay ng kanilang bisekleta.

Dahil umano sa lakas ng agos ay hindi nakayanan ng biktima hanggang sa tangayin siya nito na kaniyang ikinalunod.

Nakikidalamhati naman ang DepEd sa pamilya ni Sison at tinitingnan na rin nila ang tulong na maaaring ibigay sa naulilang pamilya.

Isinailalim na sa state of calamity ang buong lalawigan ng Maguindanao.

Ito’y dahil sa naranasang baha na nagpalubog sa mahigit 100 barangay at sa hindi bababang 13 munisipalidad.

Ayon kay Maguindanao Vice Governor Bai Ainee Sinsuat, inirekomenda ang naturang deklarasyon ng Provincial Disaster Risk Reduction and Management Council (PDRRMO).

Sinabi ni Sinsuat na nasa 105 na barangay mula sa mahigit 500 barangay sa Maguindanao ang naapektuhan ng baha.

Pumalo naman sa 46,922 na pamilya o 234,610 na indibidwal sa 36 na bayan ang nawalan ng tirahan.

Samantala, anim na bayan ang una nang isinailalim ng kanilang mga opisyal sa state of calamity dahil sa paulit-ulit na pagbaha na dala ng malakas na pag-ulan mula noong huling linggo ng Hulyo at unang bahagi ng Agosto.

Inihayag ng Department of Social Welfare and Development (DSWD) na binaha na rin ang ilang bahagi ng Mindanao at Bicol kahit walang bagyo sa mga nabanggit na lugar.

Sinabi ni Secretary Erwin Tulfo, binabantayan na nila ang ilang lugar sa Zamboanga at Sarangani dahil sa pagbaha bunsod ng monsoon rains.

Maliban dito, may natanggap din silang ulat na apat na bahay na ang nawasak dulot ng pagbaha.

Aniya, nagpaabot naman agad ng tulong ang kanilang regional office sa mga naapektuhan ng baha at binigyan na rin ng tulong pinansyal para agad na makabangon sa inabot na pinsala.

Binaha din aniya ang ilang barangay sa Daraga at Camalig sa lalawigan ng Albay at inaasikaso na ang mga naapektuhang pamilya at residente sa naturang lugar.

Tiniyak ng Department of the Interior and Local Government (DILG) na paiigtingin nito ang police visibility sa gitna ng mga napaulat na insidente ng pagdukot at pagpatay sa bansa.

Sinabi ni DILG Chief Benhur Abalos na inatasan na niya si Philippine National Police Chief Gen. Rodolfo Azurin Jr., na magsumite ng report kaugnay sa mga napaulat na krimen.

Gayunman, lumalabas aniya na ilan sa mga naturang kaso ay luma nang insidente at pinagmumukhang bago.

Paliwanag ng Interior Secretary, mahirap na magkomento nang hindi pa nabeberipika ang mga ito.

Binigyang diin naman ni Abalos ang kahalagahan ng Barangay Forces tulad ng Barangay Anti-Drug Abuse Councils  at Peace and Order Councils bilang “multiplier factors” sa pagpapaigting ng presensya ng mga otoridad.

Nagbigay ng paalala ang Office of the Press Secretary (OPS) at Department of Health (DOH) sa mga biyahero na magtutungo sa Pilipinas.

Paglilinaw ng OPS at DOH, iisa lamang ang opisyal na One Health Pass, na accessible sa lahat at hindi nangangailangan ng anumang bayad.

Maaaring ma-access at mag-register sa pamamagitan ng https://www.onehealthpass.com.ph.

Pinayuhan naman ang publiko na maging vigilante sa pag-access sa mga website na may kaugnayan sa requirements sa pagpasok sa bansa.

Patay ang tatlong katao habang apat ang sugatan dahil sa Bagyong Florita.

Batay sa datos ng National Disaster Risk Reduction and Management Council (NDRRMC) kaninang alas-8:00 ng umaga, dalawa ang kumpirmadong nasawi na mula sa Cagayan Valley at Cordillera Administrative Region (CAR).

Nagmula naman sa Bicol Region ang isa pang namatay at isang sugatan na kasalukuyan pang bineberipika.

Nasa 11,953 pamilya naman o katumbas ng 47,169 indibidwal ang naapektuhan ng Bagyong Florita sa limang rehiyon.

Nabatid na lumabas na ng Philippine Area of Responsibility ang naturang bagyo kung saan inalis na rin ng PAGASA ang storm signals sa lahat ng apektadong lugar sa bansa. —sa ulat ni Gilbert Perdez (Patrol 13)

Ikinalugod ng Philippine Business for Education (PBEd) ang desisyon ng pamahalaan sa muling pagbabalik ng face-to-face classes sa bansa sa gitna ng pandemya noong Lunes, Agosto 22.

Sa panayam ng DWIZ, sinabi ni PBEd Acting Executive Director Justine Raagas na makatutulong ito upang matugunan ang learning poverty ng Pilipinas na nasa 90%.

Ang learning poverty ay ang bilang ng bata na nasa edad 10 na walang kakayahan na basahin ang isang simpleng teksto.

Ayon pa kay Raagas, malaki ang naging implikasyon nang matagal na pagsasara ng mga paaralan dahil sa COVID-19 pandemic na nagresulta sa learning losses o ang pagkawala ng mga natututunan ng mag-aaral.

Aniya, iba pa rin kasi ang learning o pag-aaral ng mga bata na nangyayari sa loob ng silid-aralan kung saan mayroong maayos na instruksyon ng mga guro at interaksyon sa mga kaklase.

Samantala, sinabi ni Raagas na maaari pang maagapan ang learning poverty ng bansa.