NATIONAL NEWS

Nanindigan ang grupo ng mga guro na dapat panagutin at makulong ang mga sangkot sa kontrobersyal na pagbili ng overpriced at outdated laptops ng Department of Education (DepEd) at ng Procurement Service ng Department of Budget and Management (PS-DBM).

Sa naganap na pagdinig ng Senate Blue Ribbon Committee, nanawagan ang dalawang grupo na hindi maaaring palagpasin ang isyu ng overpriced laptops at hindi dapat ito itulad sa isyu ng Pharmally, kung saan sangkit din ang PS-DBM sa bilyong bilyong pagbili ng personal protective equipment o ppes at pinalagpas na lang.

Ayon sa Alliance of Concerned Teachers, hirap silang tanggapin ang naging dahilan ng DepEd na nahirapan silang abutin ang timeline upang makapag-distribute ng mga laptop.

Naniniwala naman ang Teachers’ Dignity Coalition, na pinaiikot lamang ng mga resource person ang tanong ng mga senador sa nasabing pagdinig.

Iginiit din ng grupo na dapat mayroong makulong sa isyu dahil hindi biro ang  naturang isyu kung saan, sinamantala umano ng naturang ahensya ang pandemya upang kumita sa gitna ng maraming krisis sa edukasyon.

Naglatag ng solusyon ang Land Transportation Office (LTO) hinggil sa isyu ng pagpapatupad ng no-contact apprehension policy (NCAP) sa National Capital Region (NCR).

Kasunod ito ng mga natatanggap na reklamo ng ahensya mula sa mga motorista sa mahal na singil sa kanilang mga multa na aabot ng dalawa hanggang tatlong libong piso.

Sa pahayag ng ilang mga motorista, hindi sila nakakatanggap ng notice kung saan, nabibigla sila sa mga singil kaugnay sa kanilang violation.

Sa naging pagdinig ng House Committee on Transportation, kabilang sa mga inihaing solusyon ng lto ay ang pagpapababa ng multa para sa mga pampublikong sasakyan sakaling mahuli sa ilalim ng naturang polisiya.

Ayon sa LTO, dapat din na ipa-accredit sa kanilang ahensya ang mga traffic monitoring it provider ng lgus upang maiwasan na malabag ang data privacy ng mga motorista.

Kailangan din na mabigyan ng labing limang araw ang mga motorista ng mahuhuli sa nasabing ordinansa para tutulan ang nasabing paglabag at dapat na idaan ito sa due process bago patawan ng multa.

Bukod pa dito, dapat din na ang sinomang magmamaneho ng sasakyan na lalabag sa polisiya ang siyang magbabayad ng multa at ibaba o iparehas ang multa sa kung magkano ang sinisingil ng mga mmda sa mga violator.

Inihayag ng Asian Development Bank (ADB) na mas lumala ang epekto ng pandemiya sa Pilipinas kung ikukumpara sa ibang mga bansa sa Asya.

Batay sa datos ng ADB, marami sa mga mahihirap ang hindi nakatanggap ng ayuda mula sa gobyerno kung saan, kinukulang na ang kanilang panggastos para sa kanilang pangangailangan.

Ayon sa ADB, aabot sa negative 21.1% ang nabawas sa pangangailangan ng mga mahihirap na pilipino kumpara sa Armenia na mayroong negative .3%; Georgia na mayroong negative 8.5%; Indonesia na may 3.3%; Kyrgyz Republic na may negative 11.2%; at Thailand na mayroong negative 1.9%.

Iginiit ng ADB, na kahit maraming pilipinong mahihirap ang nakatanggap ng ayuda, 70% umano ang walang nakuha mula nang magsimula ang pandemiya.

Dahil dito, plano ng gobyerno na hikayatin ang mga mahihirap na pilipino na kumaha ng national o Philsys id upang mas mapabilis umano ang pamimigay ng ayuda.

Isinailalim kahapon sa random drug test ang 24 na tauhan ng Philippine National Police o PNP Anti-Cybercrime Group.

Ayon sa Chief PIO ng Anti-Cybercrime Group na si Lt. Michelle Sabino, makukuha ang resulta sa loob ng 24 oras kung saan, umaasa siya na magnenegatibo ang mga ito sa nasabing drug test na regular na ginagawa sa PNP bilang bahagi ng kanilang programa kontra iligal na droga.

Sakaling namang magpositibo ang isa sa kanilang mga tauhan, posible itong maharap sa kaparusahan at posibleng kasuhan ng administratibo.

Isinailalim sa state of calamity sa buong Bangsamoro Autonomous Region in Muslim Mindanao (BARMM) bunsod ng malawakang pagbaha sa rehiyon.

 Sa inilabas na proclamation number 3 ni BARMM Chief Minister Ahod Ebrahim, epektibo ang state of calamity mula Agosto a-18 hanggang Oktobre a-31 ngayong taon.

 Mababatid na ang malawakang pagbaha sa rehiyon ay bunsod ng pag-ulan dala ng mga low pressure area, habagat at localized thunderstorms.

 Samanatala, ang BARMM ay binubuo ng mga lalawiga ng Basilan, Lanao del Sur, Maguindanao, Sulu at Tawi-Tawi.

Inihayag ng Department of Health (DOH) umabot na sa 399 ang kabuuang bilang ng mga nasawi bunsod ng dengue sa pilipinas.

 Batay sa datos ng DOH, nakapagtala na ng 118,526 na kaso ng naturang sakit sa bansa hanggang nito lamang Agosto a-sais.

 Mababatid na ang naturang bilang ng mga tinamaan ng dengue ay mas mataas ng 153% kumpara sa kaparehong panahon noong nakaraang taon.

 Habang mas mataas naman ng 167 ang death toll na naitala ngayon kumpara sa naiulat sa parehong panahon noong 2021.

 Walang shortage sa supply ng asin sa bansa.

 Ito ang binigyang linaw ng Department of Trade and Industry (DTI) matapos aprubahan ang pagtataas ng Suggested Retail Price (SRP) ng naturang produkto.

 Sa inilabas na price bulletin noong Agosto a-12, nasa 21 pesos 75 centavos na ang SRP para sa 500 grams ng iodized rock salt, at 23 pesos naman para sa isang kilo.

 Binigyang-diin ni DTI Undersecretary Ruth Castelo, anim na taon nang hindi gumagalaw ang presyo ng asin sa bansa.

Umarangkada na ang talakayan ng Senate Committee on Constitutional Amendments and Revision of Codes sa posibleng pag-amiyenda sa 1987 Constitution.

 Inihayag ni Committee Chair Senator Robin Padilla, mananatili siyang open-minded sa mga opinyon at panukala na ipiprisenta sa komite.

Nagbahagi rin si dating Commission on Election (COMELEC) Chairman Christian Monsod, isa sa mga nagbalangkas ng 1987 Constitution ng ilang panukalang pag-amiyenda sa saligang batas.

 Kabilang sa mga ito ang tandem voting para sa presidential at vice presidential candidates, maging ang pag-amiyenda sa komposisyon at function ng judicial bar council gayundin ang pagtanggal ng quasi-judicial function ng COMELEC.

Lusot na sa House Committee on Suffrage and Electoral Reforms ang “Substitute Bill” o panukalang nagpapaliban sa Barangay at Sangguniang Kabataan Elections (BSKE) na nakatakdang idaraos sa December 5, 2022 sa botong 11 ang pabor at walang tutol.

 Ayon kay Committee Chairman Mountain Province Representative Maximo Dalog Jr., sa halip na gawin sa December 5, 2022 ang naturang halalan ay idaraos ito sa unang Lunes ng December 2023 at pormal na uupo sa pwesto sa January 1, 2024, ang mananalo dito.

 Magugunita na una nang inihain ang halos 40 house bills sa kamara para isulong ang postponement ng eleksyon ngayong taon at pag-lipat ng petsa nito.

 Samantala, iginiit naman ng Commission on Elections (COMELEC) na sakaling ipag-paliban ang BSKE ay inaasahan na magiging dagdag-gastos ito.

Pinayuhan ng Department of Trade and Industry (DTI) ang publiko na mamili na ng pang noche buena items ng maaga kung may extrang budget.

Ito ayon kay DTI Undersecretary Ruth Castelo ay upang hindi na maabutan ng noche buena bulletin na ilalabas sa third quarter ng taon.

Aniya, hindi naman agad-agad nag-e-expire ang mga pamaskong produkto kaya maaari ng mamili at mag-stock habang hindi pa tumataas ang presyo ng mga ito.

Nabatid na maglalabas ang DTI ng noche buena bulletin sa pagitan ng Oktubre at Nobyembre bilang gabay sa ng mga mamimili sa presyo ng mga pang-handa sa pasko at bagong taon.

Samantala, batay sa komputasyon ng ahensiya, makakatipid ang mga consumer ng mula 20 hanggang 70 pesos kung bibili ng bundle products.