NATIONAL NEWS

Inanunsiyo ng Government Service Insurance System (GSIS) na ia-activate nito ang kanilang emergency loan program para sa mga miyembro at pensioners na nasalanta ng tropical storm Florita.

 Ayon kay GSIS President at General Manager Wick Veloso, ang mga kuwalipikadong mag-apply ang mga miyembro na aktibo sa serbisyo at hindi “on leave of absence without pay”.

 Aniya dapat ay mayroon ding tatlong buwan na bayad sa premiums sa nakalipas na anim na buwan, walang nakabinbing administratibo o kasong kriminal at mayroong net take-home pay na hindi bababa sa limang libong piso matapos na ang lahat ng required monthly obligations ay maibawas.

Mababatid na kadalasang iniaalok ng GSIS ang emergency loans sa mga lugar na nasa ilalim ng state of calamity.

Mahigit 4,000 health workers sa Philippine General Hospital (PGH) ang hindi pa nakakatanggap ng kanilang One COVID allowance (OCA).

 Ayon kay All UP workers Union-Manila-PGH President Karen Faurillo, hindi pa sila nabibigyan ng OCA mula pa noong buwan ng Abril, Mayo at Hunyo.

 Giit pa niya na naipasa naman ng ospital sa pamahalaan ang lahat ng requirements na hinihingi ng Department of Health (DOH) pero wala pa aniyang pondo kaya’t hindi pa nila matatanggap ang nasabing allowance.

 Samantala, nananawagan si Faurillo sa gobyerno na ibigay na ang kanilang benepisyo.

Sinampahan na ng kasong frustrated homicide ang driver ng SUV na nakasagasa sa isang security guard malapit sa isang mall sa Mandaluyong City noong Hunyo.

Pormal na inirekomenda ng Mandaluyong City Prosecutor’s Office ang pagsampa ng nasabing kaso laban kay Jose Sanvicente, sa isang resolusyon na may petsang Hunyo a-29.

Ibinasura naman ang isa pang kaso ni Sanvicente sa pag-abandona sa biktima dahil lack of probable cause.

Inihain ng Mandaluyong City Police ang nasabing mga inisyal na reklamo laban kay Sanvicente noong Hunyo a-sais, isang araw matapos mag-viral sa social media ang video ng kanyang pagsagasa sa security guard na si Christian Joseph Floralde.

 Nabatid na una nang binawi ng Land Transportation Office (LTO) ang lisensya ni Sanvicente at tuluyan na itong pinagbawalan na kumuha ng panibagong lisensya at magmaneho ng sasakyan.

Hindi nakatanggap ng alokasyon sa 2023 budget ang Department of Transportation (DOTR) para sa pagpapatuloy ng Libreng Sakay Program sa susunod na taon at pagbibigay ng insentibo sa mga drayber at operator ng pampublikong sasakyan na lumahok dito.

 Sa pagdinig ng House Committee on Transportation ngayong araw, sinabi ni Transportation Undersecretary for Road Transport and Infrastructure Mark Steven Pastor na humiling ang ahensya ng P12 bilyon para sa service contracting program para sa 2023.

Pero hindi ito naisama sa National Expenditure Program (NEP).

 Sa ilalim ng NEP, mayroong proposed budget na 171.1 billion pesos ang DOTR para sa susunod na taon, na mas mataas ng 120.4% kumpara sa 75.8 billion pesos noong 2022.

 Nabatid na ang servie contracting o libreng sakay program ay inisyatiba ng DOTR at LTFRB na inilunsad noong huling bahagi ng 2020 sa ilalim ng Republic Act no. 11494 o ang Bayanihan to Recover as One Act para matulungan ang mga komyuter at mga sektor ng pampublikong sasakyan na apektado ng pandemya.

Walang dapat na pagtaas ng presyo ng mga gulay sa Metro Manila at iba pang bahagi ng bansa matapos bumayo ang bagyong Florita.

Ayon kay Agriculture Undersecretary Khristine Evangelista kung pagbabatayan ang sitwasyon ng supply ng gulay mula Ilocos Norte hindi na aniya tataas sa dalawang metriko tonelada ng gulay ang ibinabagsak sa Metro Manila at ilan pang lugar sa norte na bigas na ang karamihan sa supply.

Ang ibig sabihin nito aniya ay hindi lamang sa Ilocos Norte nanggagaling ang mga gulay na sinu-supply sa Metro Manila kaya’t walang dapat pagtaas sa presyo.

Isa ang Ilocos Norte sa mga binayo ng bagyong Florita kung saan tatlong milyon ang nasira sa agrikultura at mahigit 300 magsasaka ang naapektuhan.

Handa na nga ang mababang kapulungan ng kongreso para sa pagsisimula ng 2023 National Budget hearing bukas, Biyernes.

Nakatakdang talakayin bukas ang panukalang 5.268-billion pesos na Pambansang Pondo.

Batay sa abisong inilabas ng Kamara, magsisimula ang briefing sa pangunguna ng mga miyembro ng Development Budget Coordination Committee (DBCC),  Budget Secretary Amenah Pangandaman, Finance Secretary Benjamin Diokno, NEDA Secretary Arsenio Balisacan at BSP Gov. Felipe Medalla.

Habang nauna nang tiniyak ni House Speaker Martin Romualdez na magiging transparent ang budget process at sisiguraduhin nitong ang pambansang pondo ay epektibong tutugon sa mga pangangailangan ng taumbayan lalo na sa kalusugan, trabaho at seguridad sa pagkain.

Nabatid na target na maaprubahan ng mababang kapulungan  ang panukalang badyet bago October 1 na siyang unang recess ng Kamara na magtatagal hanggang November 6. —sa ulat ni Tina Nolasco (Patrol 11)

Nailigtas ng Philippine Coast Guard (PCG) ang tatlong mangingisda matapos lumubog ang kanilang motorbanca sa karagatang sakop ng San Nicolas Shoals sa Cavite.

Sinabi ng PCG, nagkaroon ng engine trouble ang motorbanca na sinabayan pa ng maalong karagatan at malakas na hangin.

Knilala ang mga mangingisda na sina Joel Dela Cruz Dimano Jr., 45 years old, Alexander Bababel 44 years old, at Joshua Morallos, 22 years old na pawang mga residente ng Mariveles, Bataan.

Nabatid na nakatanggap ang PCG Station Manila ng ulat mula sa PCG District NCR-Central Luzon hinggil sa tatlong mangingisda na naligtas ng nagdaang cargo vessel na MV Ever Pride.

Agad na nagtungo ang barko ng coast guard na BRP Malabrigo sa nasabing lokasyon para tumulong sa mga mangingisda.

Nasa maayos naman na kalagayan ang mga nakaligtas na mangingisda matapos suriin ng mga tauhan ng PCG Medical Service. —sa ulat ni Aya Yupangco (Patrol 5)

Humiling ang Malakanyang ng pang-unawa mula sa mga may-ari ng mga maliliit na groceries dahil sa epekto ng isyu sa suplay ng asukal.

Ito’y matapos umangal ang mga may-ari ng small time grocery dahil hindi umano nila kakayanin na mapanatili ang mababang presyo ng kada kilo ng asukal.

Kaugnay ito sa boluntaryong pagbaba ng mga supermarkets ng presyo ng asukal sa 70 pesos kada kilo mula sa dating 90 hanggang 110 pesos kada kilo.

Ngunit sinabi ni Press Secretary Trixie Cruz-Angeles, pansamantala lang naman ang 70 pesos kada kilong asukal at limitado lang din sa itinakdang dami.

Ibig sabihin, kapag naubos na ang volume ng asukal na binawasan ang presyo ay babalik na ulit ang presyo nito batay sa market prices.

Kung sakali man anyang mapalawig ito at labis na maapektuhan ang maliliit na groceries, tiniyak ni Angeles na magpapaabot ng tulong ang gobyerno.

Nagpaabot ng pakikiramay ang Department of Education (DepEd) sa pamilya ng isang gurong nasawi  matapos malunod sa baha sa Camarines Sur nuong Martes.

Sinabi ni DepEd Spokesperson Atty. Michael Poa, nakakalungkot umano ang nangyari sa guro na si Romeo Sison Jr. ng San Roque High School sa bayan ng Libmanan.

Aniya, kasama ng biktima ang co-teacher nito na si Gemmo Intia ng tinawid ang baha sa kasagsagan ng Bagyong Florita sakay ng kanilang bisekleta.

Dahil umano sa lakas ng agos ay hindi nakayanan ng biktima hanggang sa tangayin siya nito na kaniyang ikinalunod.

Nakikidalamhati naman ang DepEd sa pamilya ni Sison at tinitingnan na rin nila ang tulong na maaaring ibigay sa naulilang pamilya.

Isinailalim na sa state of calamity ang buong lalawigan ng Maguindanao.

Ito’y dahil sa naranasang baha na nagpalubog sa mahigit 100 barangay at sa hindi bababang 13 munisipalidad.

Ayon kay Maguindanao Vice Governor Bai Ainee Sinsuat, inirekomenda ang naturang deklarasyon ng Provincial Disaster Risk Reduction and Management Council (PDRRMO).

Sinabi ni Sinsuat na nasa 105 na barangay mula sa mahigit 500 barangay sa Maguindanao ang naapektuhan ng baha.

Pumalo naman sa 46,922 na pamilya o 234,610 na indibidwal sa 36 na bayan ang nawalan ng tirahan.

Samantala, anim na bayan ang una nang isinailalim ng kanilang mga opisyal sa state of calamity dahil sa paulit-ulit na pagbaha na dala ng malakas na pag-ulan mula noong huling linggo ng Hulyo at unang bahagi ng Agosto.