NATIONAL NEWS

Pinaiimbestigahan sa Senado ni Senator Raffy Tulfo ang permananteng pagsasara ng Colegio De San Lorenzo (CDSL) sa Quezon City.

Sa inihaing Senate Resolution 156 ni Tulfo, layunin nitong tuparin ang kaniyang pangako sa mga guro ng CDSL na imbestigahan ang agarang pagsasara.

Aminado naman si Tulfo na nagdulot ng problema sa mga mag-aaral at guro ang pagsasara dahil biglaan itong nangyari.

Noong Agosto a-15, inihayag ng paaralan ang permanenteng pagsasara matapos ang 34 na taong operasyon.

Inamin naman ni Education spokesman Michael Poa na noon pang Agosto a-16 hindi pormal na ipinaalam ng CDSL sa DepEd ang desisyon.

Nakikita ng Department of Health (DOH) na posibleng pumalo sa 9K ang maitatalang arawang kaso ng COVID-19 sa bansa, sa pagtatapos ng Setyembre hanggang Oktubre.

Ayon kay Health Officer-In-Charge Maria Rosario Vergeire, magaganap ang projection kung hindi susunod sa minimum health standards ang lahat lalo’t nagsimula na ang face-to-face classes.

Aminado naman si Vergeire na nakita nilang tumaas ang mobility patterns kumpara noong nakaraang linggo na maaaring magdulot ng pagbabago ng cycle ng hawaan.

Samantala, sa tanong kung irerekomenda ng DOH na suspindihin ang nagpapatuloy na In-person classes, sinabi ni Vergeire na hindi pa nila ito nakikita dahil mabuti pa rin ang pagsunod sa safety protocols.

Nakapagtala ang Department of Health ng 2, 986 bagong nahawa sa COVID-19 kahapon.

Ayon sa DOH, pangatlong araw na itong mababa sa 3, 000.

Bahagya namang tumaas sa 31, 615 ang active cases kahapon, kumpara sa 31, 037 noong Huwebes.

Samantala, nakapagtala rin ang DOH ng 2, 287 bagong gumaling sa COVID-19 dahilan para umabot sa 3, 776, 802 ang recoveries.

Tumungtong naman sa 61, 559 ang death toll matapos madagdagan ng 40 kahapon.

Dahil sa mga bagong bilang, sumampa na sa 3, 869, 976 ang Nationwide COVID-19 tally sa Pilipinas.

Aabot sa 2, 650 kaso ng Cholera ang naitala sa Pilipinas mula Enero hanggang Agosto ngayong taon.

Ayon sa Department of Health (DOH), mas mataas ang bilang ng 230% kumpara sa naitala sa kaparehong panahon noong 2021.

Kasabay nito, nakapag-record din ang DOH ng 7, 681 Typhoid cases mula Enero hanggang Agosto na 109% ding mataas kumpara noong 2021.

Tulad ng Dengue, kadalasang naitatala ang Cholera at Tyhpoid cases tuwing tag-ulan.

Maglalabas ng guidelines ang Department of Education (DepEd) kaugnay sa mga papayagang aktibidad sa eskwelahan ngayong School Year 2022-2023.

Ayon kay Vice-President at Education Secretary Sara Duterte-Carpio, may mga Extra-Curricular Activity pa rin na ipinagbabawal ang Kagawaran dahil sa posibleng magdulot ng hawaan ng COVID-19.

Nakalagay naman sa ilalabas na guidelines kung paano naging kasama ang aktibidiad sa extra-curricular at co-curricular.

Prayoridad ng DepEd sa guidelines ang Academic Development ng mga mag-aaral at dagdag na lang ang ilang traditional school activities.

Pinag-aaralan ng Department of Finance (DOF) na limitahan na lamang sa mga mayroong National Identification Card ang pagbibigay ng ayuda.

Sinabi ni finance secretary Benjamin Diokno sa pagdinig ng House Committee on Appropriations kaugnay ng 2023 national budget, na sa ganitong paraan mabibigyan ng insentibo ang mga kumukuha ng national ID.

Dagdag pa ni Diokno, mayroong leakage ang pagbibigay ng ayuda ng gobyerno at ang paggamit ng national ID bilang requirement sa mabibigyan nito ay isa sa mga paraan upang matugunan ang nasabing problema.

Samantala, nangako rin aniya ang Philippine Statistics Authority na makagagawa sila ng 50 milyong national ID hanggang sa katapusan ng taon.