NATIONAL NEWS

Tiniyak ng Social Security System (SSS) sa publiko na hindi naapektuhan ang lahat ng mga record o datos ng mga miyembro nito sa naganap na sunog sa kanilang opisina sa Quezon City kaninang umaga.

Ayon sa SSS, hindi rin maaantala ang paghahatid nila ng serbisyo sa lahat ng sangay gayundin sa kanilang online o website na my.SSS, SSS mobile app, at uSSSap Tayo Portals.

Nabatid na sumiklab ang apoy sa UPS room ng naturang gusali ala-1:43 ng madaling araw at naapula alas-5:11 ng umaga.

Wala namang naitalang nasawi o nasugatan sa nangyaring sunog.

Samantala, pinasalamatan ng SSS ang Bureau of Fire Protection- Quezon City Station 4 para sa agarang pagresponde.

Nagsimula nang tumanggap ang Commission on Election ng mga aplikasyon para sa pagpaparehistro mula sa mga partidong politikal at party-lists.

Batay sa abiso ng ahensya, ang pagtanggap ng mga verified petition para sa pagpaparehistro ay alinsunod sa Comelec resolution No. 10673 na dapat gawin sa regular na oras ng trabaho mula alas-8:00 ng umaga hanggang alas-5:00 ng hapon, Lunes hanggang Biyernes maliban tuwing holiday.

Base rin sa Section 60 ng Omnibus Election Code, dapat rehistrado sa komisyon ang mga political party para makakuha ng isang juridical personality, maging kwalipikado para sa kasunod na akreditasyon, at para bigyan ito ng karapatan at pribilehiyo na ipinagkakaloob sa mga ito.

Para sa may mga katanungan, maaaring bisitahin ang official website na www.comelec.gov.ph at mag-email sa clerkofthecommission@comelec.gov.ph

Bumaba sa halos 3,000 ang average daily cases ng COVID-19 sa Pilipinas.

Ayon sa OCTA Research, nasa 2,959 average new daily cases ang naitala sa nakalipas na 7 araw, ito ay  15 %na mas mababa kumpara sa 3,487 kaso noong nakaraang linggo.

Tinukoy din ng grupo na mababa ang average daily attack rate ng bansa na nasa 2.69 sa kada 100,000 population.

Sumadsad din ang reproduction number o bilang ng nahawaan ng isang kaso ng COVID-19 sa 0.91 noong August 24 mula sa 0.96 noong August 17.

Ang reproduction number na mababa sa isa ay indikasyon na bumababa na ang impeksyon ng naturang virus.

Naniniwala si Senate Blue Ribbon Committee Chair Francis Tolentino na walang kinalaman si Dating Education Secretary Leonor Briones sa pagbili ng overpriced at outdated na laptop ng procurement service of  the Department Of Budget And Management (PS-DBM) para sa mga pampublikong guro.

Gayunman, nilinaw ng senador na tinitingnan pa rin ng kanyang panel ang aspeto ng command responsibility, dahil nakapirma si Briones sa memorandum of agreement sa pagitan ng DepEd at PS-DBM sa pagbili ng mga nasabing laptop.

Dagdag ni Tolentino, hintayin na lamang ang kalalabasan ng ginagawang imbestigasyon

Ipinanukala ni Rizal 4^th District Representative Fidel Nograles sa mababang kapulungan ng kongreso ang House Bill 2590 na  layuning bumuo ng State University  sa Montalban, Rizal

Ito’y sa pamamagitan ng pag-convert  sa  Colegio De Montalban at University Of Rizal System- Montalban Campus upang maging iisang pamantasan na tatawaging University Of Montalban.

Ayon kay Nograles ito’y para matugunan ang pangangailangan para sa edukasyon ng pinaka may malaking populasyon na munisipalidad sa bansa na batay sa 2022 census ay may 443,954 ng mga residente.

Sa ilalim ng panukala, kakailanganin ng P100-M pondo para sa pagpapatayo ng unibersidad kung saan P5- M mula rito ay ilalaan para sa fellowship at scholarship

Sakaling tuluyang maisabatasnaman, bubuo ng governing board na mamamahala sa pamantasan.