NATIONAL NEWS

Nakitaan ng pagbaba sa COVID-19 positivity rate ang Metro Manila gayundin ang halos lahat ng lalawigan sa Luzon.

Ayon kay OCTA fellow Guido David, bumulusok ang positivity rate ng National Capital Region sa 12.9% nitong August 27 kumpara sa 14.6% noong August 20.

Bumaba rin aniya ang positivity rate ng Bataan sa 8.8%, na tanging probinsya na may positivity rate na mas mababa sa 10%.

Sinabi pa ni David na bumaba rin ang positivity rate ng Albay, Cagayan, Camarines Sur, Isabela, La Union, Nueva Ecija at Tarlac, ngunit nananatiling nasa ”very high” category ang mga ito.

Una nang sinabi ni David noong linggo na bumulusok sa 15% ang weekly average ng COVID infections sa buong bansa, gayundin ang national positivity rate.

Nag-sorry si Social Welfare secretary Erwin Tulfo sa mga guro sa kanyang naging pahayag kaugnay sa pamamahagi ng educational assistance ng kanilang ahensya.

Ayon kay Tulfo, wala siyang intensyon na insultuhin ang mga guro hinggil sa kanyang pahayag kung ibababa ang ayuda sa mga eskwelahan.

Nilinaw ng kalihim na nais lamang niyang ipunto sa kanyang naturang pahayag na baka maakusahan lamang ang mga guro na pumapabor sa distribusyon ng educational aid.

Mababatid na umalma ang Alliance of Concerned Teachers at Teachers’ Dignity Coalition sa naturang pahayag ni Tulfo.

gusto ko lang linawin na wala po akong sinasabing nakawin o favoritism ang sabi ko baka ma-accuse po, maakusahan po yung ating mga teacher kung sila po ay ibababa ko sa mga public school, sa mga eskwelahan, yung pagbibigay po nitong educational assistance…pero gayunpaman sa mga nasaktan po na mga teacher ay humihingi po ako ng paumanhin”  -Social Welfare secretary Erwin Tulfo

Humingi rin ng paumanhin si Tulfo sa mga gobernador kaugnay sa hindi pagbaba ng naturang ayuda sa mga LGU.

dun sa barangay may experience tayo yung pagbibigay po ng SAP nagkaroon po ng favoritism atsaka una-unahan hindi po ba kung kamag-anak kaya nga po dito lang ho natin sa taas ipinamamahagi hanggang LGU hanggang Munispyo ho kasi pag sa barangay baka magkaroon na naman ho ng problema yun ho ang ibig kong sabihin hindi po sa wala akong tiwala sa mga local government units at ..mayroon po dahil nitong sabado po ay tumulong po ang maraming LGU sa atin…”  -Social Welfare secretary Erwin Tulfo

Tiniyak ng National Capital Region Police Office (NCRPO) na kanilang tinutugunan ang mga problema o isyu na idinudulog sa kanila ng mga mamamayan.

Sa panayam ng DWIZ, sinabi ni NCRPO spokesman Lt. Col. Dexter Versola na dumadaan sa validation process ang mga ipinaparating sa kanilang mga kaso.

Sa ngayon aniya ay wala pa silang natatanggap na ulat ng insidente ng kidnapping sa rehiyon.

Nagpaalala naman si Versola sa mga posibleng kaharapin ng mga nagpapakalat ng maling impormasyon partikular sa social media.

Pinangunahan ni Pangulong Ferdinand Marcos Jr., ang paggunita ng National Heroes Day sa Libingan ng mga Bayani sa Taguig City.

Binigyang pagkilala ng Pangulo ang lahat ng mga Pilipinong nagpakita ng katapangan at kagitingan sa pakikibaka at sakripisyo para sa bayan.

Pinasalamatan ni Pangulong Marcos ang mga nasa sektor ng agrikultura at kalusugan, gayundin ang mga manggagawang Pilipino, mga guro, mga OFW, mga pulis, sundalo at iba pang mga sektor.

Sinabi pa ng Punong Ehekutibo na taglay ng bawat Pilipino ang pagiging bayani na maaaring ipagmalaki at magsilbing inspirasyon para sa mga susunod na henerasyon. —ulat mula kay Jopel Pelenio (Patrol 17)

Nag-alok ng one-time treat na free guided tour ang Intramuros Administration (IA) sa mga turistang bibisita sa makasaysayang Walled City of Intramuros.

Ito ay gaganapin lamang ngayong araw para sa paggunita ng National Heroes’ Day mula alas-9 ng umaga hanggang alas-4 ng hapon sa tulong ng Accredited Tour Guides Services Cooperative.

Matatagpuan sa Walled City of Intramuros ang tanyag na Fort Santiago na dating Kuta Militar ng mga Espanyol na nagpakulong sa maraming Pilipino at Amerikano noong panahon ng Kastila at World War II.

Isa si Dr. Jose Rizal, ang Pambansang Bayani ng Pilipinas, sa mga nakulong sa isa sa mga piitan nito.

Hinimok din ng IA, ang publiko na bisitahin din ang San Agustin Church na kilala bilang pinakamatandang Simbahan sa Pilipinas; Manila Cathedral, Casa Manila, Silahis Center, Baluarte Center, at ang Baluarte De San Diego.

Samantala, sinabi ng IA na hindi na kailangang magpareserve kapag pupunta sa Fort Santiago ngunit may entrance fee pa rin na P75.00 para sa mga regular na bisita, P50.00 para sa mga bata, senior citizen, estudyante, at may mga kapansanan, at mga empleyado ng gobyerno. —sa panulat ni Hannah Oledan