NATIONAL NEWS

Itinanggi ng Malacañang na naglabas na ng appointment para sa bagong Commissioner ng Bureau of Immigration (BI).

 Ito ang inihayag ni Press Secretary Trixie Cruz-Angeles kasunod ng lumabas na dokumento umano ng appointment letter ni Atty. Abraham G. Espejo na dating Dean ng College of Law sa New Era University na pag-aari ng Iglesia ni Cristo bilang bagong BI Commissioner.

 Ayon kay Angeles, nag-check na sila sa Presidential Management Staff (PMS) at walang dokumentong inisyu para sa nabanggit na posisyon.

 Mababatid na ang PMS ang nag-iisyu ng mga appointment upang punan ang mga bakanteng posisyon sa gobyerno.

Kinumpirma ni Land Transportation Franchising and Regulatory Board (LTFRB) Chariperson Cheloy Garafil na posibleng aprubahan nila ang petisyon sa pagtaas ng pamasahe sa jeep.

Mababatid na ito ay sa gitna pa rin ng patuloy na pagtaas sa presyo ng produktong petrolyo.

Ayon kay Garafil, pagdedesisyunan ng tanggapan sa susunod na linggo ang mga petisyong nakahain para sa fare increase na naglalaro sa tres hanggang kwatro pesos.

 Papayagan nang um-attend ng face to face classes ang mga estudyante, teaching at non-teaching personnel sa kolehiyo kahit hindi bakunado ang mga ito laban sa COVID-19.

 Ito ay matapos na ihayag ni Commission on Higher Education (CHED) Chairman Prospero De Vera, ang pag-aalis sa requirement na COVID-19 vaccination upang makadalo sa in-person classes.

 Sa ngayon ay ipauubaya na ng CHED sa mga institusiyon kung ibabalik na nito ang full face-to-face classes o magkakaroon muna ng blended learning.

Nakapagtala ang Department of Health (DOH) ng 19,262 na bagong kaso ng COVID-19 sa bansa mula Agosto a-22 hanggang a-28.

Bunsod nito nasa 2,752 ang average na bilang ng bagong kaso kada araw ngayong linggo na mas mababa ng 19% kumpara sa mga kaso noong Agosto a-15 hanggang a-21.

Nabatid na sa mga bagong kaso ng sakit, 110 ang may malubha at kritikal na karamdaman, habang 316 naman sa mga ito ang pumanaw.

Samantala, higit sa 72 milyong indibidwal na o 92.80% ng target na populasyon ang bakunado laban sa COVID-19 habang 17 milyong indibidwal naman ang nakatanggap na ng kanilang booster shots.

Namumuro ang pagkakaroon ng total brownout sa malaking bahagi ng Mindanao.

Ito’y ayon kay Basilan Representative Mujiv Hataman ay kapag nabigo ang National Power Corporation (NAPOCOR) na bayaran ang utang nito sa Petron Corporation.

Nabatid na aabit sa dalawang bilyong piso ang utang ng NAPOCOR sa Petron na nagsusuplay ng produktong petrolyo para tumakbo ang mga planta ng NAPOCOR Mindanao.

Sinabi naman ni Budget Secretary Amenah Pangandaman na nakikipag-ugnayan na ang Department of Budget and Management (DBM) sa Department of Energy (DOE) para sa pagpapalabas ng pondo kaugnay sa naturang problema.

Sang-ayon si Urban Planner Architect Jun Palafox sa munghkahi ni Senator Robinhood Padilla na magtayo ng cable cars.

Sa panayam ng DWIZ, ipinaliwanag ni Palafox na sakali kasing bahain ang Metro Manila ay ang skywalks, elevated walkways, skyways, elevated expressway at aerial cable car lamang ang posibleng transportasyon.

Posible naman aniyang maresolbahan ang pagbaha sa Metro Manila basta’t agad na gawan mitigation and adaptive measures.

 Samantala, sinabi ni Palafox na ang sunod-sunod na pagbaha sa Cebu ay dahil sa saltwater intrusion.

Inihayag ng isang ekperto na “overacting” ang mungkahing magpatupad ng lockdown bilang tugon sa naitalang ika-apat na kaso ng Monkeypox virus sa Pilipinas.

Ayon kay infectious disease expert Dr. Rontgene Solante, hindi naman kasi gano’n kataas ang kasalukuyang monkeypox cases sa bansa at hindi rin ito gaanong nakakahawa kumpara sa COVID-19.

Aniya, dapat pagtuunan ng pansin ng pamahalaan na mapataas ang kamalayan at kaalaman ng publiko sa nasabing virus.

Samantala, sinabi ni Solante na maaga pa para sabihing may local transmission na ng monkeypox sa bansa dahil sa naiulat na ika-apat na kaso na walang travel history.

Itinuturing ni Vice President at Department of Education (DepEd) secretary Sara Duterte na mga bagong bayani ang lahat ng mga guro sa buong bansa, kasabay ng paggunita sa National Heroes Day ngayong araw.

Ayon sa Pangalawang Pangulo, matapang at hindi makasarili na mga bayani ang mga guro dahil sa kanilang dedikasyon na magturo.

Aniya, dapat ipagpasalamat ang sakripisyo at pagbabahagi ng mga gruo ng kanilang kaalaman para matiyak na natuto at maihatid ang isang magandang kinabukasan ng mga mag-aaral.

Hinikayat naman ng Bise Presidente ang mga estudyante na pasalamatan din ang kanilang mga guro sa paggunita ng araw ng mga bayani ngayon.

Pinangalanan ni Pope Francis si Cardinal Luis Antonio Tagle bilang special envoy sa isang Bishops’ conference na gaganapin sa Bangkok, Thailand, sa Oktubre.

Si Tagle ang mamumuno sa pagsasara ng misa ng 50th General Conference ng Federation of Asian Bishops’ Conference (FABC) sa assumption cathedral sa Oktubre 30.

Magsisimula ang 19 na araw ng pagpupulong sa Oktubre 12 na gaganapin sa Pastoral Center of the Archdiocese of Bangkok.

Nabatid na pinangunahan ni Tagle ang FABC office of theological concerns sa loob ng ilang taon habang siya ay nananatiling archbishop ng Manila bago italaga sa Vatican dicastery.

Sumampa na sa halos 500 milyong piso ang halaga ng pinsala sa imprastruktura na dulot ng severe tropical storm Florita.

Batay sa datos kaninang alas-8:00 ng umaga ng National Disaster Risk Reduction and Management Council (NDRRMC), nasa 498,980,000 ang halaga ng nasa 102 nasirang imprastruktura sa Ilocos Region at Cagayan Valley.

Sa nasabing bilang, 93 dito ay mula sa Ilocos Region na kung saan aabot sa 474,580,000 ang halaga ng pinsala habang siyam sa Cagayan Valley na nasa 24,400,000.

Naapektuhan din ng bagyong Florita ang 72 kabahayan sa mga nasabing rehiyon.

Nasa 31,936 pamilya o katumbas ng 129,768 indibidwal naman ang naapektuhan ng bagyo mula sa 486 barangay sa Ilocos Region, Cagayan Valley, Central Luzon, Calabarzon, Cordillera Administrative Region at National Capital Region.

Samantala, nananatili sa tatlo ang bilang ng mga nasawi habang apat ang sugatan.