NATIONAL NEWS

Sinita ng Commission on Audit (COA) ang Procurement Service ng Department of Budget and Management (PS-DBM) dahil sa P3 billion na halaga ng high-yield investment sa LandBank of the Philippines (LBP) at Development Bank of the Philippines (DBP).

Ayon sa COA, hindi umano otorisado ang PS-DBM na mag-invest at wala sa mandato nito na mag-invest sa high-yield savings account.

Pumalya rin ang PS-DBM na ibalik ang investment sa Bureau of Treasury na labag sa Executive Order 431 na inilabas noong May 30, 2004.

Ipinunto ng state auditors na ang non-return ng P3-billion investment sa treasury ay taliwas sa Department of Finance-DBM-COA Joint Circular 04-2012.

Nakasaad sa circular na lahat ng dormant account, maging unnecessary special at trust funds, ay dapat na ibalik sa general fund.

Tumutukoy ang dormant accounts sa mga koleksyon na otorisado ng batas na i-deposit sa authorized government depository bank at nananatiling inactive sa loob ng mahigit 5 taon.

Pinalagan ng Philippine General Hospital Workers Union ang pagtapyas sa panukalang pondo ng ospital para sa 2023 budget.

Mula sa kasalukuyaang P6.3 billion ngayong taon ay magiging P5.4 billion na lamang sa susunod na taon ang magiging budget ng PGH.

Base ito sa ‘spending plan’ ng gobyerno kung saan kakaltasan ng P890 million na pondo ang nabanggit na pagamutan.

Iginiit ni All Up Workers Union-Manila-PGH President Karen Faurillo na hindi katanggap-tanggap at nakababahala ang pagtapyas sa budget dahil maaapektuhan ng kanilang pondo ang ibinibigay nilang serbisyo sa mga pasyente.

Mas higit anyang kailangan ng PGH ng pondo habang nagta-transition ang bansa sa ‘new normal’ dahil sa pagiging pinakamalaking ‘covid-19 referral facility’ nito.

binigyang-diin ni Faurillo na sa katunayan ay mas kailangan pa ng PGH ng dagdag na P10-bilyong pondo nang tumama ang pandemya para sa mag–upgrade ng mga pasilidad, kagamitan at iba pang resources.

Aabot sa 153,000 estudyante ang nakatanggap na ng educational assistance mula sa Department of Social Welfare and Development (DSWD).

Ayon sa DSWD, bahagi ng P1.5 bilyong pondo ang mahigit P387 milyong ayuda na napakinabangan ng mga nabanggit na bilang ng mga estudyante.

Kumpiyansa si DSWD assistant secretary Romel Lopez, na naging maayos ang pamamahagi ng ayuda sa mga benepisyaryo kung saan, nakatanggap ng P180.9 million ang 45,437 sa college/vocation; P62.3 million ang natanggap ng 20,741 sa Senior High School; P67.1 million ang natanggap ng 33,592 students sa High School; at P77.5 million naman sa 53,545 na Elementary Students.

Samantala, muli naman nilinaw ng opisyal na hindi nila tinatanggap ang mga walk-in applicant at tanging ang mga nakatanggap lamang ng text confirmation pagkatapos makapagrehistro online ang pinapapasok para sa payout center.

Pinagpaplanuhan na ng Department of Social Welfare and Development (DSWD) na gawing araw-araw ang pamamahagi ng educational assistance sa mga estudyanteng benepisyaryo sa ilang rehiyon sa bansa.

Kasunod ito ng muling pagdagsa ng mga mahihirap na estudyante sa ikalawang bugso ng pamamahagi ng ayuda ng DSWD nitong Sabado.

Ayon sa ahensya, kumpara sa unang bugso ng pamamahagi ng ayuda, mas naging maayos ang pila ng mga estudyante.

Sinabi pa ng DSWD na kanila naring pinag-iisipan na dagdagan ang payout center sa bansa, kung saan idadaan ang pamamahagi ng ayuda sa mga barangay o paaralan.

Bukod pa diyan, sakaling hindi pa maubos ang isat-kalahating bilyong pisong budget hanggang sa Setyembre a-24, posibleng palawigin pa ang petsa ng pamamahagi ng ayuda.

Aminado ang DSWD na hindi nila naabot ang target na bilang na 90,000 beneficiaries noong Sabado dahil may ilang mga pumila na miyembro umano ng 4Ps na hindi umano kwalipikado sa naturang ayuda.

Nagpatupad ng shifting ang ilang paaralan sa National Capital Region (NCR) dahil sa kakulangan ng mga classroom na gagamitin ng mga estudyante.

Sa pag-iikot ng DWIZ sa ilang lugar sa Metro Manila, maghahati-hati ang 5K mag-aaral sa 100 clasroom sa Sta. Elena High School sa Marikina City kung saan, magkakaroon ng pang-umaga at panghapon na klase sa mga guro at estudyante.

Sakop ng pang-umagang klase ang Grade 7, 10 at Grade 12 na mayroong 800 estudyante habang ang mga Grade 8, 9 at 11 naman ay ginawang panghapon ang klase upang mapunan ang 50 katao na kapasidad sa kada silid-aralan.

Samantala, sa Malanday Elementary School naman, sa Marikina City, iba naman ang paraan ng pagtuturo ng mga guro kung saan, hinati rin sa face-to-face classes, online classes at paggamit ng modules ang klase ng mga estudyante.

Layunin nitong masunod ang pagpapatupad ng health and safety protocols sa mga estudyante upang maiwasan ang hawahan ng COVID-19.

Samantala nagkukulang narin ang mga classroom sa Manuel L. Quezon Elementary School sa Caloocan City dahil sa 4,259 na bilang ng mga estudyante na nag-enroll at maghahati-hati sa 32 classroom.

Dahil dito, magkakaroon ng 3 shift sa pagtuturo ang mga guro para sa face-to-face classes ng mga estudyante.

Dahil dito, nanawagan ang Principal ng naturang eskwelahan na si Moises Tamondong na magkaroon ng mas maraming classroom para maibalik sa normal na bilang at klase ang mga estudyante.

Magiging mainit at maalinsangan ang panahon sa malaking bahagi ng bansa pero may tiyansa ng mga isolated rain showers at thunderstorm sa hapon hanggang sa gabi.

Ayon kay PAGASA senior weather specialist Chris Perez, inaasahan ang maaliwalas na panahon pero posible parin ang mga isolated rain showers at thunderstorms sa Visayas at Mindanao.

Dahil dito, pinapayuhan ng PAGASA ang publiko na panatilihin ang pagdala ng payong at iba pang panangga sa biglaang pagbuhos ng ulan.

Wala namang nakataas na gale warning ang PAGASA kaya malayang makakapalaot ang mga kababayan nating mangingisda maging ang maliliit na sasakyang pandagat.

Agwat ng temperatura sa Metro Manila ay maglalaro sa 25°C hanggang 32°C habang sisikat naman ang haring araw mamayang 5:44 ng umaga at lulubog naman ito mamayang 6:09 ng hapon.