NATIONAL NEWS

Tiniyak ng Department of Social Welfare and Development (DSWD) na mayroon pang sapat na pondo ang kanilang ahensiya para sa mga darating na kalamidad o sakuna sa bansa.

Ito ang inihayag ng DSWD sa harap ng patuloy nilang pag-alalay at pagbibigay ng tulong pinansyal sa mga biktima ng bagyong Florita.

Ayon kay DSWD spokesman Rommel Lopez, sa kasalukuyan ay mayroon pang P1.7-B standby fund at quick response fund ang kanilang ahensya na magagamit sa mga darating na araw.

Samantala, iginiit pa ng tagapagsalita na sakaling maubos ang naturang pondo ay maaari silang humingi sa Department of Budget and Management upang mapalitan ito.

Sa kabuuan ay mayroon na aniyang 7.2 million pesos na naibigay ang DSWD bilang humanitarian assistance sa mga lugar na nasalanta ng bagyong Florita mula sa Region I, Region II, Region III, CALABARZON, National Capital Region at Cordillera Administrative Region.

Wala pang dahilan para higpitan ang protocol sa bansa kasunod ng naitalang Monkeypox cases.

Ayon sa Department of Health (DOH), hindi nila inirerekomenda ang lockdown dahil sa kumpirmasyon ng ikaapat na kaso ng monkeypox na mula sa Iloilo.

Dagdag pa ng kagawaran, mayroon na silang umiiral na preventive measures para maiwasan ang transmission ng nasabing sakit.

Samantala, ginawa ng DOH ang pahayag kasunod ng plano ng lokal na pamahalaan ng Negros Occidental kaugnay sa posibleng paghihigpit sa mga regulasyon sa pantalan upang masiguro na masusunod ang health screening ng mga pasahero na mula sa Iloilo.

Pasok sa 2023 Proposed National Budget ang 3.5 billion pesos na alokasyon para sa fuel subsidy ng mga tsuper, magsasaka at mangingisda.

Sinabi ni House Committee on Appropriations Member at Quezon City Representative Marvin Rillo, ang naturang halaga ay target na maibigay sa mga benepisyaryo sa gitna pa rin ng pagtaas ng presyo ng produktong petrolyo.

Sa naturang halaga, nasa 2.5 billion pesos ang ibibigay sa mga driver ng mga pampasaherong jeep, bus, UV express tricycle maging sa mga full time ride hailing at delivery services drivers.

Habang 510 million pesos naman ang alokasyon para sa fuel subsidy ng mga magsasaka habang 490 million pesos para sa mga mangingisda.

Ang naturang alokasyon ay bahagi ng panukalang budget sa susunod na taon ng Department of Transportation at ng Department of Agriculture.

Inihayag ng National Disaster Risk Reduction and Management Council (NDRRMC) na aabot na sa 17,510 ang bilang ng mga pamilyang naapektuhan ng bagyong Florita.

Batay sa ulat ng NDRRMC, katumbas nito ang 71,468 na katao sa 438 na barangay sa Ilocos Region, Cagayan Valley, CALABARZON, Cordillera Administrative Region (CAR) at Metro Manila.

Habang nasa 776 na pamilya o nasa 3,700 na indibidwal ang nasa 37 na evacuation centers at ang natitira ay nasa kanilang mga kamag-anak at kaibigan.

Nananatili naman sa dalawa ang nasawi habang ang isa ay bineberipika pa.

Nagpaalam na si Turkish Ambassador to the Philippines Artemiz Sumer kay Pangulong Ferdinand Bongbong Marcos Jr.

Natapos na ni Sumer ang kanyang Tour of Duty sa Pilipinas kaya babalik na ito sa Turkey.

Sa ginanap na farewell call sa Malacañang, ginawaran ng pangulo ang ambassador ng order or sikatuna na may Ranggong Datu (Grand Cross) silver distinction bilang pagkilala sa pagsisikap nito na paigtingin ang ugnayan ng Pilipinas at Turkey.

Pinasasalamatan naman ng punong ehekutibo, ang ambassador sa mga nagawa nito para sa mas pinahusay na relasyong bilateral ng dalawang bansa.

Suportado ng Philippine National Police (PNP) ang pagpapatupad ng kontrobersyal na No Contact Apprehension Policy (NCAP).

Ayon kay PNP Chief General Rodolfo Azurin Jr., malaki ang maitutulong ng mga ipinakalat na CCTV cameras para maiwasan ang korapsyon sa lansangan at mapangalagaan ang motorista maging ang mga pedestrian.

Maliban dito, iminungkahi rin niya ang polisiya upang mapangalagaan ang mga driver na bumili ng second hand na mga sasakyan.

Madalas kasi aniyang nagiging problema ng law enforcer ay ang pagtunton sa totoong driver ng mga sasakyan lalo’t kung ito ay segunda manong nabili.

Samantala, sa ngayon ay nananatiling suspendido ang pagpapatupad ng NCAP sa ilang lokal na pamahalaan sa Metro Manila.

Inihayag ng World Health Organization (WHO) na aabot na sa isang milyong indibidwal ang nasawi dahil sa COVID-19 ngayong taon.

Tinawag ni WHO Chief Tedros Adhanom Ghebreyesus na ”tragic milestone” ang nasabing bilang gayong mayroon na aniyang mga kagamitan upang mapigilan ang pagkasawi sa naturang sakit.

Pumalo naman sa halos 6.45 million deaths ang naitala ng who mula nang matukoy ang virus sa China noong 2019.

Kaugnay nito, hinimok ni Ghebreyesus ang gobyerno ng lahat ng bansa na paigtingin ang mga hakbang sa pagbabakuna sa lahat ng kanilang health workers, senior citizens at iba pang ”high risk” sa sakit.