NATIONAL NEWS

Lalarga na sa susunod na linggo ang unang dalawang state visit ni Pangulong Ferdinand Marcos Jr.

Unang tutungo ang pangulo sa Indonesia, kung saan ay makikipagpulong siya kay Indonesian President Joko Widodo.

Tatagal ang state visit ni PBBM sa Indonesia mula September 4 hanggang September 6.

Sunod namang tutulak ang punong ehekutibo sa Singapore upang makipagpulong kay Singaporean President Halimah Yakob at Prime Minister Lee Hsien Loong.

Ang naturang state visit ni Pangulong Marcos sa Singapore ay tatagal naman mula September 6 hanggang 7.

Inaasahang tatalakayin dito ang close bilateral relations sa pagitan ng Pilipinas at Singapore at iba pang mga usapin.

Aminado ang Bureau of Jail Management and Penology (BJMP) na nagkukulang sa pondo ang kanilang ahensya para sa Persons Deprived of Liberty (PDL) kasabay ng pagtaas ng presyo ng mga pangunahing bilihin.

Kasunod ito ng pahayag ni ACT Teachers Party List Rep. France Castro hinggil sa pagpo-protesta ng mga inmate sa BJMP facility sa Iloilo hinggil sa umano’y kakulangan at hindi magandang kalidad ng pagkain.

Sa naging pagdinig sa House Committee on Appropriations, sinabi ni bjmp Chief Dir. Allan Iral, na P70 lamang ang budget ng kada isang PDL para sa tatlong kainan kada araw, kasama na rito ang gasul na ginagamit sa kanilang pagluluto.

Samantala, ayon kay Interior Secretary Benjamin “Benhur” Abalos, na tinanggal na sa pwesto ang warden ng BJMP sa Iloilo habang iniimbestigahan na ang naturang isyu. —sa panulat ni Hannah Oledan

Makukuha ng Philippine National Police (PNP) ang malaking bahagi ng budget sa Department of the Interior and Local Government (DILG) para sa proposed appropriations o paglalaan ng pondo sa susunod na taon.

Ayon kay PNP Chief Rodolfo Azurin Jr., naitabi na para sa institusyon ang 191 billion pesos na budget mula sa 251 billion pesos na pondo ng DILG.

Gagamitin ang naturang budget para sa pagtanggap ng karagdagang 1,000 kapulisan, pagpapagawa ng 11 pang police station, at pagbili ng mga kagamitan ng ahensya kabilang na ang ibat-ibang uri ng baril, base radio at field investigator crime scene at mga sasakyan na gagamitin sa operasyon.

Samantala, bukod sa PNP, makakatanggap din ang Bureau of Fire Protection (BFP) ng 26.7 billion pesos na pondo; Bureau of Jail Management and Penology (BJMP) na mayroong 22 billion pesos na pondo; DILG na mayroong 6.7 billion pesos; at National Police Commission (NPC) na mayroon namang 1.9 billion pesos. —sa panulat ni Hannah Oledan

Tiniyak ng Office of the Vice President (OVP) na magagamit ng tama at magiging transparent ang hinihinging confidential funds sa kongreso.

Ayon kay OVP Spokesperson Atty. Reynold Munsayac, gagamitin ang naturang pondo sa itinakdang parametro ng Department of Budget and Management (DBM) at Commission on Audit (COA).

Nabatid na aabot sa 500 milyong piso ang kabuuang pondo para sa OVP batay narin sa isinumiteng panukalang budget.

Samantala, sa 2023 National Expenditure Program, mas malaki naman ng 200% ang budget appropriation na tatanggapin ng OVP na nagkakahalaga ng 2.29 billion pesos kumpara sa kasalukuyang pondo na 702 million pesos. —sa panulat ni Hannah Oledan

Pinayuhan ng Philippine Amalgamated Supermarket Association (PAGASA) ang publiko na abangan ang mga sale section sa mga pamilihan.

Ito ay kasunod ng pagtataas ng presyo sa ilang mga pangunahing bilihin sa merkado ngayong nagsimula na ang Ber-months.

Kaugnay nito, aminado ang grupo na nangangapa pa sila kung paano paghahandaan ang kapaskuhan lalo pa’t nasa transition period pa lamang ang bansa at hindi pa lubos na nakakabangon mula sa epekto ng pandemya. —sa panulat ni Hannah Oledan

Pansamantalang ipinagbawal ng lokal na pamahalaan ng Cagayan ang pangingisda, paglalayag at paglangoy bilang pag-iingat sa posibleng hagupit dulot ng Super Typhoon Henry.

Pinayuhan din ang mga residente na maghanda sakaling kailanganin ng pwersahan o agarang paglikas sa lugar.

Sinuspinde narin ang klase sa lahat ng antas sa Calayan, Cagayan habang nagsasagawa naman ng clearing operations sa Bontoc, Mountain Province kasunod ng nagdaang landslides sa ilang lugar.

Samantala, nangangamba naman ang mga residente sa nasabing probinsya dahil hindi pa sila tuluyang nakakabangon mula sa hagupit ng nagdaang Bagyong Florita.

Sa ngayon, plano ng Department of Public Works and Highways (DPWH) na magpadala ng mga tauhan upang magbantay sa mga landslide prone areas. —sa panulat ni Hannah Oledan

Binago na ng Department of Education (DepEd) ang panuntunan sa pagsuspinde ng pasok sa klase at trabaho tuwing may storm signals, rainfall, lindol at pagbaha.

Sa DepEd order 37 na nilagdaan ni Vice President at Education Secretary Sara Duterte-Carpio, sususpindihin na ang klase sa isang lugar kung apektado ito ng inilabas ng signals 1, 2 ,3, 4, 5 ng PAGASA.

Wala ring pasok ang mga mag-aaral kung maglalabas ng yellow, orange, red rainfall, at flood warning ang pagasa na nakasakop sa kanilang lugar.

Kung maglalabas naman ng rainfall o flood warning ang PAGASA at nasa paaralan na ang mga mag-aaral, otomatikong suspendido ang klase.

Hindi sakop ng kautusan ang mga private schools, community learning centers, state and local universities and colleges dahil desisyon na ng mga ito kung susunod sa panuntunan.

 Samantala, sa panahon ng lindol sinabi ng deped na susunpidihin lamang ang klase kung idineklara ng PHIVOLCS ang intensity 5 pataas sa isang lugar.

 Gayunman, may kapangyarihan pa rin ang mga LGUs na magsuspinde kung mababa sa intensity 5 ang PHIVOLCS earthquake intensity scale.