Humingi ng pang-unawa ang Land Transportation Office (LTO) sa mabagal na transaksyon at sistema sa ilang tanggapan ng ahensya.
Sa ngayon, inaalam na ng mga eksperto ang pinagmulan ng problemang teknikal.
Sinisiguro rin nila na sa lalong madaling panahon ay maibabalik sa normal ang operasyon.
Makakaasa ang publiko na magsusumikap pa ang pagsisikap LTO na mas mapabuti ang serbisyo at nang maiwasan ang katulad na sitwasyon sa hinaharap.
Posibleng bumili ang gobyerno ng sarili nitong petroleum products.
Ito ang inihayag ni DOE asec. Mario Marasigan, kung saan nangunguna ang Philippine National Oil Company (PNOC) sa isinasagawang pag-aaral kung paano makatutulong ang pamahalaan sa pag-iimbak ng langis.
Ngunit nilinaw rin ng opisyal na hindi intensyon ng DOE sa hakbang na ito na makipagkompetensya sa mga oil company.
Sa halip, ito ay upang hindi maantala ang suplay ng langis sa bansa sakaling magkaroon ng problema sa suplay sa international market.
Inihayag ng Department of Foreign Affairs na masasaksihan ni Pangulong Ferdinand Bongbong Marcos Jr. ang paglagda sa kasunduan sa defense at cultural areas kasama si Indonesian president Joko Widodo.
Ito’y mangyayari sa kauna unahang state visit ni Pangulong Marcos sa Jakarta mula 4 hanggang 6 ng Setyembre.
Maliban dito, isang pagpupulong naman ang nakatakdang daluhan ng punong ehekutibo kasama ang mga business leaders sa Jakarta.
Samantala, posibleng talakayin rin ng Pangulo sa mga leader ang usapin ukol sa overseas Filipino worker na si Mary Jane Veloso na nananatiling nasa death row.
Nakatakdang lagdaan ang mga kasunduan sa larangan ng counter-terrorism at data privacy sa pagbisita ni Pangulong Ferdinand Marcos Jr., sa Singapore sa susunod na linggo.
Manggagaling muna ang Pangulo sa kanyang inaugural state visit sa Indonesia sa September 4 hanggang 6 bago magtungo sa Singapore sa September 6 hanggang 7 matapos imbitahan ni President Halimah Yacob.
Ayon sa DFA na kapwa masasaksihan nina Pangulong Marcos at Singaporean prime minister Lee Hsien Loong ang paglagda sa kasunduan.
Sa magiging pulong ni Pangulong Marcos kina Yacob at Lee, inaasahan na pag-uusapan ng mga lider ang ugnayan ng dalawang Southeast Asian nations maging ang regional at global issues.
Magsasagawa rin ng briefings ukol sa negosyo at ekonomiya kasama ang investors.
Matatandaang, nagkaroon ng state visit si Yacob sa Pilipinas noong September 2019.
Inihayag ng Metropolitan Manila Development Authority (MMDA) na makatutulong ang CCTV para mapabuti ang sitwasyon ng trapiko sa National Capital Region (NCR).
Sinabi ni MMDA spokeperson Atty. Cris Saruca Jr., ‘yung mga CCTV nuon ay ginagamit sa NCAP ay gagamitin din nila para mapaganda ang monitoring and traffic management.
Ito aniya ay magiging tool para malaman nila kung saan mas maraming deployment ng traffic enforcers, ma-identify ang check points kung saan nagkakaroon ng mga aksidente at pagbaha.
Matatandaang, noong Martes naglabas ang Korte Suprema ng Temporary Restraining Order (TRO) laban sa pagpapatupad ng NCAP, pabor sa petisyon ng ilang transport group sa Maynila, Quezon City, Valenzuela, Muntinlupa, at Parañaque.
Samantala, inatasan din nito ang Land Transportation Office (LTO) at lahat ng partido na magbigay ng impormasyon sa mga motorista sa lahat ng Local Government Units, lungsod, at munisipalidad na nagpapatupad ng mga programa at ordinansa ng NCAP.
Naghahanda na ang lokal na pamahalaan ng Cagayan sa pinangangambahang pananalasa ng bagyong Henry sa Northern Luzon.
Maging ang mga residente sa barangay San Antonio sa Basco, Batanes ay abala na sa paglagay ng tapangko o window shutters.
Inabisuhan na rin umano ng provincial government ang mga mangingisda na ilagay sa ligtas na lugar ang kanilang mga bangka upang hindi mapinsala.
Gayundin, pinayuhan ang mga magsasaka na ilagay sa ligtas na lugar ang kanilang mga alagang hayop, at anihin na ang mga puwede nang anihin sa kanilang mga pananim.
Samantala, hindi pa umano nakakabangon ang ilang mga residente sa pinsalang idinulot ng nagdaang bagyong Florita na nanalasa sa Cagayan noong nakaraang linggo.
Nakumpleto na ng Department of Public Works and Highways (DPWH) ang apat na road projects nito sa Cagayan.
Ayon sa DPWH, makatutulong ang mga proyekto na ito para sa mas mabilis na serbisyo at mobility ng produkto ng mga magsasaka.
Kabilang sa mga proyektong ito ang isang kalsada patungo sa plantasyon ng kakaw (cacao) at processing areas sa Barangay Cabatacan East; Malinta-Gabun Barangay Road; at San Pedro Magsaysay-Cabatacan West Barangay Road na nag-uugnay sa isang taniman ng saging sa bayan ng Lasam.
Matatagpuan naman sa bayan ng Abulug ang isa pang road project, isang access road patungo sa agri-business industry tulad ng aquatic resources, livestock, mga gulay at niyog sa Barangay Sto. Tomas.
Ikinasa na ng Department of Transportation (DOTr) at Landbank of the Philippines ang pilot testing sa paggamit ng EMV-compliant prepaid, debit at credit cards para sa cashless payment sa public transport.
Tinawag itong “Automated Fare Collection System (AFCS) EMV Contactless Pilot Production Testing” na kung saan ang EMV cards ay may “embedded microchip design” para sa ligtas na pagbabayad.
Ito rin ay bahagi ng isinasawagang Automated Fare Collection System National Standard (AFCSNS) ng DOTr na magbibigay daan para sa convenient at mas maraming opsyon ng pagbabayad sa araw-araw na byahe.
Nabatid na may kabuuang 150 modernong jeep sa ilang piling pilot sites sa Metro Manila, Central Luzon, CALABARZON at Metro Cebu ang tatanggap ng bayad mula sa Landbank prepaid at credit contactless cards para sa unang buwan ng programa.
Patay ang isang magsasaka matapos ang landslide sa bayan ng Mayoyao, Ifugao.
Base sa imbestigasyon ng mga otoridad, hindi nakalabas ang biktima sa bahay ng kaniyang kapatid nang gumuho ang lupa dahil sa malakas na ulang dulot ng hanging Habagat na pinalakas ng Bagyong Henry.
Stranded naman ang ilang motorista sa Bontoc, Mountain Province habang baha at hindi na madaanan ang mga kalsada sa Barangay Samoki.
Nagkalat rin ang mga bato at putik sa mga daan sa Barangay Bontoc Ili dahil sa mudslide at rockslide.
Kanselado ang byahe ng Philippine Airlines (PAL) Express flight 2P 2932 at 2P 2933 na patungo at galing ng Basco, Batanes.
Ayon sa Manila International Airport Authority, ito ay may kaugnayan pa rin sa Bagyong Henry o sama ng panahon sa nasabing probinsiya.
Pinapayuhan naman ang mga otoridad ang mga apektadong pasahero na makipag ugnayan sa PAL Express Ticketing Office o di kaya’y sa kanilang booking agent upang mai-rebook ang kanilang nakanselang flight. —sa ulat ni Raoul Esperas (Patrol 45)