NATIONAL NEWS

Inihalal bilang Acting Executive Vice-President ng dating partido ng administrasyon, na Partido Demokratiko Pilipino – Lakas ng Bayan (PDP-LABAN) si Senator Robin Padilla.

Mismong ang National Executive Committee (NEC) ng PDP-LABAN ang nagmungkahi ng pagkakatalaga.

Si Padilla ang magiging pangalawang pinakamataas ng opisyal ng partido hanggang sa susunod na halalan ng pambansang opisyal sa pamamagitan ng Pambansang Asamblea.

Pinalitan ng Senador sa posisyon si Karlo Nograles na nagbitiw sa partido nang maging Chairperson ng Civil Service Commission.

Bilang Acting Executive Vice President, magiging bahagi ng NEC si Padilla at maaaring pumalit sa mga tungkulin ng presidente ng partido kung sakaling maalis sila sa pwesto.

Maaari rin itong gumanap ng iba pang mga tungkulin na maaaring italaga sa kanya ng National Council.

Nilinaw ng Department of Education (DepEd) na hindi pa epektibo ang panibagong panuntunan na inilabas hinggil sa pagsuspinde ng klase sa oras ng kalamidad at sakuna.

Ginawa ito ng DepEd matapos nilang isapubliko ang DepEd Order 37 na pirmado ni Vice President at Education secretary Sara Duterte-Carpio.

Ayon sa Kagawaran, hindi pa naihahain sa Office of the National Administrative Register sa UP Law Center ang kautusan kaya hindi pa ito mai-aapply.

Kailangan din ng personal na pirma ang kautusan dahil tanging electronic signature ang mayroon ito nang ilabas sa DepEd website.

Matatandaang kahapon, ilang paaralan ang nagsuspide ng klase sa Metro Manila bilang pagsunod sa bagong kautusang ipinalabas ng DepEd.

Tutol ang Komisyon ng Wikang Filipino (KWF) sa paggamit ng publiko ng Taglish o yung pinagsamang Tagalog at English.

Ayon kay Arthur Casanova, Chairman ng KWF, ibang lebel na ang paggamit ng TagLish dahil nasisira nito ang istruktura ng dalawang wika.

Nilinaw naman ni Casanova na hindi niya sinasabing huwag gumamit ng English, pero gusto lamang niyang bigyang-diin ang pagpapahalaga sa Wikang Pambansa.

Nilinaw ng Department of Health (DOH) na tuloy pa rin ang COVID-19 vaccination sa mga paaralan sa bansa.

Kasunod ito ng inilabas na Order No. 037 ng DepEd na nagsasabing hindi na gagamiting Quarantine, Isolation Facilities at Vaccination Centers ang mga paaralan sa Pilipinas.

Ayon kay Health Officer-In-Charge Maria Rosario Vergeire, maaari pa ring magbakuna kontra COVID-19 sa mga paaralan, pero hindi gagawin sa mga classrooms na ginagamit sa In-person classes.

Nakikipag-ugnayan naman ang DOH sa DepEd para sa Mobile COVID-19 Vaccinations at Counselling Sessions para sa mga hindi pa bakunadong guro at mag-aaral.

Bumaba sa anim ang bilang ng Rehiyon sa Pilipinas na nakalagpas sa epidemic threshold para sa mga naitatalang kaso ng dengue.

Ayon kay Department of Health (DOH) Officer-In-Charge Maria Rosario Vergeire, mula ito sa 10 hanggang 11 rehiyon noong nakalipas na maraming buwan.

Nagde-determina ang epidemic threshold sa average na bilang ng kaso ng dengue sa loob ng limang taon.

Ang anim na rehiyon na nakalagpas sa pandemic threshold ay ang Cagayan Valley, Central Luzon, CALABARZON, MIMAROPA, Cordillera Administrative Region, at National Capital Region.

Sa huling datos ng DOH, pumalo sa 19, 816 ang dengue cases sa bansa na karamihan ay nagmula sa Central Luzon, NCR at Cagayan Valley.

Nasa karagatan na ang Typhoon Henry habang magabal na kumikilos pahilaga patungong silangan ng Taiwan.

Kaninang alas-5 ng umaga, huling namataan ang bagyo sa layong 360 kilometers silangan hilagang-silangan ng Itbayat, Batanes.

Taglay ng bagyo ang lakas ng hanging aabot sa 150 km/h at pagbugsong aabot sa 185 km/h.

Dahil sa bagyo, nakataas ang Signal 2 sa buong Batanes habang signal number 1 sa Babuyan Islands at northeastern portion ng Mainland Cagayan partikular sa Santa, Ana.

Kaya asahan na ang malalakas na pag-ulan sa mga nasabing lugar at pinag-iingat ang lahat sa pagbaha at pagguho ng lupa.

Hanggang ngayong weekend inaasang lalakas pa ang Bagyong Henry bago mag-landfall ngayong gabi sa Southern Islands ng Ryukyu Archipelago.

Inaasahang lalabas ito ng bansa ngayong gabi o bukas ng umaga bago magtungo sa silangan ng China.