NATIONAL NEWS

Inilabas na ng Commission on Elections (COMELEC) ang mahahalagang petsa sa paghahanda ng poll body sa idaraos na Barangay at Sangguniang Kabataan Elections (BSKE) sa Disyembre a-singko.

Ayon sa COMELEC, simula sa October 6 hanggang October 13, 2022 maliban sa October 9, ay isasagawa na ang paghahain ng Certificates of Candidacy (COC) ng mga kakandidato.

October 6 hanggang December 12, 2022 naman magsisimula ang pagpapatupad ng COMELEC sa gun ban kasabay ng pagpasok na ng election period.

Sisimulan naman ang campaign period o pangangampanya ng mga kandidato sa November 25 hanggang December 3, 2022.

Nabatid na magbubukas ang polling precincts sa December 5 mula alas-siete ng umaga hanggang alas-tres ng hapon.

Samantala nakatakda naman ang huling araw ng paghahain ng Statement of Contribution and Expenditures (SOCE) ng mga kandidato bilang pagtalima sa Omnibus Election Code ang January 4, 2023.

Naging maayos at walang major at untoward incident ang naitala sa unang dalawang linggo ng balik-eskwela sa bansa.

 Ito ang inanunsiyo ni Department of Education (DEPED) Spokesperson, Atty. Michael Poa sa ginanap ng joint press conference ng DEPED at Office of the Vice President (OVP).

 Ayon kay Poa, batay sa kanilang isinagawang general assessment ay maganda ang naging feedback ng mga regional offices hinggil sa nagpapatuloy na sitwasyon ng muling pagbubukas ng face-to-face classes sa Pilipinas.

 Samantala, mababatid na sumampa na sa 29.4 million ang kabuuang bilang ng mga enrolled learners dahilan upang malagpasan ang target enrollees ng DEPED na 28 million.

Inanunsiyo ng Commission on Elections (COMELEC) na mula sa 671.47 million pesos na unliquidated cash advance ay naibaba na nila ito sa 200 million pesos.

 Ayon sa COMELEC, pinagsisiskapan pa nilang bawasan ang nasabing halaga ng mga unliquidated cash advance na nauna nang sinita ng mga state auditor.

 Iginiit naman ni COMELEC Chairperson George Erwin Garcia, na mayroon na silang instruction sa finance department upang mabawasan pa ng kalahati ang natitirang unliquidated cash advances bago matapos ang taon.

Tuloy-tuloy pa rin ang Libreng Sakay Program sa LRT-2 para sa mga estudyante.

 Ayon sa Department of Transportation (DOTR), tatagal ang programa hanggang nobyembre a-singko ngayong taon.

 Samantala, kinakailangan lamang na magpresenta ang mga estudyante ng school ID o original registration form sa Passenger Assistance Office upang makapag-avail ng free ride single journey ticket.

 Matatandaan na Agosto a-22 nang simulan ng DOTR ang naturang libreng sakay program.

Posibleng magkaroon ng taas presyo ng bigas sa Oktubre.

Ayon sa Samahang Industriya ng Agrikultura (SINAG) na inaasahan na nasa tatlo hanggang apat na piso ang taas presyo ng bigas sa susunod na buwan.

Isa sa mga dahilan ng SINAG ang hindi naipamahaging cash aid ng Department of Agriculture (DA) sa panahon ng pagtatanim ng palay.

Matatandaang sinabi ni Department of Agriculture (DA) Undersecretary Domingo Panganiban na ang 5,000 piso na cash aid para sa mga magsasaka ay hindi naibigay dahil sa kakulangan ng mga requirements nito.

Samantala, inatasan naman ni Panganiban ang mga regional offices na pabilisin ang koordinasyon sa Land Bank of the Philippines at mga magsasaka para sa pamamahagi ng ayuda.

Posibleng magkaroon pa ng pagbabago sa mga panuntunan nito sa hindi pagre-require ng COVID-19 vaccination sa mga college student at mga guro na nais lumahok sa face-to-face classes.

Ito’y matapos ang pagbatikos ni Iloilo 1st District Representative Janette Garin sa naging desisyon ng Commission on Higher Education (CHED) na tinawag niyang tagumpay ng mga anti-vaxxer.

Giit ni CHED Chairperson Prospero “Popoy” de Vera, ang pag-aalis nila ng vaccination requirement ay base rin sa ginawa nilang konsultasyon sa mga health expert at pag-aaral sa mga bansang hindi na rin nagpapatupad ng naturang polisiya.

Aniya, na-benchmark na sa ibang bansa kung ano ang kanilang ginagawa at mataas na ang vaccination rate kaya medyo ligtas na ngayon na isama yung mga hindi vaccinated.

Gayunman, nakikipag-ugnayan na ang CHED sa mga pamantasan para sa plano nitong maglunsad ng panibagong school-based vaccination sa gitna ng humihinang wall of immunity laban sa COVID-19.

 Malaki ang paniniwala ng Department of Agriculture (DA) na iniipit o hino-hoard ng ilang nasa industriya ng pag aasukal ang sugar supply ng bansa.

Sa Laging Handa Briefing sinabi ni DA Senior Undersecretary Domingo Panganiban, na kapansin-pansin kasi sa imbestigasyon ng mga ahensya ng gobyerno gaya ng Bureau of Customs (BOC),  Sugar Regulatory Administration (SRA), DA, at DTI na maraming asukal na nadiskubre sa mga warehouse na sinalakay ng mga otoridad.

Kabilang ani Panganiban sa mga imbakan o bodega ng asukal na niraid ng pamahalaan ang matatagpuan sa Quezon City, San Jose Del Monte, Bulacan, Pampanga, Pangasinan, Misamis Oriental, at Bukidnon.

Patunay aniya ito na walang kakulangan ng asukal sa bansa dahil malinaw na may umiipit lamang sa mga suplay nito para palabasin na mayroong shortage, at maging dahilan ng pagtaas ng presyo nito sa merkado. – sa ulat ni Jopel Pelenio (Patrol 17)

Halos 200 motorista ang nahuli ng Metropolitan Manila Development Authority (MMDA) dahil sa paglabag sa batas-trapiko sa Quezon City at sa Roxas Boulevard sa Maynila.

Karamihan sa mga ito ay lumabag sa over speeding, number coding, walang lisensya at pagmamaneho nang naka-tsinelas lang na pagsuway sa dress code at hindi pagsusuot ng seatbelt.

Inihayag naman ni MMDA Traffic Operations Head Colonel Bong Nebrija, karamihan sa number coding violators ay nahuli sa gitna ng kalsada.

Samantala, muli naman nagpaalala ang mmda sa mga motorista na sumunod pa rin sa batas-trapiko kahit ipinahinto muna ng korte suprema ang implementasyon ng No-Contact Apprehension Policy (NCAP).

Tututukan ng Department of Justice (DOJ) ang mga hakbangin upang ma-decongest o mapaluwag ang mga piitan sa bansa na nasa pangangasiwa ng Bureau of Corrections (BUCOR).

Sa ginanap na Laging Handa Briefing, inihayag ni DOJ Spokesperson Atty. Mico Clavano, na lumalabas sa hawak na datos ni Justice Sec. Boying Remulla, umaabot na sa 300% ang congestion rate ng mga bilangguan sa bansa.

Ito aniya ang dahilan kaya’t binabalak na ng kanilang ahensya na ilipat sa Sablayan Prison sa Occidental Mindoro ang Maximum Security Compound habang sa Fort Magsaysay, Nueva Ecija naman ang minimum security.

Napag alaman na aabot sa 26,000 ang mga nakapiit sa New Bilibid Prison (NBP), na ang kapasidad ay nasa 6,000 preso lamang.

Patunay ito na hindi na talaga aniya maganda ang sitwasyon ng mga Person Deprived of Liberty o mga pdl sa loob mg bilangguan.

Bunsod nito, inihayag ni Clavano na nagpatulong na sila sa Public Attorney’s Office (PAO) upang mabigyan ng assistance ang mga naglalakad ng parole para sa kanilang mga nakabilanggong kaanak. –  sa ulat ni Jopel Pelenio (Patrol 17)

Patuloy na bumababa ang naitatalang mga bagong kaso ng COVID-19 sa National Capital Region (NCR).

Ito ang inihayag ni Department of Health (DOH) Officer in Charge Maria Rosario Vergeire kung saan nananatili sa moderate risk case classification ang naturang rehiyon.

Aniya, naobserbahan din nasa downward trend na ang COVID cases sa buong bansa dahil na rin sa disiplina ng mga tao sa pagsunod ng minimum public health standards.

Posible naman na makakapagtala ng anim hanggang siyam na libong COVID-19 cases kada araw sa susunod na buwan kung hindi maipagpapatuloy ang pagsunod sa mga ipinatutupad na health protocols sa bansa.

Samantala, umaasa naman si Vergeire na hindi na ito aabot pa sa naturang bilang at magpatuloy ang pagbaba ng mga nahahawaan ng sakit.