NATIONAL NEWS

Pinahihigpitan ni Senator Raffy Tulfo sa Department of Migrant Workers (DMW) at iba pang ahensya na higpitan ang screening process  sa mga papasukang banyaga ng Overseas Filipino Workers (OFWs).

Ito’y  para maiwasan aniya ang pang-aabuso at pagmaltrato sa mga OFWs.

Sinabi pa ni TULFO na maraming OFWs ang naabuso dahil hindi lubos na nasasala ang kanilang amo.

Giit pa ni Tulfo bago ma-deploy ang isang OFW ay kailangan nilang mag-submit ng ibat-ibang requirements at clearance pero yung kanyang among pupuntahan ay wala man lang isusumiteng kahit anong record na nagpapakita kung anong klaseng tao ito.

Hiniling naman ng senador kay Migrant Workers Sec. Susan Ople na dapat may mahigpit na screening process sa foreign employers para matiyak ang kaligtasan ng OFWs.

Inihirit din ni Tulfo kay Ople na magkaroon ng monitoring system sa mga bansa para mapigilan ang ‘bentahan’ ng OFWs, na hindi pinapasuweldo ng kanilang mga amo.

Ikinagulat ni Department of Interior and Local Government Secretary Benhur Abalos Jr. ang pahayag ni Cebu City Mayor Michael Rama na ituloy ang pagpapatupad ng Executive Order (EO) nito na gawing non-obligatory ang pagsusuot ng face mask sa siyudad.

Ito’y matapos mag-usap si Abalos at ang alkalde at napagkasunduan na ipagpaliban ang implementasyon ng naturang EO.

Sa kanilang naging pag-uusap, sinabihan pa umano ni Abalos si Rama na dadalhin niya ang nasabing isyu sa Inter Agency Task Force (IATF) kung saan pumayag aniya ito.

Matatandaang, sinabi ni Rama na tuloy ang pagpapatupad ng EO at bukas umano ito na pakinggan ang mga suhestyon upang mas mapaganda ang utos kaugnay ng opsyonal na pagsusuot ng face masks.

Inanunsyo ng ABS-CBN Corporation at TV5 Network Incorporated na hindi na matutuloy ang kanilang proposed investment deal.

Sa magkahiwalay na pahayag, sinabi ng TV5 at ABS-CBN na magkasundo silang sumang-ayon na i-terminate ang investment agreement na may petsang August 10, 2022 na sumasaklaw sa pagkuha ng ABS-CBN ng 34.99% equity interest sa TV5.

Sinabi rin ng Sky Vision Corp., Lopez Inc. at Cignal Cable Corp na nagkasundo rin silang wakasan ang sale and purchase agreement na sumasaklaw sa panukalang pagkuha ng Cignal Globe ng 38.88% equity interest sa Sky Cable Corp.

Una nang nahinto ang proposed investment deal para matugunan ng dalawang kumpanya ang mga alalahanin ng ilang mambabatas kung saan sang pagsisiyasat ang inilunsad ng House of Representatives upang matukoy kung may mga batas na nilabag ang nasabing kasunduan.

Sinabi ng National Telecommunications (NTC) na kailangang kumuha ng clearance ang ABS-CBN at TV5 mula sa mga kinauukulang ahensya ng gobyerno bago sila magpatuloy sa naturang deal.

Naniniwala ang isang mambabatas na hindi lamang lulutasin ng pagpapalawak sa railway system ng bansa ang problema sa trapiko kundi makatutulong din ito sa pagpapaluwag ng populasyon sa Metro Manila.

Paliwanag ni House Majority Leader at Zamboanga City Representative Manuel Jose “Mannix” Dalipe, kung mayroon kasing modernong sistema ng tren mas pipiliin ng mga Pilipino na manirahan sa labas ng Metro Manila.

Aniya, dapat ay matagal nang binigyang prayoridad ang modernisasyon at pagpapalawak dito upang hindi na kailangang tiisin ang mabigat na trapiko sa maynila gayong ang tren ang pinakamabilis at pinakamadaling paraan ng transportasyon at hindi ang mga sasakyan.

Nabatid na isa sa prayoridad ng administrasyong Marcos Jr. ang pagpapaunlad sa sistema ng tren sa bansa.  – sa ulat ni Tina Nolasco (Patrol 11)

Hinimok ng Department of Education (DEPED) ang mga estudyante sa isang paaralan sa Bacoor City, Cavite na humarap at magsampa ng mga reklamo kung nakaranas sila ng sexual harassment sa kanilang mga guro.

 Ayon kay Education Spokesperson Michael Poa, iniimbestigahan na ng DEPED School Division Office (SDO) sa Bacoor City ang pitong guro mula sa highschool kasunod nang nag-viral na social media post ng umano’y sexual advances sa mga mag-aaral.

 Pero, ang problema aniya’y walang masyadong complainants na nagpa-file ng kanilang affidavits kaya’t hinihikayat niya ang mga ito na lumabas.

 Nakatakda namang magsumite ang SDO-Bacoor ng fact-finding report sa regional office sa Calabarzon.

Wala pang naitatalang COVID-19 infections sa mga estudyante, guro at iba pang academic staff members simula nang mag-umpisa ang face-to-face classes.

Ayon kay Department of Education Spokesperson Michael Poa, patuloy nilang binabantayan ang mga paaralan para sa posibleng COVID-19 transmission.

Sinabi pa ni Poa na nakikipagtulungan ang DepEd sa Department of Health para sa COVID-19 vaccination status ng mga mag-aaral.

Mababatid na naglagay ang DOH ng vaccination sites sa ilang pampublikong paaralan upang mapataas ang antas ng pagbabakuna sa mga estudyante sa gitna ng pagbabalik ng in-person classes.

Mahigpit na nakatutok ang konsulada ng Pilipinas sa Toronto, Canada kaugnay sa kaso nang pagpatay sa isang mag inang Pilipino.

Kinilala ni Consul General Orontes Castro ang mga biktima na sina Elvie Sig-Od, 44 na taong gulang at 20 anyos na si Angelica.

Ayon sa konsulada, lumalabas sa imbestigasyon na ang mag ina ay pinatay ng live in partner ni Elvie sa kanilang apartment sa pagitan ng Bathurst Street at Ellerslue Avenue sa Ontario.

Tiniyak ng konsulada ang hustisya para sa mag ina matapos masakote at makasuhan na ang suspek.

Isang matandang Pilipina sa California, USA ang inatake at ninakawan.

Ayon sa mga otoridad, kalalabas lamang ng biktima sa isang fastfood joint nang hablutin ng suspek ang bag nito bago pinukpok sa ulo ng isang matigas na bagay.

Kaagad namang tumakas ang suspek sakay ng isang kotse.

Isinugod din kaagad ang biktima sa isang ospital na mahigpit na naka-monitor sa kondisyon nito.

Inanunsyo ng MMDA at ilang lokal na pamahalaan na magpapakalat ito ng marami pang traffic enforcers sa metropolis alinsunod sa utos ng Korte Suprema na suspendihin ang no-contact apprehension program (NCAP).

Sinabi ng MMDA at ng lokal na pamahalan ng Maynila at Valenzuela na magpapakalat sila ng mas maraming sa mga lugar na nagpatupad ng NCAP.

Ayon naman kay MMDA Spokesman Crisanto Saruca Jr., patuloy pa rin sa pagmamatyag ang mga tauhan nila sa mga motoristang lalabag sa batas.

Dagdag pa ni Saruca, pumalo na sa bilang na 107,234 NCAP apprehensions ang naitala mula Enero hanggang Agosto ng kasalukuyang taon.

Kaugnay nito, kalimitan sa nalalabag ng ilang motorista ay traffic lights violation at coding number scheme. —sa panulat ni Hannah Oledan

Ipinapabalik ng isang kongresista ang mga nakolektang multa sa mga motoristang lumabag sa no-contact apprehension policy (NCAP).

Iginiit ni 1-Pacman Party-List Representative Mikee Romero ang naturang hiling sa mga ahensya at lokal na pamahalaan makaraang suspindihin ng Korte Suprema ang operasyon ng naturang ordinansa.

Sinabi ni Romero na kabilang sa mga dapat magrefund ng multang siningil ay ang mga tauhan ng MMDA, LTO, maging ang mga lokal na pamahalaan ng Maynila, Quezon, San Juan, Valenzuela, Parañaque, at Muntinlupa City. —sa panulat ni Hannah Oledan