NATIONAL NEWS

Dapat na maghinay-hinay ang Cebu City Government sa pag-alis ng mandatory na paggamit ng face mask sa kanilang nasasakupan.

Sa panayam ng DWIZ, sinabi ni Dr. Maricar Limpin, Immediate Past President ng Philippine College of Physicians, na kahit na bumababa ang mga kaso ng COVID-19 sa ngayon, ay posibleng tumaas muli ito lalo’t balik face-to-face classes na ang mga estudyante.

Sinabi pa ni Limpin na dapat na kinonsulta muna ng Cebu LGU ang Department of Health bago ipinatupad ang naturang kautusan.

Mainam rin aniya na magkaroon ng isang polisiya ang bansa kaugnay sa pagsusuot ng face masks upang maiwasan ang kalituhan kaugnay dito.

Tumaas ang suplay ng salapi sa Pilipinas nitong Hulyo.

Batay sa datos na inilabas ng Bangko Sentral ng Pilipinas (BSP), sumampa na sa 15.377 trillion pesos ang domestic liquidity o M-3 ng bansa.

Mas mataas ito ng 7% kumpara sa 14.372 trillion pesos na naitala sa kaparehong panahon noong 2021.

Habang 0.3% ding mataas ang liquidity rate ngayong Hulyo kumpara noong Hunyo.

Malaking tulong sa pagtaas ang pagbalik ng lending activity sa mga pribadong sektor.

Tukoy na ng Philippine National Police (PNP) ang mga taong sangkot sa pag-post ng pekeng dokumento na nagpapalabas na nagtalaga si Pangulong Ferdinand ‘Bongbong’ Marcos Junior ng bagong commissioner ng Bureau of Immigration.

Ayon kay PNP Chief, General Rodolfo Azurin Junior, may lead na ang Criminal Investigation and Detection Group sa may kagagawan ng anomalya.

Pero tumanggi ang PNP na pangalanan ito lalo’t nagpapatuloy pa ang imbestigasyon.

Una rito, ibinabala ni Press Secretary Trixie Cruz-Angeles na maaaring makulong ng 12 hanggang 20 taon ang sinumang mamemeke ng seal, lagda o stamp ng pangulo.

Inilagay na sa ‘Code White Alert’ ang mga ospital sa Ilocos Region bilang paghahanda sa magiging epekto ng Bagyong Henry at Gardo na nasa loob na ng bansa.

Ayon kay Dr. Paula Paz Sydiongco, Regional Director ng Department of Health, posible pang itaas sa code blue ang alert level sa oras na isailalim sa state of calamity ang rehiyon.

Sa ilalim ng Code White Alert, naka stand-by ang lahat ng hospital personnel para sa medical at iba pang serbisyo.

Kinakailangan namang mag-report sa tungkulin ang lahat ng hospital personnel kapag isinailalim na sa Code Blue Alert ang Ilocos Region.

Sa ngayon, pagtitiyak ni Sydiongco na sapat ang gamot at relief supplies sa kanilang lugar sa kabila ng naunang pinsala ng Bagyong Florita at magnitude 7 na lindol.

Pinaplano ng Department of Health (DOH) na magsagawa ng special week of vaccination upang mapataas ang bilang ng mga Pilipinong mababakunahan ng booster shot.

Ayon kay Health Officer-In-Charge Maria Rosario Vergeire, ngayong Setyembre nila pinag-aaralang ipatupad ang programa.

Katuwang ng DOH sa plano ang Centers for Health Development, Regional Vaccine Operation Center, at Medical Societies para makabuo ng paraan upang mapataas ang booster vaccination coverage.

Noong July 26 huling nagpatupad ng Pinaslakas campaign ang DOH na layong mabakunahan ang mas maraming Pilipino kontra COVID-19.

Papayagan nang makaboto sa local level elections ang mga Persons Deprived of Liberty (PDLs).

Ito ay matapos alisin ng korte suprema ang Temporary Restraining Order (TRO) na ipinalabas upang harangin ang Resolution No. 9371 ng Commission on Elections na nagbibigay-laya sa mga presong makaboto.

Sa siyam na pahinang resolusyon na iprinoklama nitong March 29, 2022 at inilabas ngayong Agosto, ibinasura ng kataas-taasang hukuman ang petisyong inihain ni Atty. Victor Aguinaldo matapos hindi makatugon sa mga kinakailangan sa judicial review.

Layon nang petisyon na pagbawalan ang mga preso na bumoto noong may 2016 Elections.

Dahil sa pagbasura, maipapatupad na ng buo ng COMELEC ang Resolution 9371 sa mga susunod na halalan.

Itinalaga bilang co-chairpersons ng Second Congressional Commission on Education (EDCOM II) sina Senators Sherwin Gatchalian at Francis “Chiz” Escudero.

Tatayo bilang chairperson ng Senate Basic Education Committee si Gatchalian habang pangungunahan naman ni Escudero ang Senate Higher, Technical, and Vocational Education Panel.

Layunin nitong makabuo ng holistic, harmonized at coordinated education ecosystem na magmamando sa DepEd, CHED, at Tesda kung saan, bubuo ng sampung miyembro na may limang manggagaling sa kamara habang ang kalahati dito ay magmumula sa Senado.

Una nang nabanggit ni Pangulong Ferdinand “Bongbong” Marcos Jr. Sa kanyang unang SONA na nagsasagawa na ng masusing pagsusuri hinggil sa pagpapatupad ng K-12 program ng Department of Education. —sa panulat ni Hannah Oledan

Patuloy ang pakikipag-usap ng Department of Health (DOH) sa Department of Budget and Management (DBM), para sa karagdagang pondong gagamitin sa pamamahagi ng COVID-19 allowance sa mga healthcare workers.

Ayon kay Health Officer-In-Charge Maria Rosario Vergeire, naubos na ang kanilang Maintenance and Other Operating Expenses (MOOE) sa National Government.

Ito ang ginagamit ng kagawaran para mabigyan ng allowance ang lahat ng healthcare workers sa bansa.

Gayunman, tiniyak ng DOH na wala silang pipiliing ospital na mabibigyan ng pondo sa oras na i-release na ito ng DBM.

Ang Philippine General Hospital ang pinakahuling pagamutan na nagpadala ng liham sa DOH para sa kanilang One COVID Allowance.

Nakapagtala ang Pilipinas ng 929 bagong kaso ng Omicron subvariants.

Batay sa pinakahuling genome sequencing,  889 sa bagong kaso ay kabilang sa BA.5 subvariant; 16 sa BA.4; apat na BA.2.12.1; dalawa sa BA.2.75; at 18 sa iba pang sublineages.

Ang mga bagong kaso ng BA.5 AY nagmula sa NCR, Central Luzon, Bicol Region, Cordillera Administrative Region, CALABARZON, Central Visayas, Ilocos Region, Cagayan Valley,  MIMAROPA, SOCCSKSARGEN, Zamboanga Peninsula, Northern Mindanao at CARAGA Region.

Habang ang BA.4 ay naitala mula sa SOCCSKSARGEN, Ilocos Region, Bicol Region, Central Visayas, NCR, Central Luzon, Western Visayas, CALABARZON, at CAR.

Samantala, nagmula naman sa Cagayan Valley, Zamboanga Peninsula, CALABARZON at MIMAROPA ang naitalang bagong kaso ng BA.2.12.1.