NATIONAL NEWS

Epektibo na ngayong araw ang rollback ng Petron Corporation, Solane at Phoenix Petroleum sa presyo ng LPG.

Aabot sa P1.75 kada kilo ang bawas-presyo ng Petron at Phoenix Petroleum sa LPG.

Simula na ang kautusan alas-12:01 kaninang hating gabi.

Ang Auto LPG naman ng Petron at Phoenix ay may tapyas presyo na P0.98 at P0.95 kada litro.

Samantala, ngayong alas-6:00 ng umaga epektibo ang rollback ng Solane sa LPG na nasa P1.62.

Ang price adjustment sa LPG ay bunsod ng paggalaw ng presyo ng krudo sa international market.

Pinabulaanan ng Philippine National Police (PNP) na hindi ramdam ng mga kriminal ang kamay na bakal sa ilalim ng  panunungkulan ni Pangulong Ferdinand ‘Bongbong’ Marcos Junior.

Sagot ito ni PNP Chief Police General Rodolfo Azurin Junior, matapos matanong sa press briefing sa Malacañang kung may takot pa rin sa batas ang mga kriminal dahil sa sunod-sunod sa kidnapping incident.

Ayon kay Azurin, imbes na tumaas ay bumaba pa aniya ang naitatalang krimen sa Pilipinas samga unang araw sa pwesto ni Pangulong Marcos.

Batay sa datos ng PNP, nasa 29,000 crime cases na lamang ang naitala sa unang 56 na araw na panunungkulan ni PBBM, kumpara sa 35,000 na naitala noong 2021.

Patuloy naman ang panawagan ni Azurin sa publiko na tulungan ang pambansang pulisya sa pagsugpo ng krimen pamamagitan ng pagre-report dito.

Sinampahan ng kasong kidnapping with homicide ng Batangas Police Provincial Office (BPPO) ang 7 suspek kaugnay sa pagdukot at pagpatay sa isang lalaki sa Batangas.

Kinilala ang biktimang si Eugene del Rosario, 25-anyos na dinukot sa isang gas station sa Taal, Batangas at kalaunan ay natagpuan ang bangkay nito na may tama ng baril sa Sariaya, Quezon Province.

Ayon kay Pol. Lt. Col. Jezreel Calderon, Deputy Provincial Director for Operation ng BPPO, natukoy ang isa sa pitong suspek sa Tondo, Maynila na sinasabing miyembro umano ng bukas kotse gang.

Sa ngayon, patuloy pang isinasagawa ng mga otoridad ang imbestigasyon upang matukoy ang pagkakakilanlan ng iba pang suspek.  —sa panulat ni Hannah Oledan

Bumabalangkas na ng response plan ang National Disaster Risk Reduction and Management Council (NDRRMC), kaugnay sa magiging epekto ng Bagyong Gardo at super typhoon Hinnamnor sa Pilipinas.

Ayon kay Bernardo Rafaelito Alejandro, IV, Deputy Administrator Assistant Secretary ng NDRRMC, naka stand-by na ang buong ahensiya sa dalawang sama ng panahon.

Anumang oras din ay magtataas ng alerto ang NDRRMC kaya inabisuhan ang mga LGU partikular sa Northern Luzon na paghandaan ang anumang pinsala.

Sa ngayon, binuksan na ng NDRRMC ang kanilang Emergency Operation Center para sa mga tawag at responde sa anumang tulong.

Pinasalamatan ng grupo ng transportasyon ang pagpapatigil ng Korte Suprema sa pagpapatupad ng Metro Manila lgus sa no-contact apprehension policy (NCAP).

Sa panayam ng DWIZ, malaki ang naging pasasalamat ni Pasang Masda President Obet Martin sa naging pagdinig sa kanilang naging petisyon hinggil sa naturang usapin.

Ayon kay Martin, kahit may temporary restraining order ang Korte sa pagpapatupad ng NCAP, kailangan parin na magkaroon ng disiplina ang lahat ng mga motorista at dapat na sumunod sa batas trapiko.

Naghahanda na ang National Disaster Risk Reduction and Management Council (NDRRMC) sa posibleng epekto ng dalawang bagyo na nasa loob ng Philippine Area of Responsibility (PAR).

Sa panayam ng DWIZ, sinabi ni NDRRMC Spokesperson at ASec. Bernardo Alejandro IV, na pinaghahanda na nila ang mga local na pamahalaan ng Batanes at extreme northern part ng Cagayan dahil sa inaasahang epekto ng bagyong Gardo, bagyong Henri at hanging habagat.

Sinabi pa ni Alejandro na napalabas na sila ng mga listahan ng barangay na kanilang tinututukan partikular na yung mga nasa vulnerable areas kabilang na ang Region 1 at CAR.

Samantala, siniguro naman ni Alejandro na nakahanda narin ang mga tulong sa mga maaapektuhan ng bagyo katuwang ang DSWD.